Lesa meira »]]> Á miðvikudag (15.05.2013) flaskaði fréttastofa Ríkisútvarpsins á umfjöllun um gjald fyrir strandveiðileyfi eins og vikið var í Molum (1205). Sagði að menn greiddu níu krónur og fimmtíu aura fyrir þorskígildistonnið. Átti að vera fyrir kílóið. Munurinn var þúsundfaldur. Svipað henti Mogga sama dag sem í sínum óendanlega Evrópufjandskap sagði lesendum sínum að ekki svaraði lengur kostnaði að slá mynt að verðgildi eina og tvær evrur. http://www.mbl.is/frettir/erlent/2013/05/15/borgar_sig_ekki_ad_sla_evrumynt/
Þegar skoðuð er heimildin sem vísað er í fréttinni kemur í ljós að þarna skakkar hundraðfalt og fimmtíufalt! Það er ekki verið að tala um einnar og tveggja evru mynt, heldur eitt sent og tvö sent, einn hundraðasta úr evru og einn fimmtugasta! Sjá: http://euobserver.com/economic/120124 Í enska textanum segir reyndar : ,,The European Commission on Tuesday (14 May) tabled several scenarios for the withdrawal of the 1 and 2 euro cent coins, with the cost of printing these coins greater than their use.” – Það er auðvitað rangt hjá þeim sem hefur skrifað þennan enska texta að tala um að prenta mynt. Mynt er slegin, ekki prentuð. Seðlar eru prentaðir. – Í þessu máli var fréttaskrifari Moggans úti í móa,- Hádegismóa. En þegar um er að ræða að gera lítið úr ESB og evrunni , þá þarf kannski ekki að hafa þetta nákvæmt. Það er ekki svo naujið, eins og sagt var í gamla daga.

Molavin sendi eftirfarandi (16.05.2013): „Franskarnar sagðar slepjulegar…“ segir Vísir punktur is í dag, fimmtudag, og hefur það eftir New York Times („The French fries arrive soggy“). Frönskurnar hafa sem sagt ekki lengur verið stökkar. Fréttabörnin, sem þýða af erlendum síðum verða að læra að beygja íslenzk orð rétt. Á sömu síður er frétt um að fréttastofur 365 miðla sameinist í eina „öfluga“ fréttastofu. Vonandi verður hún öflugri í meðferð móðurmálsins en verið hefur. – Molaskrifari þakkar Molavin sendinguna.

Hún fékk krabbamein í eitt brjóstið, sagði slúðurfréttaritari Ríkisútvarpsins í Los Angeles um kunna leikkonu við hlustendur Rásar tvö á föstudagsmorgni (1q7.05.2013). Eru þá ónefndar aðrar ambögur. Dæmalaust er dómgreindarleysi dagskrárstjóra að hella þessu yfir okkur á hverjum föstudagsmorgni.

Sigurgeir skrifaði (15.05.2013): ,,Ágæti Molaskrifari. Stundum birtast skondnar og skemmtilegar fyrirsagnir í blöðum. Í Mbl. þriðjudaginn 14. maí, á forsíðu stóð:
„Ökumenn ölvaðir eftir deilur og átök“
Og ég sem hélt í fáfræði minni að menn þyrftu að hella í sig talsverðu magni af áfengi til að verða ölvaðir. Kannski maður prófi þetta.” Rétt athugað. Molaskrifari þakkar bréfið, en mælir ekki með því að þetta sér prófað!

Lesandi Benti á þessa frétt á mbl.is (15.05.2013): Í fréttinni segir meðal annars: ,,Fórnarlambið mun vera með hrjúfur í handleggnum, sem og andliti sínu og höfði.” Hann spyr: ,,Hvað skyldi vera, að vera með,,hrjúfur“ á líkamshlutum? Getur það verið skylt því, að vera hruflaður á sömu stöðum??“ Sennilega rétt til getið, en þarna hefur að líkindum fréttabarn verið á vaktinni.

Útvarpsmaðurinn Andri Freyr Viðarsson ýjar að því á visir.is (17.05.2013) að Molaskrifari ljúgi upp tilvitnunum í fólk í skrifum sínum. Hann segir: ,, Nei ég segi svona. Hann er alltaf að vitna í einhverja gæja sem ég veit ekki einu sinni hvort þeir séu til … “ ( hvort eru til , ætti þetta reyndar að vera) Eitt er að vera ekki vel máli farinn. Annað er að dylgja um að farið sé með ósannindi. Hér hefur aldrei verið vitnað í tölvubréf eða ábendingar nema slíkt hafi borist. Oftast í netpósti stöku sinnum í síma. Það er heldur slæm iðja að gera öðrum upp illar hvatir og ómerkilegtheit. – En nóg um það.

Næstu Molar á þriðjudag.
Gleðilega hvítasunnu!

Fyrirvari: Athugasemdir frá öðrum á þessari síðu eru á þeirra ábyrgð. Síðuskrifari áskilur sér rétt til að fjarlægja dónaleg eða meiðandi ummæli, nafnlausar athugasemdir eða athugasemdir undir dulnefni. Lesendabréf eru vel þegin. Bréfritarar eru beðnir að taka fram hvort birta má bréf, eða ábendingar þeirra, undir nafni. – ESG

Lesa meira »]]> Í fréttum Ríkissjónvarps (14.05.2013) var sagt: Kristján segir að fyrirbyggjandi aðgerðir eins og þessari fari fjölgandi … Hér er ekki vel að orði komist. Fréttamaður hefði átt að segja: Kristján segir að fyrirbyggjandi aðgerðum eins og þessari fari fjölgandi …

Af mbl.is (14.05.2013): Fiskurinn nam hvorki meira né minna en 46,7 kíló og var um 150 cm langur. Fréttinn var um Norðmann sem veiddi óvenjulega vænan þorsk á stöng. Það er út í hött að segja: Fiskurinn nam hvorki meira né minna en … Gunnar sendi línu og vitnar einnig þessa frétt og tiltekur seinni hluta hennar: ,, Alþjóðlegu sportveiðisamtökin staðfestu metið en næst stærsti skráði þorskur sem veiddur hefur verið með veiðistöng þar til nú er 44,5 kg og var hann veiddur í New Hampshire í Bandaríkjunum árið 1969. Michael Eisele veiddi þorskinn Noregi í síðasta mánuði.“
Svo mörg voru þau orð. Frá upphafi hvers? Nam hvorki meira né minna en 46,7 kg? Næst stærsti þorskur þar til nú? Veiddi þorskinn Noregi? Óttalegt bull er þessi frétt! – Molaskrifari þakkar bréfið.

