Skrifað og skrafað

Molar um málfar og miðla 847

Eiður — Tue, 21 Feb 2012 17:55:19 +0000

Gott var að heyra réttilega talað um þrenn verðlaun í morgunfréttum Ríkisútvarps á sunnudagsmorgni (19.02.2012) þegar sagt var frá verðlaunaveitingum á kvikmyndahátíð. Það er hinsvegar óþarfi að tala um kvikmynd sem svokallað docudrama, – myndin er leikin heimildamynd.

Skrifað er á pressan.is (18.02.2012): Ekki eru þó allir sáttir, en einn skóli hefur gengið svo langt að banna börnum að borða nesti sem ekki mæta ákveðnum stöðlum. Nesti er eintöluorð. Ekki til í fleirtölu. Þessvegna er ekki hægt að um mörg nesti.

Í Sunnudagsmogga (19.02.2012) er opnuauglýsing þar sem segir: Viðtal við Egill Arnar Birgisson… Auglýsingahöfundar ættu að láta prófarkalesa það sem þeir láta frá sér fara. Auglýsingar með málvillum vekja ævinlega vantrú og tortryggni hjá Molaskrifara.

Nýlega var í útvarpsfréttum talað um Norsku tölfræðistofnunina. Þar var væntanlega átt við norsku Hagstofuna sem á norsku heitir Statistisk sentralbyrå. Eitthvað var það málum blandið þegar í fréttum Ríkisútvarps (19.02.2012) var fjallað um strand ítalska skemmtiferðaskipsins Costa Concorida og talað um innsiglingu. Innsigling kom ekkert við sögu. Skipið steytti á skeri þegar siglt var of nærri landi á leið framhjá eyjunni Giglio . Í fréttinni var einnig sagt að skipstjórinn hefði staðið sig illa við strandið. Molaskrifari hefði ekki tekið þannig til orða.

Formaður Hagsmunasamtaka heimilann ruglaði saman hugtökunum , heimili og hús (íbúð, fasteign) í Silfri Egils (19.02.2012). Það er hægt að veðsetja hús. Það er ekki hægt að veðsetja heimili. Þessi kona, formaður Hagsmunasamtaka heimilanna er Molaskrifara minnisstæð fyrir það hve einlæglega hún gladdist yfir því að ráðist skyldi á Alþingismenn við setningu Alþingis 1. október síðastliðinn. Það gerði hún í beinni útsendingu Ríkissjónvarpsins. Formaðurinn er nú daglegur gestur í fréttatímum fjölmiðla. Aldrei er þó um það fjallað hverskonar samtök þetta eru, hvað þau eru fjölmenn, hvenær og hvernig stjórn þeirra var kjörin. – Undarlegt var að heyra Baldur Óskarsson segja í Silfrinu að þjóðin þurfi Ólaf Ragnar áfram á Bessastöðum svo hann geti skipt sér af kvótamálum , stjórnarskrármálum og aðildarumsókn okkar að Evrópusambandinu. Baldur má þó eiga það að hann kom grímulaust fram fyrir hönd Ólafs Ragnars Grímssonar.

Fyrirvari: Athugasemdir frá öðrum á þessari síðu eru á þeirra ábyrgð. Síðuskrifari áskilur sér rétt til fjarlægja dónaleg eða meiðandi ummæli, nafnlausar athugasemdir eða athugasemdir undir dulnefni. – . ESG

Molar um málfar og miðla 846

Eiður — Mon, 20 Feb 2012 09:20:11 +0000

Það þóttu talsverð tíðindi þegar ákveðið var í Bretlandi að svipta fyrrverandi aðalbankastjóra Royal Bank of Scotland aðalstign fyrir skömmu. Hann hafði verið aðlaður fyrir störf sín að bankamálum þegar bankabólan blés sem mest út. Hún sprakk og breska ríkið þurfti að leggja bankanum til milljarða sterlingspunda. Það er kannski ekki rétt að líkja íslensku fálkaorðunni við aðalstign. En fjölmargir útrásarvíkingar sem seinna reyndust ótíndir bankabófar og fjárglæframenn fengu fálkaorðuna þegar meðvirkni forseta Íslands var í hámarki og þessir menn voru tíðastir gestir í kvöldverðarboðum forsetahjónanna á Bessatöðum. Þegar fálkaorðan og bankabófarnir áttu í hlut var forsetinn eins og barn með brjóstsykurspoka. Fálkaorðunni var dreift , vinstri hægri eins og segir í sjónvarpsauglýsingunni.
Hvernig væri nú að þessir menn sem komu þjóðinni næstum á vonarvöl yrðu látnir skila orðunni? Þeir eiga ekki að fá að spóka sig með fálkaorðuna hvorki erlendis né hérlendis. Þannig verðum við að athægi. Það að veita þeim fálkaorðuna er þegar búið að gengisfella þetta heiðursmerki íslensku þjóðarinnar. Orðunefnd á að taka á sig rögg og krefjast þess að forseti Íslands láti þessa menn skila íslensku fálkaorðunni. Þeir áttu hana aldrei skilið. Þetta var allt misskilingur hins meðvirka meðreiðarsveins.

Í Ríkisæútvarpinu (18.02.2012) var talað um um … aðalhlutverkið í leikriti Strindbergs Faðirinn. Hér hefði Að mat Molaskrifara átt að segja: … aðalhlutverkið í leikriti Strindbergs Föðurnum. Sama dag var í fréttum talað um að fremja sjálfsmorðstilræði. Var átt við að fremja sjálfsmorð og bana fleirum í leiðinni? Ekki alveg skýrt.

