Sennilega er Ríkissjónvarpið óstundvísasta sjónvarpsstöð norðan Alpafjalla. Tvö kvöld í röð hafa tíufréttir ekki hafist á auglýstum tíma. Þetta hefur margsinnis verið að umtalsefni hér. Í fyrrakvöld (13.04.2011) bað Bogi Ágústsson áhorfendur afsökunar á seinkuninni. Í gærkveldi (14.03.2011) hófust tíufréttir klukkan átta mínútur yfir tíu. Enginn bað okkur afsökunar. Það er einfalt mál að tilkynna fréttaseinkun með skjáborða. Það gera alvörusjónvarpsstöðvar. Í Efstaleitinu virðist enginn áhugi á því að sýna okkur áhorfendum kurteisi. Við skiptum ekki máli.
Það var gaman að hlusta á fjórar konur ræða pólitíkina í Kastljósi (14.04.2011). Katrín Jakobsdóttir kom vel fyrir að vanda, Siv var hreinskilin, en varaformaður Sjálfstæðisflokksins átti erfitt með að komast upp úr gömlu hjólförunum. En ósköp er þetta sífellda þjóðstjórnartal sumra fjölmiðlamanna þreytandi. Þjóðstjórn er svona stríðstímafyrirbæri.
Í auglýsingum Ríkissjónvarps er talað um að heppinn viðskiptavinur sé dreginn út vikulega. Molaskrifari teldi sig ákaflega óheppinn, ef hann væri dreginn út.
Nefnifallsjúklingurinn gengur enn laus um lyklaborðin á mbl.is. Þetta er frá í dag (14.04.2011): Einn af fjórum kjarnaofnum í tékknesku kjarnorkuveri var lokað í dag eftir að bilun kom upp í honum. Hér ætti að standa : Einum af fjórum …. Það er einhver bilun komin upp hjá mbl.is.
Fréttamaður Ríkissjónvarps talaði (14.04.2011) um hin ýmsu veðurbrigði. Molaskrifari kannast ekki við orðið veðurbrigði. Orðið veðrabrigði þýðir hinsvegar breytingu á veðri. Talað er um snögg veðrabrigði, þegar veður breytist skyndilega. Líklega hefur fréttamaður átt við óstöðugt veðurfar undanfarna daga, eða breytilegt veður.
4 athugasemdir
Ekkert ping ennþá
Glúmur skrifar:
18/04/2011 at 14:40 (UTC 0)
Á strætisvögnum blasir við auglýsingin:
„Settu andrúmsloftið í forgang.“
Nafnorðasýki þeirra sem eru betri í ensku en íslensku.
Þeir sem víkja fyrir strætisvögnum láta þá njóta forgangs.
Glúmur skrifar:
18/04/2011 at 14:35 (UTC 0)
Stöð 2 – sjónv. – sagði í fréttum í gær að fleiri „strokkar“ (skýstr.) væru á leiðinni til Florída.
Á báðum stöðvunum varð mönnum skrafdrjúgt um „grannmeti“ sama kvöld.
Þettar eru framburðarbreytingar sem hljótast af styttingu sérhljóða á 1. atkvæði og mun fækka orðum í málinu um tveggja stafa prósentutölu verði ekki brugðist við.
Eiður skrifar:
15/04/2011 at 12:50 (UTC 0)
Í pistlinum hér að ofan á að sjálfsögðu að standa: … verið gert að umtalsefni….
Hjalti Þórðarson skrifar:
15/04/2011 at 11:33 (UTC 0)
Þakka þér Eiður, ég saknaði pistla þinna en var hættur að fara á Eyjuna eftir eigedaskiptin.