Af mbl.is (16.05.2013): Móðirin fylgdist grannt með dómaranum lesa upp á meðan faðirinn draup höfði, segir í frétt Aftenposten. Hér er ruglað saman sögnunum að drjúpa og að drúpa. Að drjúpa er að falla í dropum, leka. Að drúpa er að slúta niður , hanga. Að drúpa höfði er að vera gneypur, sitja álútur (Íslensk orðabók) Hér hefði átt að segja : … faðirinn drúpti höfði.

Ruslakista Ríkissjónvarpsins er á sínum stað í kvöld (17.05.2013). Fyrst uppsuða um Evróvisjón. Svo þrjár kvikmyndir. Þar af eru tvær endursýndar. Niðursoðna konuröddin mun að venju halda því leyndu fyrir okkur að verið sé bjóða okkur endursýnt efni. Tvær af þessum þremur myndum fá einkunnina 5,5 (af 10,0) hjá IMBd. Eru sem sé í ruslflokki. Þriðja myndin (6,7) gæti verið í miðlungsflokki. Hvers eigum við að gjalda?

Enn eitt dæmið um beygingafælni, – eða bara vankunnáttu. Af mbl.is (15.05.2013: Algengt er að flóttamenn sem leita skjóls á Íslandi hafi verið hótað ofbeldi og pyntingum án þess að falla formlega undir þau skilyrði alþjóðalaga um pyntingar. Hér ætti að standa: Algengt er að flóttamönnum sem leita skjóls á Íslandi hafi verið hótað ofbeldi og pyntingum án þess að falla formlega undir þau skilyrði alþjóðalaga um pyntingar. Þetta er ekkert flókið, – ef menn kunna grunnatriðin í notkun móðurmálsins.

Í Ríkisútvarpinu (15.05.2013) var pistill þar sem þess var minnst að 150 ár eru liðin í sumar frá fæðingu Ólafíu Jóhannsdóttur sem vann merkilegt starf í Osló meðal ungra stúlkna sem lent höfðu á glapstigum, óreglu og vændi og voru margar hrjáðar af kynssjúkdómum. Hún var einstök, einlæg trúkona sem vann göfugt starf. Hún barðist fyrir bindindi og réttindum kvenna. Í bæði tali og texta var talað um kennsluréttindakonuna Óalfíu Jóhannsdóttur: ,,Þetta er kennsluréttinda- og baráttukonan Ólafía Jóhannsdóttir sem gerði garðinn frægan í Osló meðan borgin hét enn Kristianía”. Í pistlinum var hvergi vikið að kennsluréttindum. Fyrir nokkrum árum las Molaskrifari prýðilega bók , ævisögu Ólafíu eftir dr. Sigríði Dúnu Kristmundsdóttur. Þar voru engin kennsluréttindi til umræðu, muni Molaskrifari rétt. Hér hefur eitthvað skolast til, eða hvað? Var verið að rugla saman kennsluréttindum og kvenréttindum? Hvað var hér á ferð? Það var þarft verk fyrir nokkrum árum þegar borgaryfirvöld í Osló fluttu brjóstmynd af Ólafíu sem var eiginlega komin inn í umferðarmannvirki á snotran stað við Akerána. Þar fer vel um hana.

Molaskrifari hefur stundum varað við óþarfri þolmyndarnotkun sem getur gert merkingu óljósa. Dæmi af fésbók (15.05.2013): Þegar þjóðin er búin að leggja heilsársveg að Dettifossi að vestanverðu á að fara að rukka aðgengi af eigendum. Hér er það ekki alveg ljóst hvor eigendur ætla að rukka gesti eða hvort eigendur verða rukkaðir. Betra hefði verið, til dæmis: Þegar þjóðin er búin að leggja heilsárveg að Dettifossi ætla landeigendur að innheimta aðganseyri.

Gerir Ríkisútvarpið ekki lengur kröfur um að fréttaþulir lesi reiprennandi og séu áheyrilegir ( kvöldfréttir 16.05.2013)?

Fyrirvari: Athugasemdir frá öðrum á þessari síðu eru á þeirra ábyrgð. Síðuskrifari áskilur sér rétt til að fjarlægja dónaleg eða meiðandi ummæli, nafnlausar athugasemdir eða athugasemdir undir dulnefni. Lesendabréf eru vel þegin. Bréfritarar eru beðnir að taka fram hvort birta má bréf, eða ábendingar þeirra, undir nafni. – ESG

Lesa meira »]]> Sumir fréttaskrifarar hafa óskiljanlegt dálæti á sögnina að staðsetja. Af visir.is
(14.05.2013):
Breski auðmaðurinn Sir Richard Georg hefur keypt íslenska hesta fyrir í kringum 100 milljónir kr. Þeir eru staðsettir á bænum Lækjarmóti II í Víðidal í Húnaþingi. Hestarnir eru á bænum Lækjarmóti II í Víðidal … Blaðamaðurinn sem skrifaði þetta var víst staðsettur á fréttavefnum visir.is. Vikið var að samkynja orðalagi í Molum gærdagsins.

Af mbl.is (14.05.2013): Opnað hefur verið fyrir Þjóðveg 1 milli Breiðdalsvíkur og Egilsstaða, en hann lokaðist síðdegis vegna rútu sem var þversum á veginum.
Vegurinn hefur verið opnaður. Það er út í hött að tala um að opnað hafi verið fyrir veginn. Kannski mætti segja, að opnað hafi verið fyrir umferð um veginn. Svo var fréttin lagfærð og þá tók eiginlega ekki betra við: Opnað hefur verið á þjóðvegi 1 milli Breiðdalsvíkur og Egilsstaða, en hann lokaðist síðdegis vegna rútu sem var þversum á veginum.