Að vinum er ég ríkur, er haft eftir afmælisbarni í Morgunblaðsinu (17.02.2012). Molaskrifari hallast að því að þarna hefði afmælisbarnið átt að segja: Af vinum er ég ríkur.

Í fréttum hefur talsvert verið fjallað um yfirvofandi eða væntanlegan brottrekstur forstjóra Fjármálaeftirlitsins vegna upplýsinga sem hann er sagður hafa látið undir höfuð leggjast að gefa árið 2001 eða fyrir ellefu árum. Það orkar tvímælis og er mjög huglægt mat þegar Fréttastofa Ríkisútvarpsins ítrekað talar um að það sem gerðist fyrir ellefu árum hafi gerst fyrir fáeinum árum. Í huga Molaskrifara eru ellefu ár ekki fáein ár. Þrjú eða fjögur ár væru fáein ár.

Molar um málfar og miðla 845

Eiður — Sat, 18 Feb 2012 19:54:48 +0000

Í morgunþætti Rásar tvö (17.02.2012) var talað um greiðslugetu bróðursins. Þetta grunnatriði málfræðinnar er kennt í grunnskólum landsins, – skyldi maður ætla. Í þessum sama þætti voru enskusletturnar á sínum stað hjá hinum sérstaka slúðurfregnritara Ríkisútvarpsins á Kyrrahafsströnd Bandaríkjanna sem talaði um dinner þar sem diskurinn kostaði 38 þúsund dollara.

Sá prýðilegi fréttaþulur/maður Broddi Broddason má til með að venja sig af þeim ósið að gefa okkur til kynna með raddblæ hvað honum finnst um tölur í fréttum sem hann les. Okkur kemur nákvæmlega ekkert við hvaða skoðun fréttaþulur hefur á tölunum sem hann les. Hann á að halda þeirri skoðun fyrir sig.

Nokkur umræða hefur orðið í fjölmiðlum um atkvæðagreiðslu við samþykkt frumvarpsins sem Hæstiréttur fjallaði um í vikunni. Við atkvæðagreiðslu eiga menn þrjá kosti. Með, móti, greiða ekki atkvæði eða sitja hjá eins og sagt er. Fjölmiðlar hafa greint frá því að hinn nýbakaði flokksforingi Lilja Mósesdóttir hafi hinsvegar valið fjórða kostinn. Hún hljóp úr þingsal meðan atkvæðagreiðslan fór fram. Heitir það ekki pólitískur heigulsháttur, ef satt er ?

Í Fréttablaðinu segir (17.02.2012): Kvikmyndaskóli Íslands verður í vor vígður inn í alþjóðasamtök helstu kvikmyndaskóla heimsins Cilect. Kvikmyndaskólinn fær aðild að alþjóðlegum samtökum. Hann verður ekki vígður inn í eitt eða neitt. Fáránlegt er að tala um vígslu í þessu sambandi.

Í fréttum Ríkisútvarpsins klukkan 1400 (17.02.2012) var sagt frá nýjum stúdentagörðum sem rísa munu skammt frá Háskóla Íslands á gatnamótum þar sem mætast Oddagata, Sturlugata og Sæmundargata. Þar verða stúdentagarðarnir staðsettir eins og fréttamaður komst að orði. Þarna hefði, eins og nær ævinlega, verið betra að sleppa orðinu staðsettir.

Áskell sendi Molum eftirfarandi (17.02.2012): Eftirfarandi orð var að finna í bréfi frá lögfræðingi: greiðsluaðlögunarumleitanir . Þetta minnir ögn á Vaðlaheiðarvegamannaverkfærahurðargeysmsluskúrslykil …. Satt segirðu !

Molaskrifara varð það á að hlusta svolítið á Útvarp Sögu á föstudagsmorgni. Hvað eftir annað var því logið að hlustendum að þrotabú Landsbankans hefði lánað kaupendum Iceland matvörukeðjunnar í Bretlandi 300 milljarða ! Hrein ósannindi. Í fréttum hefur margsinnis komið fram að að til stendur að þrotabúið láni fimmtung verðsins til kaupanna eða 50 milljarða. Trúið varlega því sem hið heyrið í þessum fjölmiðli. – Þangað hringdi maður þennan morgun til að bjóða fram aðstoð sína til að skrá fólk á undirskriftalista um að skora á Ólaf Ragnar að bjóða sig fram aftur. Hringja bara í Jón Val í síma 616 9070 og hann skráir hvern sem er. Undirskriftasöfnunni er lokið. Samt er undirskriftasöfnuninni ekki lokið. Endalaust rugl undir forystu gamalla stjórnmálamanna , Útvarps Sögu og forstjóra Fjölskylduhjálpar Íslands.

Molar um málfar og miðla 844

Eiður — Fri, 17 Feb 2012 17:42:51 +0000

Ummæli Jóns Sigurðssonar forstjóra Össurar um íslensku krónuna á Viðskiptaþingi hafa vakið verðskuldaða athygli, enda stórfrétt. Jón Sigurðsson hefur stýrt þessu glæsilega og öfluga fyrirtæki af snilld. Jón sagði efnislega : Íslenskan krónan er ónýtur gjaldmiðill. Hún er fíllinn í stofunni. Við eigum að taka upp evru og ganga í Evrópusambandið. Þeir sem vilja það ekki skulda okkur skýringu á afstöðu sinni Vissulega fréttnæm ummæli. Í Viðskiptablaði Morgunblaðsins (16.02.2012) er viðtal við Jón í tilefni af ræðu hans. Fimm dálka fyrirsögnin er um að óvild mæti erlendum viðskiptamönnum á Íslandi! Ónýt krónan er í undirfyrirsögn með smáu letri. Þetta segir okkur lesendum margt um það hvernig fréttamati Morgunblaðsins er stýrt. Í sama Morgunblaði er grein eftir Ragnar Arnalds fyrrum formann Alþýðubandalagsins og fjármálaráðherra. Ragnar segir: ,,Áróðurinn fyrir upptöku evru er af pólitískum rótum runninn, jafnt hér á landi sem á meginlandinu og byggist ekki á hagfræðilegum rökum”. Er þá forstjóri Össurar kominn út í pólitík? Ég held ekki. Ég velkist hinsvegar ekki í vafa um það hvor sé marktækari þegar rætt er um gengi og gjaldmiðilsmál, forstjóri Össurar eða fyrrverandi formaður Alþýðubandalagsins.