Hafliði sendi eftirfarandi ábendingu (13.05.2013):
,,Sæll Eiður. Og þakka þér fyrir góða mola.
Nú er ég einn þeirra sem fylgist nokkuð reglulega með því sem er að gerast í knattspyrnuheiminum. Og til þess nota til dæmis íslenska vefmiðla.
Nú ber svo við að íslenskir fjölmiðlar virðast vanrækja þennan þátt blaðamennskunnar og því virðist ekki finnast íþróttafréttamaður sem skrifað getur íslenskt mál.
Þetta er þras, ég veit það. En þetta er eitthvað sem mér hefur legið á hjarta um góðan tíma og rifjaðist upp þegar ég smellti á fréttina hér að neðan fyrr í kvöld.

http://visir.is/rio-med-sigurmarkid-i-sidasta-heimaleik-ferguson/article/2013130519855

og þessa:

http://www.visir.is/neville-tok-sjaldsed-vidtal-vid-paul-scholes/article/2013130519765

Ég hefði skilið ef þessi texti hefði birst á fotbolti.net sem er rekin af einstaklingum úti í bæ og ungmenni skrifa inn á. En þetta er á fréttavef 365 miðla, Vísi.is.
Að mínu mati gerir miðillinn lítið úr lesendum með svona texta og einnig úr sér sjálfum.
Bið þig að afsaka langlokuna. Þurfti bara að deila þessari kvörtun með einhverjum sem kynni að meta hana.” Molaskrifari þakkar Hafliða kærlega fyrir þessa þörfu ábendingu. Vonandi lesa þeir sem þurfa.

Tvennt, jafnvel þrennt, var athugavert að mati Molaskrifara við frétt um strandveiðar í Ríkissjónvarpi í gærkveldi (15.05.2013) Sagt var að skip þyrfti að vera með gilt haffæri. Hvað er haffæri? Var ekki átt við gilt haffærisskírteini? Svo var talað um veiðigjald , – níu krónur og fimmtíu aura fyrir hvert þorskígildistonn. Það segir nú heilbrigði skynsemi strax að geti varla verið rétt. Auðvitað eru þetta níu krónur og fimmtíu aurar á hvert kíló Eitt er kíló og annað tonn, eða þúsund kíló. Hér er textinn: ,,Skipið þarf að vera á skipaskrá og með gilt haffæri. Eigandi skips þarf sjálfur að vera um borð og því lögskráður. Skipstjórinn þarf að hafa gild skipstjórnarréttindi og vélstjórnarskírteini og þarf ásamt öðrum í áhöfn að hafa lokið öryggisfræðslu. Til að virkja strandveiðileyfi þarf að greiða 72 þúsund krónur og veiðigjald er níu krónur og 50 aurar á hvert þorskígildistonn.” Svo er ágætt að hafa samræmi milli bókstafa og tölustafa. Hafa lokið öryggisfræðslu. Ekki gott orðalag.
Eftirfarandi er af vef Fiskistofu: ,,Til þess að virkja strandveiðileyfi þarf því að greiða 72.000 kr. Athygli er vakin á því að strandveiðum loknum verður veiðigjald lagt á landaðan afla og verða greiðsluseðlar fyrir því sendir út í lok ágúst. Veiðigjaldið er 9,50 kr. á hvert þorskígildiskíló”.Líklega les enginn yfir. Molaskrifara finnst að fréttastjóri og vaktstjóri eigi að hlusta á fréttirnar og leiðrétta rangfærslur og mishermi. Ekki heyrði Molaskrifari að þetta væri leiðrétt. Þarna skakkaði þúsundfalt. Við eigum að geta treyst því að satt og rétt sé frá greint í fréttum Ríkisútvarpsins og leiðrétt , sé af slysni eða óviljandi, rangt farið með. Ekki satt? Ef eðlileg verkstjórn og ritstjórn væri við lýði í Efstaleiti þyrfti ekki að skrifa svona athugasemdir.

Fyrirvari: Athugasemdir frá öðrum á þessari síðu eru á þeirra ábyrgð. Síðuskrifari áskilur sér rétt til að fjarlægja dónaleg eða meiðandi ummæli, nafnlausar athugasemdir eða athugasemdir undir dulnefni. Lesendabréf eru vel þegin. Bréfritarar eru beðnir að taka fram hvort birta má bréf, eða ábendingar þeirra, undir nafni. – ESG

Lesa meira »]]> Egill skrifaði (14.05.2013): Á dv.is í dag, þriðjudag: „Hún segist þyngjast um 20 kíló á sex mánaða fresti.“ Ég vildi ekki vera nálægt þessari konu á því augnabliki sem hún springur út um 20 kíló. E.t.v. hefur blaðamaður átt við á sex mánaða tímabili.- Já rétt er það Egill. Eins gott að vera í hæfilegri fjarlægð!

Af mbl.is (12.05.2013) : Refir sem lifa á búsvæðum við sjávarsíðuna, meðal annars hér á landi, hafa safnað miklu magni af kvikasilfri í líffærum sínum. Seint verður sagt að þetta sé lipurlega skrifað. Breytingartillaga: Mikið kviksilfur safnast í líffæri þeirra refa hér á landi sem halda sig mest við sjávarsíðuna.

Borgin er staðsett við landamærin, var sagt í fréttum Bylgjunnar á sunnudagsmorgni (12.05.2013). Borgin er við landamærin. Orðið staðsett er þarflaust þarna.

Lesandi skrifar (13.05.2013): ,,Þakka þér fyrir bloggið þitt, ekki veitir af. Lögreglan á Egilsstöðum leitaði“ í dyrum og dyngjum “ en ekki; dyrum og dyngjum. Að versla hitt og þetta sér maður alla daga. Það er orðið fast í málinu, eins og að taka þátt.
Af nógu er að taka, en þakka þér fyrir
árveknina.” Molaskrifari þakkar bréfið.

Í ágætum þætti Á Sprengisandi á Bylgjunni (12.05.2013) var talað um fjórar kosningar þar sem tala hefði átt um fernar kosningar.