Algenga villu mátti heyra í fréttum Stöðvar tvö á miðvikudagskvöld (15.02.2012). Þar var sagt: … eins og sést á myndbandinu var engu til sparað. Hér hefði verið rétt að segja: Var ekkert til sparað. Ekki horft í kostnaðinn. Hinsvegar er sagt: Var engu til kostað, ekki lagt í neinn kostnað. Í sama fréttatíma var sagt um dóm Hæstaráttar: … verður að endurreikna öll gengistryggð lán aftur. Hér hefði nægt að tala um að endurreikna öll gengistryggð lán. Nema búið hafi verið að endurreikna lánin áður. Í fréttum Ríkissjónvarps var réttilega talað um að reikna þurfi lánin upp á nýtt.

Fréttavefurinn visir.s segir frá jarðarför söngkonunnar Whitney Houston. Bæði í fyrirsögnum og texta er talað um jarðaför: ..að ekki sé óskað eftir veru hans við jarðaför söngkonunnar. Útför, jarðsetning heitir jarðarför. Með erri. Hjá grönnum okkar í Færeyjum heitir jarðarför jarðarferð.

Lesandi sendi Molum línu (15.02.2012) og segir: ,,Mig langar að vekja athygli þína á einstaklega illa skrifaðri og óskiljanlegri frétt á mbl.is.

http://mbl.is/frettir/innlent/2012/02/14/ein_skammvin_stroka_inn_a_kynfaeri/ Molaskrifari undrast reyndar þennan ítarlega fréttaflutning, sem næstum má kalla smjatt.

Fréttavefurinn visir.is segir frá innbroti í Ljósmyndaskóla /16.02.2012): Tjónið er á milljónum króna. Hér hefði átt að segja til dæmis: Tjónið nemur milljónum króna.

Mbl.is skýrir frá því að hestamenn hyggist mótmæla hækkun fasteignagjalda á hesthúsum. Þar segir /16.02.2012): Hefur meðal annars komið til umræðu að efna til hópreiðar eftir Miklubraut og Hringbraut og niður að Alþingi. Það myndi augljóslega hafa mikil áhrif á umferðina ef 300 til 500 knapar færu fetið á hestum sínum á miklum álagstíma. Hér er fréttin: http://www.mbl.is/frettir/innlent/2012/02/16/hestamenn_aforma_motmaelareid/.

Nú er spurt: Hversvegna vilja hestamenn hefna sín á saklausum borgurum og trufla þá við að komast leiðar sinnar, – fólki sem ekkert hefur með álagningu fasteignagjalda að gera? Valda umferðartöfum sem geta gert lögreglu, slökkviliði og sjúkrabílum erfitt fyrir að komast leiðar sinnar ? Ekki verður annað sagt en að þetta sé hreint ótrúlega heimskuleg hugmynd. Hestamenn eru hér á villigötum.

Molar um málfar og miðla 843

Eiður — Thu, 16 Feb 2012 15:36:48 +0000

Molalesandi sendi eftirfarandi úr mbl.is (14.02.2012): ,,Á mbl.is er fjallað um orðaskipti Steingríms J. og Sigmundar Davíðs. Þar er klaufalega komist að orði í niðurlangi stuttrar fréttar. Þar segir: ,,Hann segir að ekki hafi verið ætlunin að ummælin heyrðust í hljóðritun eða kæmust í fjölmiðla.“ Betra hefði verið að segja: Hann segir að hvorki hafi verið ætlunin að ummælin heyrðust í hljóðritun né þau kæmust í fjölmiðla.” .

Jóns Þórarinssonar tónskálds og fyrrum dagskrárstjóra í Ríkissjónvarpinu var fallega minnst í Kastljósi (15.02.2012) svo sem verðugt var. Egill Eðvarðsson er smekkmaður. Kynnir hefði þó mátt sleppa því að kalla ljóð Halldórs Laxness texta eins og nú er orðið næsta algengt að gera.

Aftur og aftur sér maður leikskólamálið að klessa á þegar bíl er ekið á annan bíl eða eitthvað annað. Þetta er úr dv.is (14.02.2012): Konan sem ók bifreiðinni reyndi að flýja af vettvangi en ekki vildi betur til en svo að hún klessi (klessti) á kyrrstæða bifreið.

Í fjögur fréttum Ríkisútvarpsins (12.02.2012) var sagt frá kjöri nýs formanns sambands ungra framsóknarmanna. Efnislega var sagt að formaðurinn hefði verið kjörinn með 32 atkvæðum eða um helmingi fylgis. Hér hefur líklega verið átt við helming greiddra atkvæði því eins og þetta var orðað er það ekki skiljanlegt. Einhverra hluta vegna er þessi fréttatími ekki aðgengilegur á vef Ríkisútvarpsins. Þegar reynt er að hlusta á hann birtist eftirfarandi á skjánum: ,,Ef til vill er dagskrárliðnum ekki lokið eða þá að upptakan er ekki lengur aðgengileg.” Dagskrárliðnum er löngu lokið og upptakan hefur aldrei verið aðgengileg.

Í kvöldfréttum Ríkissjónvarps (14.02.2012) var fjallað ( enn einu sinni ) um hlutabréfakaup lífeyrissjóðanna og sagt að hlutabréf sem urðu verðlaus eða verðlítil að bréfin hafi orðið að gjalli. Ekki kannast Molaskrifari við þetta orðalag. Hinsvegar er talað um að einhver verði að gjalti , verði orðlaus, fallist hendur gefist upp.

Kristinn H. Gunnarsson fv. alþingismaður skrifaði athyglisverða grein í Morgunblaðið (15.02.2012):Kviksyndi lýðskrumsins tefur endurreisn. Kristinn segir m.a.; Ef ósanngjarnt er að sá greiði sem keypt hefur hús eða önnur lífsgæði og hefur notið þeirra, er þá sanngjarnt að annar greiði sem ekkert hefur fengið af þeim gæðum?Þeim fjölgar sem taka undir þessa firringu og hætta sér út í það kviksyndi sem leiðir af því að skilja í sundur áhættu og ábyrgð svo og ávinning og kostnað. Það flögraði að Molaskrifara hvort kveikjan að grein Kristin hefði verið Silfur Egils sl. sunnudag þar sem Sighvatur Björgvinsson og Guðmundur Gunnarsson með eftirminnilegum hætti afhjúpuðu lýðskrumara (verkalýðsforkólf af Akranesi og varaformann Liljuflokksins) sem velta vilja skuldum yfir almenning. Af hverju eiga sumir að sleppa við að borga 20% af skuldum sínum, ern aðrir ekki? Þeirri spurningu er aldrei svarað. Báðir stóðu skrumararnir halaklipptir eftir.

Í gær (15.02.2012) fékk Molaskrifari stóryrtan tölvupóst og athugasemd við Mola frá Gunnari Þorsteinssyni dagskrárritstjóra Ríkisútvarpsins okkar allra. Hann kallaði Molaskrifara ritsóða með meiru. (Sjá athugasemdir við Mola 842) Það er svo sem í góðu lagi. Gunnar hefur rétt til að hafa hvaða skoðun sem er á Molaskrifara. Það er hans mál. Hann segist hafa skrifað athugasemdina í eigin nafni, ekki í nafni Ríkisútvarpsins. Molaskrifari efast um það. Athugasemdin var send frá netfangi Gunnars hjá Ríkisútvarpinu, um póstþjón þess (gunnar@ruv.is) , nær örugglega úr tölvu í eigu Ríkisútvarpsins og á skrifstofutíma. Ef starfsmenn Ríkisútvarpsins vilja skattyrðast við fólk úti í bæ ættu þeir að minnsta kosti að gera það utan vinnutíma, á eigin tölvu og í eigin tölvupósti.

Molar um málfar og miðla 842

Eiður — Wed, 15 Feb 2012 14:30:50 +0000

Aftur og aftur er í útvarpsfréttum (13.02.2012) talað um að greiða með þegar átt er við að greiða atkvæði með einhverju, styðja eitthvað eða einhvern í atkvæðagreiðslu.. Þetta er eiginlega óskiljanleg villa. Að greiða með er að borga með.

Fleirtöluorð halda áfram að vefjast fyrir fólki . Í ambögupistli sérstaks slúðurfulltrúa Ríkisútvarpsins í Hollywood (13.02.2012) var talað um þrjú eða fjögur verðlaun , átti að vera þrenn eða fern verðlaun. Í DV (13.02.2012) var sagt í undirfyrirsögn að Rick Santorum hefði unnið þrjár forkosningar í röð. Þrennar forkosningar hefði það átt að vera.

Gunnar Þorsteinsson einn rúmlega 300 starfsmanna Ríkisútvarpsins, titlaður dagskrárstjóri sendi Molaskrifara svohljóðandi kveðju (15.02.2012):
Orðið „reytur“ er skrifað með ypsíloni og það er með ólíkindum að virðulegur vandlætari með meiru skuli ekki hafa hugmynd um það. Fáheyrt! Og hefur DV enga sómakennd? Er það hlutverk þess að vera vettvangur slíkra ritsóða? Hneyksli! Skandall! Þetta er réttmæt og um leið kurteisleg ábending hjá dagskrárritstjóra Ríkisútvarpsins, sem hér talar væntanlega fyrir hönd þessarar þjóðarstofnunar. Í Molum var orðið reytur rangt stafsett. Molaskrifari gerði athugasemd við að dagskrárkynnir Ríkisútvarpsins notaði orðsambandbandið að rugla saman reytum um fólk sem spjallaði saman, ekki fólk sem væri að ganga í hjónaband sem er hin venjubundna merking. Það er engu líkara en dagskrárritstjórinn hafi samið textann sem um var rætt, svo illa bregst hann við. Molaskrifari er annars svolítið hissa á orðfærinu sem notað er í orðsendingum til hans úr Efstaleitinu. Hvort sem um yfirmenn eða undirmenn er að ræða.

DV segir (13.02.2012) frá manni sem þarf að skila bíl sem hann keypti fyrir hrun. Hann er í kröggum og getur ekki borgað af bílnum. Fram kemur að þegar hann keypti bílinn var hann að borga af öðrum bíl og fasteignaláni. Samt keypti hann bíl á 4,8 milljónir og tók fyrir honum 100% myntkörfulán. Nú er allt í óefni og hann er sár út í stjórnvöld en segist samt geta kennt sjálfum sér um. Lilja Mósesdóttir og flokkur hennar vilja að almennir skattþegar borgi 20% af lánum þessa manns sem stefndi sér í skuldir um efni fram. Er það sanngjarnt ?