Vinna við nýju íbúðirnar hófust í mars, var sagt í kvöldfréttum Ríkisútvarps (12.05.2013). Öllum verður það á að mismæla sig. Verra er þegar fréttalestri er haldið áfram, án leiðréttingar, eins og ekkert hafi í skorist. Þá er fréttalesarinn ekki að hlusta á eigin lestur. Grundvallarregla.

Eitthvað skolaðist til í Landanum í heimsókn á Listahátíð barnanna í Reykjanesbæ í Duus-húsi í Keflavík þar sem talað var um þessa stakkstæðu. Átti að vera: Þetta stakkstæði. Stakkstæði er reitur, fiskþurrkunarreitur þar sem saltfiskur var breiddur til þerrris, sólþurrkaður. Talað var um að breiða og taka saman. Að kveldi var fiskinum stakkað, hlaðið í stafla á reitnum.

Á vefnum veiða.is stendur (13.05.2013) Laugarvatn hefur verið í uppáhaldi hjá all mörgum veiðimönnum og er ljóst að þar er hægt að gera frábæra veiði. http://veida.is/index.php/frettir/382-fott-veidhi-i-laugarvatni
Allt er nú gert ! Það var góð veiði í Laugarvatni. Menn gera það það gott, en þeir sem veiða vel gera ekki góða veiði.

Morgunblaðið var í gær (14.05.2013) með snotra frétt um sjötugsafmæli forseta Íslands, Ólafs Ragnars Grímssonar, og gat þess kurteislega í leiðinni að hann væri staddur á landinu! –Orðabókin segir um að vera staddur þar, sem dvelur e-s staðar í stuttan tíma. http://www.mbl.is/frettir/innlent/2013/05/14/olafur_ragnar_grimsson_sjotugur/

Fyrirvari: Athugasemdir frá öðrum á þessari síðu eru á þeirra ábyrgð. Síðuskrifari áskilur sér rétt til að fjarlægja dónaleg eða meiðandi ummæli, nafnlausar athugasemdir eða athugasemdir undir dulnefni. Lesendabréf eru vel þegin. Bréfritarar eru beðnir að taka fram hvort birta má bréf, eða ábendingar þeirra, undir nafni. – ESG

Lesa meira »]]> Molaskrifari les jafnan Tungutakspistla í Morgunblaðinu á laugardögum , sér til gagns og fróðleiks. Pistillinn sl. laugardag (11.05.2013) hófst svona: Mörg hafa komið að máli við mig …. Molaskrifari hnaut um þetta. Mörg hvað? Mörg fólk? Svo fór hann að hugsa. Þetta skrifar prófessor í móðurmálsfræðum við Háskóla Íslands. Þetta hlýtur að vera rétt. Það er Molaskrifari sem er á villigötum. Hann hefur enga sérmenntun í málfræði eða málvísi, þótt hann sé sífellt að setja sig á háan hest. Molaskrifari játar fúslega að hann áttar sig ekki á þessu orðalagi. Nema þetta sé hluti af einhverskonar pólitískri rétthugsun. Ekki megi segja – Margir hafa komið að máli við mig , … það sé of karllægt, eins og það heitir víst. Molaskrifari er nú samt á því að það hefði verið betra orðalag í ljósi þess að samkvæmt íslenskri málvenju fornri og nýrri eru konur menn.

Á mbl.is (10.05.22013) segir í fyrirsögn: Gríðarlegur missir í Ferguson. Í textafréttarinnar er talað um missi af Ferguson, – Molaskrifari hefur vanist því að talað sé um að missir sé að hverju ekki af eða í.
Hvað segja Molalesendur um það?
Lesandi skrifar (10.03.2013) ,,Mér þykir skrítið að segja að trommuleikarar hefji upp raust sína þegar þeir leika á trommur. Það er ekkert í fréttinni um að trommuleikarar hafi sungið heldur að leikurinn gerðist sífellt háværari.
http://www.mbl.is/folk/frettir/2013/05/10/sagdi_trommuleikurum_til_syndanna/ “ Molaskrifari er sammála.
Úr smáauglýsingum í Bændablaðinu (08.05.2013):Erum með frábæran spæni á aðeins 1.890 kr. Baggann, og Kerrur á einum og tveimur öxlum með og án bremsum. Þarna hefur prófarkalesturinn greinilega brugðist.

Dálítið undarlegt að heyra BBC fyrir fáeinum dögum þýða þýska orðið Schadenfreude, sem það að njóta sársauka (e. take pleasure in pain). Við köllum þetta Þórðargleði, að gleðjast yfir óförum annarra. Það orð á víst rætur að rekja til meistaraverks þeirra Þórbergs og séra Árna Þórarinssonar en þar segir Þórbergur svo frá í orðastað séra Árna:
,,Þórður hét maður og bjó á bæ nokkrum í prestakalli mínu. Einn dag á slætti kom hann út á engjar til fólks síns og fékk þá engu orði upp komið fyrir hlátri: „He-he-he-he; he-he-he-he-he! Nú er það skemmtilegt hjá þeim Norðlingunum. Ég var að lesa Ísafold. Ekki þornað af strái í allt sumar þar fyrir norðan. Öll hey grotnuð niður. Enginn baggi kominn í hlöðu og nú kominn höfuðdagur“. Svo hnippir hann í mann sem hann stóð hjá og segir ískrandi:„Skratti væri nú gaman að sjá, hvernig þeir taka sig út núna, greyin. He-he-he-he!“ Þetta hugarfar, sem gleðst yfir óförum manna, kalla Danir Skadefrohed og Skadefryd. Við eigum ekkert orð í íslenzku, sem nær gleðinni í þessari illgirni. En síðan ég heyrði söguna af Þórði bónda í prestakalli mínu, hef ég nefnt þennan hugsunarhátt þórðargleði og þann mann þórðarglaðan, sem kætist yfir því, er öðrum gengur illa. En mikil fádæma hugarfarsspilling er nú þetta.” ( Af Wikpediu)

Fyrirvari: Athugasemdir frá öðrum á þessari síðu eru á þeirra ábyrgð. Síðuskrifari áskilur sér rétt til að fjarlægja dónaleg eða meiðandi ummæli, nafnlausar athugasemdir eða athugasemdir undir dulnefni. Lesendabréf eru vel þegin. Bréfritarar eru beðnir að taka fram hvort birta má bréf, eða ábendingar þeirra, undir nafni. – ESG

Lesa meira »]]> Sjö slökkviliðsmenn á Akureyri eru í áminningarferli, segir í frétt á dv.is (08.05.20113). Þetta hefði mátt orða öðruvísi og skýrar. Er ekki verið að segja okkur að sjö slökkviliðsmenn á Akureyri hafi verið áminntir, fengið
áminningu?

Þegar skúta hans skyndilega hvolfdi, sagði íþóttafréttamaður Stöðvar tvö (10.05.2013). Í inngangi fréttarinnar sagði annar íþróttafréttamaður: Skúta hans hvolfdi. Samræmi í vitleysunni! Skútunni hvolfdi. Skútan hvolfdi ekki. Ekki vönduð vinnubrögð.

Um fyrirhugaðar hvalveiðar Hvals h.f. í sumar sagði fréttamaður Ríkissjónvarpsins (08.05.2013): Þessi ákvörðun hefur mælst illa fyrir eins og nærri má geta. Ófaglegt orðalag. Hversvegna – eins og nærri má geta ? Fréttamenn eiga ekki að leggja dóm á efni frétta. Okkur kemur ekkert við hvað þeim finnst. Grunnregla í fréttamennsku. Þetta var endurtekið á miðnætti. Enda hlustar víst enginn í Efstaleiti. Hér er svo tengill á fremur illa skrifaða frétt á vef Ríkisútvarpsins um þetta sama efni: http://www.ruv.is/frett/vilja-ad-obama-gripi-til-adgerda

Eignarfalls -r- í samsettum orðum á í vök að verjast. Matvöruverslanir eru hættar að selja jarðarber. Nær undantekningarlaust eru þar á boðstólum jarðaber. Þegar ekið um um Selfoss blasir við stórt skilti þar sem auglýst er myndlistasýning. Ekki myndlistarsýning.

… sér mjög á eftir Moyes. Þannig var tekið til orða í fréttum Stöðvar tvö (09.05.2013). Hér hefði nægt að segja: .. sér mjög eftir Moyes.

Í dagblaðakynningu á dagskrá Ríkissjónvarps á uppstigningardag segir: 21 45 Sjónvarpsleikhúsið – Úti að viðra hundana. Breskur einþáttungur ,(4:6). Einþáttungur! Fjórði þáttur af sex ! Er verið að gera grín að okkur ?

Í morgunþætti Bylgjunnar (10.05.2013) nefndi fréttamaður þýska tónskáldið Richard Wagner. Skírnarnafn tónskáldsins er ekki borið fram á á ensku / ritsjard/ það er borið fram / rih-kard/. Svona læðir enskan sér allstaðar inn. Og umsjónarmaður talaði um að versla inn. Við förum út að versla og kaupum inn. Þetta á ekki að vera neitt flókið.

Í fréttum Stöðvar tvö (09.05.2013) var sagt að formenn flokkanna mundu leita álita og (afla) gagna. Ekki veit Molaskrifari betur en orðið álit sé eintöluorð.

Lesandi bendir á þessa frétt á mbl.is (09.05.2013): http://www.mbl.is/frettir/innlent/2013/05/09/heidmork_ofaer/. Hann spyr:
„Hvenær var Heiðmerkurvegur framlengdur frá Vífilsstöðum í Garðabæ að Víðistöðum, væntanlega í Hafnarfirði.“ Ekki kann Molaskrifari svör við því.

Fyrirvari: Athugasemdir frá öðrum á þessari síðu eru á þeirra ábyrgð. Síðuskrifari áskilur sér rétt til að fjarlægja dónaleg eða meiðandi ummæli, nafnlausar athugasemdir eða athugasemdir undir dulnefni. Lesendabréf eru vel þegin. Bréfritarar eru beðnir að taka fram hvort birta má bréf, eða ábendingar þeirra, undir nafni. – ESG

Lesa meira »]]> Stór uppgötvun danskra lækna, segir í undirfyrirsögn í Morgunblaðinu (08.05.2013). Molaskrifari er á því að eðlilegra hefði verið að tala um merka uppgötvun, fremur en stóra uppgötvun.

Hurð er fleki til að loka dyrum eða opi, segir orðabókin. Þessvegna er ekki rétt að tala um að ganga í gegn um hurð, eins og maður sem rætt var við í fréttum Ríkisútvarps (08.05.2013) sagði. Þetta heyrist samt nokkuð oft.

Kastljósið lagt undir Evróvisjón í gærkveldi (10.05.2013), síðan hinar hallærislegu Hraðfréttir og svo meira en klukkustundar löng dagskrá um Evróvisjón. Nú er víst bannað að tala um Evróvisjón í Efstaleiti. Júróvisjón skal það heita. Má þá tala um evru, á ekki að tala um júró? Hvað segir málfarsráðunautur?
Hvað kostar annars Evróvisjónævintýri Ríkissjónvarpsins?

Gúrkutíð í fréttum á miðvikudegi (08.05.2013) hjá fréttastofu Ríkisútvarpsins. Langloku umfjöllun um gamla tillögu í borgarstjórn Reykjavíkur um að flytja fimmtudagsfrídaga eins og uppstigningardag og sumardaginn fyrsta fram á föstudag. Svo er líka hægt að vera svolítið hissa á endalausri umfjöllun fjölmiðla um knattspyrnustjórann Sir Alex Ferguson sem um ævina hefur stundum hegðað sér eins og fótaboltabulla.

Í frétt í Ríkissjónvarpi (08.05.2013) af því er brú hrundi í Noregi var sagt að steinsteypa hefði sprungið með þessum afleiðingum. Molaskrifari er eiginlega jafn nær. Ef grannt var skoðað mátti geta sér þess til að steypumót hefðu gefið sig, þegar verið var að steypa hluta brúarinnar.

Í fréttum Ríkisútvarps (08.05.2013) var sagt:Strákarnir áttu eftir að spila stóra rullu fyrir klúbbinn …. Molaskrifari hélt eiginlega að búið væri að drepa þessa gömlu dönskuslettu, en hún lifir góðu lífi, – í sumum miðlum.