Aðstandendur undirskriftasöfnunar Ólafs Ragnars Grímssonar um að fá að vera áfram á Bessastöðum í fjögur ár til viðbótar segja að söfnunin kosti 600 þúsund krónur og kostnaður deilist á fimmtán manns. Molaskrifari dregur þetta mjög í efa. Líklegt er að kostnaður við síðuhönnun, öflun léns, tæknilega uppsetningu söfnunarsíðunnar sé að minnsta kosti 500 þúsund krónur að mati þeirra sem til slíks þekkja. Eru þá ótaldar stórar daglegar auglýsingar t.d. á mbl.is og sjálfsagt miklu víðar. Þær eru ekki ókeypis eins og auglýsingarnar í Útvarpi Sögu. En auðvitað birta Ólafur Ragnar og aðstandendur síðunnar alla reikninga þegar upp er staðið í krafti gegnsæis og heiðarleika. Talan 600 þúsund er álíka trúleg og það að Ólafur Ragnar hafi ekki verið hafður með í ráðum þegar söfnunin var sett af stað.

Jón sendi Molaskrifara línu (13.02.2012), nefnir Bláan Ópal og spyr: Myndi molaskrifari álíta sem svo að ,,Stattu upp fyrir sjálfum þér“ teldist til góðrar notkunar á íslensku? Svarið er nei, – en Molaskrifari lítur nú eiginlega á þetta sem grínbull.

Á fréttavef Ríkisútvarpsins (13.02.2012) er sagt frá mannlausum bíl sem fannst í Elliðavatni. Á vefnum segir um bílinn: Ekki er vitað hvernig hann hafnaði ofan í vatninu. Eru ekki yfirgnæfandi líkur á bílnum hafi verið ekið út í vatnið, – nema hann hafi svifið í fallhlíf af himnum ofan?

Sjálfsafgreiðsluverð á bensíni kostar nú … var sagt í sexfréttum Ríkisútvarpsins (13.02.2012). Verð kostar ekki. Hér hefði bara átt að segja: Sjálfsafgreiðsluverð á bensíni er nú …

Einkennileg er fælni sumra fréttamanna við að segja í fyrra sumar eða fyrra vetur. Þess í stað er sífellt talað um síðasta sumar og síðasta vetur. Í fréttum Ríkissjónvarps (13.02.2012) var sagt: Síðasta sumar var gerð fyrsta rannsóknin …. Molaskrifari er ósáttur við þetta orðalag sem honum finnst óþarflega enskulegt. Molaskrifari heldur áfram að hamra á þessu.

Fín innslög í Kastljósi Ríkissjónvarpsins (13.02.2012) um líffæragjafir og viðbrögð við hjartastoppi. Sýna ætti þáttinn um hjartastopp árlega. Hið minnsta.

Áskell sendi eftirfarandi (13.02.2012): ,,Fyrr í dag fannst bíll í Vífilsstaðavatni. Frá þessu er sagt á dv.is og meðal annars rætt við mann frá slökkviliðinu. Sá sagði að hans menn hefðu leitað í bílnum sem að sjálfsögðu var „staðsettur“ tíu metra frá bílastæði við Vífilstaðavatn.” Áskell nefnir fleira . Sjúkrabíll hafi verið á staðnum og bíll frá slökkviliðinu. Molaskrifari sér reyndar ekkert athugavert við það. Kafarar frá slökkviliðinu komu á staðinn og fóru að bílnum. Enginn vissi hvort þar væri fólk eður ei. Áskell segir að Ritstjóri dv.is eigi að gera meiri kröfur til þeirra sem starfa hjá miðlinum. – Molaskrifari bætir við, að hann veit að ritstjóri DV vill að blaðamenn hans vandi málfar í fréttaskrifum, en ekki verður við öllu séð á þeim bæ frekar en annarsstaðar.

Molar um málfar og miðla 841

Eiður — Tue, 14 Feb 2012 22:23:31 +0000

Þegar Ögmundur Jónasson ráðherra í ríkisstjórn Íslands skrifar grein í víðlesið blað undir fyrirsögninni Gotcha sem er amerískt slanguryrði, er ástæða til að staldra við. Svo læra börnin málið sem það er fyrir þeim haft. Molaskrifari er á því að þetta sé ráðherranum heldur til minnkunar, en í greininni ber hann það af sér hafa sagt ósatt í sjónvarpsviðtali.

Reyndur fréttaþulur las án þess að hika í kvöldfréttum Ríkisútvarpsins (11.02.2012): Upplýsingar ungrar konu sem sá mann og bíl ….. varð mjög til þess að auðvelda rannsókn málsins. Þrautreyndir þulir mega ekki láta það henda sig að lesa svona ambögu. Hér hefði átt að segja : Upplýsingar ungrar konu… urðu til þess að auðvelda mjög rannsókn málsins. Þetta var leiðrétt í næstu fréttatímum. Þulir sem hlusta ekki á eigin lestur þurf að hugsa sinn gang og bæta um betur.

Jón Þórarinsson tónskáld var einn af máttarstólpum menningarlífs á Íslandi á seinni helmingi liðinnar aldar. Hann var alla ævi nátengdur Ríkisútvarpinu þar sem hann fyrst hóf störf 1938, starfaði seinna á tónlistardeild, var dagskrárstjóri lista- og skemmtideildar Sjónvarpsins og sat í útvarpsráði. Hann var afkastamikið tónskáld, yfirkennari við Tónlistarskólann í Reykjavík um langt árabil. Ritaði bækur og greinar. Skrifaði m.a. ævisögu Sveinbjörns Sveinbjörnssonar og hljómsveitarútsetning þjóðsöngsins er hans verk. Molaskrifara þótti Ríkisútvarpið minnast fráfalls hans með heldur snautlegum hætti. Í átta fréttum (13.02.2012) olli tækniklúður því að fréttinni um lát hans var frestað til seinni frétta. Þá var sagt að Jón hefði meðal annars samið lag við Íslenskt vögguljóð á Hörpu við texta Halldórs Laxness. Hvenær hætta fréttamenn að kalla ljóð höfuðskálda okkar texta ? Minning Jóns Þórarinssonar á betra skilið af hálfu Ríkisútvarpsins. En svona fer þegar þekking á sögunni er hornreka innan menningarstofnana og söguleg vitund á ekki upp á pallborðið. Það er líka til marks um þennan skort á sögulegri vitund að ekki heyrði Molaskrifari (14.02.2012) í upplestri úr dagblöðum né í sjö eða áttafréttum Ríkisútvarpsins minnst á andlát Jónasar H. Haralz, hagfræðings, sem var mikill áhrifamaður í efnahagsmálum á Íslandi um áratugaskeið á síðustu öld. Andláti söngkonunnar Whitney (eða Whitneyjar eins og Ríkisútvarpið segir) Houston hafa hinsvegar verið gerð góð skil í Ríkisútvarpi og sjónvarpi.

Í morgunþætti Sirrýjar á Rás tvö (12.02.2012) var rætt við málfarsráðunaut Ríkisútvarpsins. Ágætisspjall. Málfarsráðunautur hefur verk að vinna. Gæti til dæmis leiðbeint konunni sem kynnir dagskrána í sjónvarpinu um hvernig hún ætti að segja hér á Rúv sem dynur tilgerðarlega í eyrum okkar svona tíu sinnum hvert kvöld. Karlmaður sem kynnir dagskrána stöku sinnum segir hér á Rúv með eðlilegum framburði. Annars á að sleppa þessu hér á Rúv bulli því auðvitað er verið að kynna dagsrá Ríkissjónvarpsins , ekki Stöðvar tvö eða Skjásins. Skammstöfunin RÚV getur átt heima í erlendum samskiptum og á skjánum, en það á ekki að gera orðið Ríkisútvarp útlægt í þessari grónu stofnun eins og greinilega hefur verið gert. Málfarsráðunautur gæti svona í leiðinni gaukað því að konunni að það að rugla saman reitum þýðir ekki að spjalla saman, það þýðir að hefja búskap, hefja sambúð , ganga í hjónaband (12.02.2012).

Í hádegisfréttum Ríkisútvarps (12.02.2012) var sagt frá því að bandaríska söngkonan Whitney Houston hefði fundist látin á hótelherbergi í Los Angeles. Í fréttinni var sagt: Ekki er þó talið að andlátið hafi borið að með voveiflegum hætti. Hér telur Molaskrifari að ekki hefði átt að nota orðið voveiflega. Orðið voveiflega þýðir, skyndilega eða hræðilega eða hörmulega. Hér hefði til dæmis mátt segja: … ekki er talið að andlátið hafi borið að með saknæmum eða grunsamlegum hætti.

Bjarni Sigtryggsson skrifaði á vegg Molaskrifara á fésbókinni: Stöð2 fjallar ítrekað í fréttum um íslenzku konfjúsíusarstofnunina. -
,,Makes me confused.“ Ekki hissa þótt þetta rugli þig í ríminu, Bjarni!

Blár ópal sigraði símakosninguna, sagði í fyrirsögn á dv.is (12.02.2012). Skyldi símakosningin hafa verið erfiður andstæðingur? Sigraði ekki Blár ópal í símakosningunni? Öllu líklegra.

Kreppan og ferðalögin

Eiður — Tue, 14 Feb 2012 14:18:57 +0000

Margir þeirra sem eingöngu lesa leiðara og Staksteina Morgunblaðsins og hlusta á Útvarp Sögu trúa því örugglega staðfastlega að flestar fjölskyldur á Íslandi búi við neyð og hér ríki hungursneyð af völdum illa innrættra stjórnmálamanna, -einkum þeirra sem nú fara með völd. Ekki þeirra sem ollu hruninu. Það á að vera gleymt. Þeir trúa því líka að forstjóri Fjölskylduhjálparinnar brauðfæði hálfa þjóðina og forsetinn á Bessastöðum sé bjargvættur þjóðarinnar, þegar hann drepur hér niður fæti milli þess sem hann situr kóngaveislur í útlöndum og skoðar mörgæsir á Suðurskautslandinu með vini sínum Al Gore. En er þetta svona? Vissulega urðu ýmsir að ósekju illa fyrir barðinu á hruninu, ekki er það dregið í efa eða gert lítið úr því. Fleiri eru þeir þó væntanlega sem ætluðu að græða á lágu gengi , kunnu sér ekki hóf í fjárfestingum hvort sem það voru bílar, Range Roverar, Land Cruiserar eða fjögur hundruð fermetra hallir.
Sumt fólk og sumir fjölmiðlar tala nefnilega þannig að fram að hruninu hafi það verið óþekkt fyrirbæri að einstaklingar Íslandi yrðu gjaldþrota. Líka hafi það verið óþekkt að fólk missti húsnæði vegna skuldaklafa og vanskila. Enginn hafi verið borinn út og húseignir aldrei seldar á nauðungaruppboðum. Því miður var þetta ekki þannig. Fyrir hrunið voru íslenskar fjölskyldur skuldsettastar allra fjölskyldna í OECD ríkjunum. Öll þekkjum við fólk sem verið hefur í fjárhagsvandaræðum löngu, löngu fyrir hrunið. Sumir einstaklingar eru reyndar sífellt í fjárhagsvandræðum. Þannig er það núna og þannig hefur það alltaf verið. Þetta vitum við öll.
Varla er það kreppumerki nú um stundir sem greint er frá á mest lesna fréttavef landsins (14.02.2012), mbl.is. : Tæplega níu af hverjum tíu Íslendingum ferðuðust innanlands í fyrra, sem er svipað og árin á undan. Tæplega tveir þriðju aðspurðra ferðuðust til útlanda á árinu 2011, eða 63,3%, en var 56,3% í sambærilegri könnun fyrir ári síðan. Ekki er að greina miklar breytingar í ferðaáformum fólks fyrir nýbyrjað ár en langflestir hafa ferðalög af einhverju tagi á stefnuskránni.
Því ber að fagna að svo margir hafi getað ferðast hér innanlands og skoðað landið sitt. Líka ber að fagna því að tæplega tveir þriðju þeirra sem spurðir voru höfðu getað brugðið undir sig betri fætinum og farið út fyrir landsteinana.
Líklega ættu þeir sem skrifa leiðara og Staksteina Morgunblaðsins að lesa mbl.is sér til fróðleiks og andlegrar uppbyggingar og hlusta minna á ruglið og rangfærslurnar sem of oft heyrast í Útvarpi Sögu.