Í Íslandi í dag (08.05.2013) á Stöð tvö sagði fréttamaður: Hann er ekki að gera neitt rosalega mikið fyrir lúkkið þessi galli … áður talaði fréttamaðurinn um dresskód í svona ferðum Yfirmenn Stöðvar tvö ættu að brýna fyrir sínu fólki að vanda mál sitt. Ekki tala við okkur á hrognamáli. Ef fréttamanninum var mikið í mun að segja okkur að hún kynni svolitla ensku, hefði hún átt að tala ensku. Ekki hræring.

Sigurgeir skrifaði (08.05.2013): ,,Í Viðskiptablaðinu frá 2. maí sl. rakst ég á heilsíðuauglýsingu frá Lean Island 2013. Þar stóð m.a.: Daniel T. Jones er einn helsti sérfræðingur heims í Lean stjórnun en hann er m.a. höfundur metsölubókarinnar sem kynnti heiminn fyrir Lean stjórnun, Lean Thinking: Banish Waste.
Ekki ónýt kynning þar á ferð.” Þakka bréfið. Kannski hefði verið betra að hafa auglýsinguna á ensku. Hræringur er yfirleitt verri en hafragrautur eða skyr..

Soldið svona skerí (e. scary), sagði fréttamaður Ríkissjónvarps sem ræddi við grunnskólanema um stuttmynd sem þeir höfðu gert(08.05.2013) . Brýnir ekki fréttastjóri Ríkisútvarpsins fyrir sínu fólki að vanda mál sitt? Þetta var ekki boðlegt orðalag. Hvar er nú málfarsráðunautur?

Smáforrit eða app Moggans til að lesa blaðið á spjaldtölvu er viðmótsvænt og gott. Mogginn hefur oft verið í fararbroddi með netnýjungar enda Moggavefurinn vinsæll eftir því.

Með því kjánalegra sem lengi hefur heyrst eru tilmæli ISAVIA um að fólk og fjölmiðlar hætti að tala um Leifsstöð á Keflavíkurflugvelli vegna þess að einhver maður fyrir vestan segist eiga réttinn á heitinu Leifsstöð. Ekki skal það dregið í efa. Okkur er bent á að kalla flugstöðina Flugstöð Eiríkssonar eða FLE ! Þetta er út í hött. Fólk og fjölmiðlar munu halda áfram að kalla flugstöðina Leifsstöð. Hvað sem hver segir. Þessu fá engin ISAVIA tilmæli stýrt eða stjórnað. Heldur ekki maðurinn fyrir vestan.

Molaskrifara varð það á á dögunum að skrifa: Lái mér hver sem er. Málglöggur maður benti á að þetta ætti eftir málvenju að vera: Lái mér hver sem vill. Það er hárrétt.

Fyrirvari: Athugasemdir frá öðrum á þessari síðu eru á þeirra ábyrgð. Síðuskrifari áskilur sér rétt til að fjarlægja dónaleg eða meiðandi ummæli, nafnlausar athugasemdir eða athugasemdir undir dulnefni. Lesendabréf eru vel þegin. Bréfritarar eru beðnir að taka fram hvort birta má bréf, eða ábendingar þeirra, undir nafni. – ESG

Lesa meira »]]> Gunnar skrifar: ,,Það hefur tíðkast um alllangt skeið að tilkynna um færð og ástand vega í útvarpinu, m.a. á Rás 2. Nú hafa þeir kjánarnir í Virkum morgnum, Andri Freyr og Sólmundur (Gunna Dís er í leyfi) tekið upp á því að syngja (eða gaula) við undirleik þennan viðvörunar- og upplýsingatexta. Fyrir vikið verður þetta að óskiljanlegu þrugli sem er umhugsunarvert, því þetta flokkast jú undir öryggisatriði fyrir þá sem eru á ferðinni, t.d. um misfæra fjallvegi og gæti hugsanlega haft alvarlegar afleiðingar í för. Þetta má t.d. heyra hér: http://www.ruv.is/sarpurinn/virkir-morgnar/06052013-0 á stillingunni: 148:45. Er virkilega enginn yfirmaður Ríkisútvarpsins sem hlustar á þessa vitleysu? Nei, þeir hafa greinilega gefist upp á ruglinu og stillt á Rás 1 … nú eða á Bylgjuna(!)”
Kærar þakkir fyrir þetta , Gunnar. Það er ekki ofsögum sagt af fíflaganginum sem dagskrárstjórar láta viðgangast í þessum þætti Rásar tvö. Ríkisútvarpið finnur sífellt nýjar leiðir til að sinna öryggishlutverki sínu!

Glöggur lesandi og vinur Mola sendi þetta: „Konunum hafði verið saknað í áratug.“ varð að senda þér þetta, var á forsíðu ruv.is hér snemma morguns…- Molaskrifari þakkar sendinguna. Enn ein sönnun þess að ekki er lesið yfir það sem fákunnandi skrifa og setja á skjáinn. Skylt er að geta þess að þetta var lagfært nokkru síðar.

Lesandi bendir á eftirfarandi frétt á mbl.is: http://www.mbl.is/frettir/kosning/2013/05/06/flestir_strikudu_yfir_nafn_bjarna/
Hann spyr: „Hverjir kusu D-listann? Af kjósendum hans í SV kjördæmi strikuðu 4,73% yfir nafn formannsins, en fréttamaðurinn veit, að í þeim hópi voru flestir stuðningsmenn flokksins. “

Hvað eru neikvæðir hvatar sem formaður Framsóknarflokksins talaði um í fréttum Ríkissjónvarps á þriðjudagskvöld (07.05.2013) ? Rugl.

Það getur verið gaman að íþróttafréttamönnum. Í fréttum Ríkissjónvarps (07.05.2013) sagði íþróttafréttamaður: Í Amsterdam var gríðarlegur fjöldi fólks mættur til að fagna 32. deildarsigri Kolbeins Sigþórssonar og félagið ( svo!) Ajax. Það er svolítið barnalegt hvernig sumir íþróttafréttamenn láta með íslenska atvinnumenn sem keppa með erlendum liðum.