Molar um málfar og miðla 840

Eiður — Mon, 13 Feb 2012 16:19:29 +0000

Molaskrifari fékk sér gönguferð á laugardagsmorgni (11.02.2012) og hlustaði á Vikulokaþátt Rásar eitt. Í þátttakendavali hafa umsjónarmenn Vikulokanna gjarnan asklok fyrir himin og eru hreint alveg að drepast úr nýjungagirni. Þátttakendur voru Birgitta Jónsdóttir, Hreyfingin, Sigurður Þ. Ragnarsson, fulltrúi Lilju Mósesdóttur (Samstaða, – eitthvað óljóst hver á mest tilkall til þess nafns) og Guðmundur Steingrímsson frá Bjartri framtíð. Hallgrímur Thorsteinsson sletti á okkur ensku þegar hann sagði : Er þetta ekki bara two point o ? Efast um að allir hlustendur hafi skilið hvað hann átti við. Enskukunnátta á ekki að vera skilyrði þess að geta notið efnis í Ríkisútvarpinu. Þetta voru annars mjög hefðbundnar pólitískar umræður, en umsjónarmaður á ekki að segja okkur hlustendum að Liljuflokkurinn hafi fengið 20 prósent plús fylgi í skoðanakönnun. Bera tölurnar ekki með sér að það voru milli 80 og hundrað manns sem hugsanlega lýstu stuðning við flokkinn? Rúmlega 20% fylgi er bara bull í þessu samhengi. Birgitta Jónsdóttir talaði um gjörvallan þinghóp Hreyfingarinnar! Eru þau ekki þrjú? Rætt var um verðtryggingu sem Hreyfingin og Liljuflokkurinn vilja afnema. Setjum svo að Molaskrifari hefði fengið lánaða 25 lítra af bensíni að verðmæti 5000 krónur hjá Sigurði Þ. Ragnarssyni fulltrúa Liljuflokksins þegar bensínlíterinn kostaði 200 krónur. Væri Sigurður ánægður ef ég borgaði honum nú með 20 lítrum af bensíni sem fást fyrir 5000 krónur þegar verð eins líters er komið upp í 250 krónur? Auðvitað ekki. Um þetta snýst verðtryggingin. Gjalda sömu verðmæti til baka. Guðmundur Steingrímsson var sá eini sem sagði eitthvað vitrænt um verðtrygginguna. Og svona til að undirstrika fjölbreytnina í vali þátttakenda sagði Sigður Þ. Ragnarsson hlustendum að hann yrði í Silfri Egils í Ríkissjónvarpinu daginn eftir. Fáránlegt. Svo vaknar sú spurning í lokin hversvegna er svona þáttur notaður til að auglýsa tónleika sem eru nátengdir einum þátttakenda? Vikulokin eiga ekki að vera auglýsingatími.

Það kemur fyrir að Molaskrifari er svolítið ruglaður í ríminu þegar hann vaknar á morgnana. Þetta var óvenju slæmt að morgni mánudagsins (13.02.2012). Umsjónarmaður Rásar tvö tilkynnti hátíðlega klukkan 0645 að upp væri runninn 15. febrúar. Þegar fréttir hófst klukkan 07 00 sagði fréttamaður okkur að í dag væri 13. febrúar. Það var nær lagi. En að loknum fréttum ítrekaði umsjónarmaður morgunútvarps að í dag væri 15. febrúar. Nú fóru að renna tvær grímur á nývaknaðan Molaskrifara. Greinilega var risin alvarleg deila í Ríkisútvarpinu í Efstaleiti. Það var ekki sami dagur í hljóðstofu Rásar tvö og á fréttastofunni. Sem betur fer var þetta leiðrétt þegar klukkan var farin að halla í hálf átta. Það var 13. febrúar. Molaskrifari var ekkert ruglaður í ríminu eða í rúminu.

Í morgunfréttum Ríkisútvarpsins (06 00 11.02.2012) var sagt: Tillögum Obama er beðið með óþreyju … Hér átti að segja: Tillagna Obama er beðið með óþreyju. Einhvers er beðið. Í þessum sama fréttatíma var sagt: Vefsíða bandarísku leyniþjónustunnar CIA lá niðri í marga klukkutíma … Molaskrifari er ekki sáttur við þetta orðalag. Betra hefði verið að segja að vefsíðan hefði verið óvirk í marga klukkutíma eða að hún hefði lokast vegna árása tölvuþrjóta. Talað er um að leggja niður starfsemi. Og einnig er sagt að starfsemi hafi legið niðri í mörg ár. En þótt eitthvað bili eða verði óvirkt um stundarsakir eins og sími , rafmagn, umferðarljós eða vefsíða í þessu tilviki er hæpið að tala um að það liggi niðri. Og enn var í þessum fréttatíma talað um stjórnarráðið þegar átti að segja stjórnarráðshúsið.

Í framhaldi af stjórnarráðshúsinu: Svo er sagt að þegar Helgi Sæmundsson var ritstjóri Alþýðublaðsins fyrir meira en hálfri öld og Krústjov var upp á sitt besta í Sovétinu hafi nafn hans verið skrifað á þrjá eða fjóra mismunandi vegu í Alþýðublaðinu sama daginn. Helga var nóg boðið og hann tók sig til , gekk milli blaðamanna og setjara með miða með nafni Krústjovs og sagði: ,,Hér eftir verður nafn aðalritarans skrifað svona !” Fréttastjóri Ríkisútvarpsins ætti kannski að beita sömu aðferð til að koma fólki sínu skilning um að stjórnarráðið er eitt , stjórnarráðshúsið annað.

Molar um málfar og miðla 839

Eiður — Sun, 12 Feb 2012 20:30:18 +0000

Í fréttayfirliti Ríkissjónvarps (09.02.2012) var sagt: … segir maður sem vinnur að endurskoðun kerfisins. Fréttin var um það hve flókið kerfi almannatrygginga á Íslandi er orðið. Svo kom fram í fréttinni að maðurinn var Árni Gunnarsson fv. alþingismaður, sem fer fyrir starfshópi sem er að endurskoða lög um almannatryggingar. Auðvitað átti að segja deili á Árna í fréttayfirlitinu, ekki bara að segja, – segir maður sem …. Kannski var það einhver sem lítt þekkti til mála sem samdi yfirlitið.

Tæknilega var útsendingin úr Hörpu á laugardagskvöld (11.02.2012) óaðfinnanleg. Það er tæknilegt afrek að koma svona flókinni útsendingu klakklaust til okkar. Molaskrifari er ekki mikið fyrir formúlutónlist af þessu tagi, en minnir á að hann skrifaði fyrir nokkru eftir að hafa heyrt lagið sem bar sigur úr býtum Mundu eftir mér frumflutt að annaðhvort yrði það lag mjög ofarlega eða neðst! Það er reyndar talsverð hætta á að þetta lag geti orðið í efsta sætinu í Baku. Athyglisvert var hve stór hluti áhorfenda í Hörpu voru börn og unglingar. Svona hefur uppeldshlutverk Ríkissjónvarpsins í tónlistarmálum lukkast vel !!!

Í fréttatímum beggja sjónvarpsstöðva (10.02.2012) var ítrekað talað um kynferðismök. Nægt hefði að tala um kynmök. Svo er auðvitað mikið álitamál hvaða erindi nákvæmar lýsingar á kynmökum eiga í fréttatíma yfirleitt. Þar fannst Molaskrifara of langt gengið. Það er engin þörf á að lýsa þessu í smáatriðum. Nóg er samt.

Svo skal hér enn einu sinni minnt á muninn á stjórnarráðinu og stjórnarráðshúsinu, en sumir fréttamenn eiga ákaflega erfitt með að átta sig á þessu. Í fréttum Ríkissjónvarps (10.02.2012) var talað um sprengjuna við stjórnarráðið. Fréttaþulur hafði þetta hinsvegar rétt í yfirliti í fréttalok. Hann talaði um sprengjuna við stjórnarráðshúsið. Stjórnarráðið er samheiti yfir öll ráðuneytin. Stjórnarráðshúsið er hvíta húsið frá átjándu öld sem stendur austan við Lækjartorg. Þar er forsætisráðuneytið til húsa og þar fundar ríkisstjórnin. Fréttamanni tókst einnig að fara rangt með þetta í tíu fréttum Ríkisútvarpsins. Í fréttum Stöðvar tvö (11.02.2012) var svo allt einu farið að tala um húsið sem stjórnarráð Íslands! Þetta er endurtekið hér í þeirri trú að um síðir holi dropinn steininn.

Sjálfsagt er og eðlilegt að ræða við lífeyrisþega um skerðingu lífeyris. Það orkaði hinsvegar tvímælis hvernig það var gert í Kastljósi (10.02.2012). Þá var rætt um skerðingu lífeyris við vistmenn á elliheimili. Ræða hefði átt við fólk sem ekki dvaldi á stofnun því aðstæður þess eru allt aðar vistmanna. Svo er það ekki fagmannlega orðað, þegar efnislega er spurt: Nú er búið að skerða lífeyrinn þinn. Finnst þér það sanngjarnt? Þeir sem svona spyrja þurfa að lesa upp og læra betur.

Getur einhver fróður lesandi upplýst Molaskrifara um hvað það þýðir þegar Ríkissjónvarpið sýnir okkur kvikmyndir í samstarfi við tilteknar bifreiðategundir? Í hverju felst þetta samstarf ? Molaskrifari áttar sig ekki á þessu.

Molaskrifari nefndi í síðasta pistli að fréttalestur væri líklega svolítil búbót fyrir útvarpsstjóra. Nú veit Molaskrifari að útvarpsstjóri þiggur ekki laun fyrir fréttalestur og leiðréttist það hér með og hann beðinn velvirðingar á því að þetta skyldi vera gefið í skyn.