Einn af fréttaþulum Stöðvar tvö hefur það fyrir sið að skipa áhorfendum fyrir verkum. Þegar komið er að íþróttafréttum segir þessi þulur: Farið ekki langt. Molaskrifara finnst þetta óþörf og heldur hvimleið afskiptasemi. Aðrir þulir gera þetta ekki. Þetta er ærið tilefni til að slökkva á Stöð tvö.

Í Morgunblaðinu (09.05.2013) stendur: … blekkt stjórnina og fyrirtækjaskrá til að fá sínu fram. Molaskrifari er á því að eðlilegra hefði verið að segja annað hvort, – til að fá sitt fram eða til að ná sínu fram.

Í annars ágætum morgunþætti á Rás tvö að morgni uppstigningardags (09.05.2013) sem Molaskrifari heyrði slitrur úr talaði umsjónarmaður um sixties, seventies og nineties. Ríkisútvarpið á ekki að hjálpa til við að festa þessar enskuslettur í sessi. Þessi þáttur var annars fín tilbreyting frá ruglinu sem viðgengst í Virkum morgnum flesta daga vikunnar á Rás tvö. Og svo var ekki amalegt að hlusta á Víking Heiðar velja píanótónlist og fræða okkur á Rás eitt á þessum fallega morgni (Aristókrata liggur aldrei á). Og ekki sveik Litla flugan hennar Lönu Kolbrúnar. Ekki frekar en venjulega. Takk. Þá nefnir Molaskrifari þáttinn Himnaför heilagra mæðgina fyrr um morguninn á Rás eitt, vandaður og vel unninn þáttur , en eiginlega frekar handrit að sjónvarpsþætti en útvarpsefni. Engu að síður mjög áheyrilegt. Endurtekinn frá árinu 2007. Kvölddagskráin á uppstigningardag byggðist til að mestu á endurteknu efni. Margt af því besta á Rás eitt er endurtekið efni. Hvernig skyldi standa á því?

Molaskrifari heyrði ekki betur en talað væri um hrossahjörð í seinni fréttum Ríkissjónvarps (07.05.2013). Ef til vill hefði verið eðlilega að tala um hrossahóp eða stóð. Hrossahjörð hljómar dálítið útlenskulega.

Í fréttum Ríkissjónvarps (08.05.2013) var talað um stuttmynd sem hefði sigrað yngri flokk. Þetta með að sigra , vinna sigur virðist erfitt. Hvar er málfarsráðunautur?

Hún er ekki upp á marga fiska kvikmyndin sem Ríkissjónvarpið býður okkur að sjá í kvöld, Bounce. Samkvæmt einkunnagjöf IMDb (International Movie Database) fær hún 5,5. Dagskrárstjórar í Efstaleiti hafa sérstakt lag á að velja rusl handa sjónvarpshorfendum á föstudagskvöldum. Halda sennilega að þeir séu ráðnir til þess.

Fyrirvari: Athugasemdir frá öðrum á þessari síðu eru á þeirra ábyrgð. Síðuskrifari áskilur sér rétt til að fjarlægja dónaleg eða meiðandi ummæli, nafnlausar athugasemdir eða athugasemdir undir dulnefni. Lesendabréf eru vel þegin. Bréfritarar eru beðnir að taka fram hvort birta má bréf, eða ábendingar þeirra, undir nafni. – ESG

Lesa meira »]]> Stundum rugla menn saman orðtökum. Í kvöldfréttum Ríkisútvarps (05.05.2013) var sagt: .. að öðrum kosti gætu öfgamenn í hópi uppreisnarmanna náð undirhöndinni. Hér er orðtakabrengl á ferð á ferðinni. Ruglað er saman að ná yfirhöndinni og að hafa undirtökin, – ráða ferðinni, vera í betri stöðu en andstæðingurinn eða keppinauturinn.

Í fréttum Stöðvar tvö (05.05.2013) var talað um þungar loftárásir. Sennilega þýtt hrátt úr ensku eins og svo margt. Þetta voru harðar loftárásir,hefði Molaskrifari sagt.

Á skjáskilti við upphaf frétta í Ríkisjónvarpi á mánudagskvöld (06.05.2013) var okkur sagt frá 600 milljóna tjóni vegna þjófnaða í IKEA. Í fréttinni kom fram að tjónið væri áætlað 4-5 milljónir. Engin afsökun, engin leiðrétting, engin skýring. Ekki gott.

Eru að renna upp breyttir tímar á Moggans? Sjálfstæðisflokkurinn er á leið í ríkisstjórn. Á forsíðu blaðsins (06.05.2013) er fjögurra dálka fyrirsögn: Borga ekkert og búa frítt. Þar segir að dæmi séu um að þeir sem skuldi íbúðalán misnoti kerfið, borgi ekkert, þótt þeir gætu. Dæmigert kerfissvindl þar sem gert er út á skuldavanda heimilanna. Sennilega hefði Mogginn ekki birt þessa frétt rétt fyrir kosningar. Eða hvað halda menn?

Tískuorð skjóta upp kollinum, lifa um hríð og falla svo í skuggann. Um þessar mundir ofnota margir orðið algjörlega. Það er tískuorð þessa dagana. Algengt er að þegar varpað er fram spurningu sé svarað : Algjörlega, – og svo komi skýring. Takið eftir þessu, lesendur góðir.

Fínt Kastljós í gærkveldi (07.05.2013). Fróðlegt viðtal við Hilmar Veigar Pétursson framkvæmdastjóra um afrek CCP. Man þegar Hilmar og þeir félagar komu til Kína að kynna leikinn. Kínverjar voru alveg með á nótunum. Ekki var síðri kaflinn um Víking Heiðar og flygilinn í Hannesarholti. Magnað að koma í þetta gamla hús og upplifa þá alúð sem lögð hefur verið í endurbætur þar. Molaskrifari mælir með kaffiferð í Hannesarhús.

Umsjónarmenn Landans í Ríkissjónvarpinu eru oft ótrúlega naskir að finna áhugavert efni víðsvegar um land. Með því bitastæðara þar á bæ, þar sem ekki er lengur um auðugan garð að gresja. Í lok þáttanna er okkur alltaf sagt að fréttastjórinn sé framkvæmdastjóri Landans. Hvað þýðir það? Hefur hann ekki nóg með fréttirnar?

Í Molum nýlega (1197) var vikið að rangri notkun sagnarinnar að versla. Þetta verður æ algengara. Til dæmis í DV 6.-7. 05.2013. Jón er í gögnum málsins sagður versla mikið af mat ….Jón kaupir mikið af mat, og Bjarni verslar ýmsar smávörur … Bjarni kaupir ýmsar smávörur. Sumum blaðamönnum virðist það ofraun að skila muninn á sögnunum að kaupa og versla. Ritstjóri á að benda starfsmönnum á villur á þessu tagi. Hvimleitt að sjá þetta æ ofan í æ.

Í fréttum Stöðvar tvö (06.05.2013) var talað um aðfarabeiðni. Hefði átt að vera aðfararbeiðni. Í blaði nýlega ( man ekki hvar) var talað um aðfararnótt. Hefði átt að vera aðfaranótt. Þetta eiga þokkalega góðir blaðamenn að kunna.

Í frétt á Stöð tvö um frístundafjárbúskap í Grindavík (06.05.2013) sagði fréttamaður að viðmælendur hennar hefðu verið með 54 rollur á húsi í vetur ! Voru þetta ekki ær?

Hvað kostar Evróvisjón-ævintýri Ríkissjónvarpsins?

Næstu Molar birtast á föstudag.

Fyrirvari: Athugasemdir frá öðrum á þessari síðu eru á þeirra ábyrgð. Síðuskrifari áskilur sér rétt til að fjarlægja dónaleg eða meiðandi ummæli, nafnlausar athugasemdir eða athugasemdir undir dulnefni. Lesendabréf eru vel þegin. Bréfritarar eru beðnir að taka fram hvort birta má bréf, eða ábendingar þeirra, undir nafni. – ESG

Lesa meira »]]> Til hvers er Ríkissjónvarpið með sérstaka íþróttarás, ef íþróttadeildinni líðst aftur og aftur að ryðjast inn í aðaldagskrá og riðla henni eins og gerðist í gærkveldi (06.05.2013)? Dagskrá seinkaði um tæplega 15 mínútur. Ekki kom nein afsökun frá niðursoðnu konuröddinni sem kynnir dagskrána. Ekki frekar en venjulega. Ríkissjónvarpið heldur áfram að sýna okkur ókurteisi.
Þorgils Hlynur Þorbergsson skrifar (05.05.2013): Sæll Eiður. Það er tvennt sem mig langar til að vekja athygli á:
Annars vegar býr Árni Johnsen við Rituhóla — varla býr hann á götunni. Heimili hans stendur á lóðinni en við götuna. Ef húsnúmer fylgir vandist ég því að sagt væri: Á. J. býr að Rituhólum x.
Hins vegar sá ég í netmiðlinum ruv.is fyrirsögnina: Dagur naktra garðyrkjumanna, sem var víst haldinn nýverið. Er ekki réttara að segja: Dagur nakinna garðyrkjumanna. Maðurinn er nakinn — konan er nakin. Hann er ekki naktur og hún er ekki nökt. Þó svo að þeir séu naktir og þær naktar eru börnin ekki nökt, heldur nakin. Af þeim sökum hlýtur nakinna að teljast réttara mál en naktra. Hvað segir Molaskrifari um þetta?
Molaskrifari sér svo sem ekkert athugavert við að segja að einhver búi í Rituhólum x , ekki frekar en einhver búi í Barmahlíð. Ég átti lengi heima á Skeggjagötu. Réttara að tala um dag nakinna garðyrkjumanna að mati Molaskrifara . Sjá annars beygingu orðsins nakinn hér: http://bin.arnastofnun.is/leit.php?q=nakinn

Trausti Harðarson bendir á eftirfarandi frétt (04.05.2013): http://www.mbl.is/frettir/innlent/2013/05/04/redst_a_leigubilstjora/
Hann segir:,, Það er vont, þegar hugur og hönd eru ekki samstíga. Enn verra þó ef höndin stýrir huganum. Hvað hér hefur verið hugsað, er ekki vel gott að segja, en mér sýnist að höndin hafi orðið huganum yfirsterkari.” Molaskrifari þakkar sendinguna.
Úr fréttum Ríkisútvarpsins (06.05.2013): „Stólar, sem aldrei höfðu verið keyptir, var skilað…“ Sigurður G. Tómasson nefndi þetta á fésbók og spurði hvort fallbeygingar væru gleymdar í Efstaleiti. Ekki nema von að spurt sé.
Enn ruglast menn á húsum og heimilum. Í morgunfréttum Ríkisútvarps (04.05.2013) var talað um að rýma heimili. Eðlilegra hefði verið að tala um að rýma hús eða íbúðarhúsnæði. Enn var talað um að rýma heimili í sjónvarpsfréttum að kveldi sama dags. Málfarsráðunautur ætti að skýra þetta fyrir sumum fréttamönnum.

Af dv.is (03.05.2015) …en þar lýsir Greta Mjöll ástandinu í borginni eftir sprengjurnar. Ekki mjög vel að orði komist. Eftir að sprengjur sprungu við marklínuna í Boston maraþonhlaupinu.

Í kvöldfréttum Ríkisútvarps (04.05.2013) var talað um bíla sem rákust á á Akureyri. Betra hefði verið að tala um bíla sem rákust saman.

Í skjáauglýsingu í Ríkissjónvarpi (04.05.2013) var auglýstur Vinsældarlisti Rásar tvö. Vinsældarlisti? Ef málfarsráðunautur starfar enn við Ríkisútvarpið ætti hann að lesa svona texta yfir áður en þeir fara á skjáinn.

Í fréttum Stöðvar tvö (04.05.2013) um skemmdir af völdum ágangs á Þingvöllum var talað um tjón sem hefði myndast. Ekki vel orðað. Tjón verður, það myndast ekki.

Fyrirvari: Athugasemdir frá öðrum á þessari síðu eru á þeirra ábyrgð. Síðuskrifari áskilur sér rétt til að fjarlægja dónaleg eða meiðandi ummæli, nafnlausar athugasemdir eða athugasemdir undir dulnefni. Lesendabréf eru vel þegin. Bréfritarar eru beðnir að taka fram hvort birta má bréf, eða ábendingar þeirra, undir nafni. – ESG