Úr sófanum heima fylgdist Molaskrifari með opnunarhátíð Hörpu í beinni útsendingu frá upphafi til enda. Það var í senn stórkostleg og ógleymanleg upplifun, þótt ekki höfðaði allt, sem þar var flutt, til tónlistarsmekks skrifara, – enda enginn vegur að gera kröfu um slíkt. Allt var gott og margt frábært. Helst hefði mátt missa sín hálfgert Evróvisjónatriði Memfismafíunnar. Það kunni Molaskrifari ekki að meta. En öðrum hefur sjálfsagt fundist það bera af !
Það er ekki heiglum hent að stjórna útsendingu svona flókinnar dagskrár. Þrátt fyrir smávægilega hnökra verður ekki annað sagt en upptökustjórinn, Helgi Jóhannesson hafi komist afburða vel frá mjög erfiðu verki. Takk fyrir það. Gaman var að fá svolitla upprifjun á byggingarsögu Hörpu, en skrítið var að sjá alla sitja sem fastast meðan Víkingur Heiðar lék þjóðsönginn í hálfbyggðu húsinu ! Í heildina mjög gott.
Þær stöllur,sem kynntu og ræddu við fólk voru glæsilegar svo sem hæfði tilefninu. Því miður er það stundum svo að fréttafólk sýnir viðburðum og viðstöddum ekki tilhlýðilega kurteisi í klæðaburði. Svo var sannarlega ekki að þessu sinni. Hrós fyrir það.
Opnunarhátíðin varð lengri en ætlað var í dagskrá. Um það bil 40 mínútum lengri. Lítið við því að segja. Ríkissjónvarpið hefði þó átt að biðjast afsökunar á seinkuninni og tilkynna hana á skjánum. Óskiljanlegur, en bara venjulegur dónaskapur að gera það ekki. Í kjölfar þessarar góðu dagskrár kom svo þessi venjulega ameríska þriðja flokks dellumynd,sem Ríkissjónvarpið hellir yfir þjóðina á hverju einasta laugardagskvöldi. Eina breytingin var sú að nú var þetta sýnt á föstudagskvöldi ! Efni af þessu tagi á að sýna síðdegis, ef Ríkissjónvarpið á annað borð telur það sýningarhæft. Líklega er Ríkissjónvarpið eina nauðungaráskriftarstöðin,sem sýnir barnaefni klukkan ellefu á föstudagskvöldum. Seinkun dagskrárinnar olli því að snillingurinn Barnaby, sem er úrvalssjónvarpsefni, komst ekki á skjáinn fyrr en undir miðnætti og hafa því áreiðanlega margir farið á mis við þann góða mann.
Morgunblaðið ver kvótakerfið og kvótagreifa með kjafti og klóm í leiðara (13.05.22011). Það er ofur eðlilegt. Útgáfa blaðsins hvílir á kvótakerfinu. Það er rekstrargrundvöllur Moggans.
Í auglýsingu á baksíðu Fréttablaðsins (1133.05.2011) um íslenskt grænmeti segir: … sem rækta plómutómata allt árið um kring… Hér hefði dugað að segja árið um kring, eða allt árið. Ekki allt árið um kring.
Úr mbl.is (13.05.2011): Lögregla höfuðborgarsvæðisins telur líklegt að tvítuga stúlkan, sem ungur karlmaður kom með látna að Landspítalanum í gærkvöldi, hafi verið ráðinn bani í Heiðmörk,.. Einföld atriði vefjast fyrir mönnum á mbl.is. Einhver er ekki ráðinn bani. Einhverjum er ráðinn bani. Þessvegna ætti að standa hér: … telur líklegt að tvítugu stúlkunni…. hafi verið ráðinn bani.
Fyrir nokkrum dögum heyrði Molaskrifari ávæning af samtali útvarpsstjóra Útvarps Sögu við tvo lögmenn frá fyrirtæki,sem annað hvort heitir Lagarök eða Lagakrókar. Man ekki hvort heldur er. Í viðtalinu var þrástagast á því að byggingarkostnaður tónlistarhússins Hörpu væri orðinn 37 milljarðar króna. Um þetta var lengi fjasað. Allir vita að Harpa var dýr. Molaskrifari minnist þess að hafa heyrt töluna 27 milljarða. Ekki 37 milljarða. Þessir tveir lögmenn og útvarpsstjórinn vissu greinilega ekki mikið um málið. En það er nú þannig með suma fjölmiðla, að þetta þarf ekki að vera svo nákvæmt. Tíu milljarðar til eða frá skipta ekki svo miklu máli.
12 athugasemdir
Ekkert ping ennþá
Eiður skrifar:
15/05/2011 at 22:12 (UTC 1)
Má vera að ýmsum finnist þetta orka tvímælis. Mér finnst það samt skásti kosturinn.
Aðalsteinn skrifar:
15/05/2011 at 22:05 (UTC 1)
Sælir.
Af og til dett ég inn á síðuna hjá þér og hef yfirleitt gaman af.
Eitt stakk þó svolítið í augu við að lesa þennan pistil, það er þegar þú skrifaðir „hálfgert Evróvisjónatriði Memfismafíunnar“. Mér finnst afskaplega bagalegt þegar verið er að hálfþýða orð. Annað hvort eiga menn, að mínu áliti, að segja eurovision eða þá að nota ambögur eins og evrósýn (sem er að vísu slæmur kostur).
Lúðvík Júlíusson skrifar:
15/05/2011 at 13:26 (UTC 1)
Ólafur, það er nú svo að það er ríkisábyrgð á framkvæmdunum vegna Hörpu sem gerir það að verkum að lánsfé leitar frekar í það verkefni en í einkageirann. Það gerir það einfaldlega að verkum að framboð á lánsfé dregst saman og vextir hækka. Það hlýtur að vera fagnaðarefni fyrir þá sem finnast vextir hafa verið of lágir hingað til.
Ávinningurinn af Hörpu verður að bera saman við þann ávinning sem landið hefði annars fengið af meiri veltu og atvinnu í einkageiranum, jafnvel í úflutningsstarfsemi og ferðaþjónustu.
Vonandi verður það skoðað á næstu árum.
G skrifar:
15/05/2011 at 01:05 (UTC 1)
Ég er krati eins og þú Eiður.Og ég kann að meta skrif þín yfirleitt. Fannst líka helv. gaman að horfa á tónleikana í gær (í sjónvarpinu). En er sammála því að þarna var boðið elítunni. Afhverju var ekki hægt að draga svona 50% af gestunum úr þjóðskrá þannig að þjóðin gæti verið sátt. Í lagi að bjóða einhverjum Björgúlfum líka – mín vegna – en einhverjir af okkur Jónunum hefðu gjarnan mátt vera þarna líka.
Ólafur Sveinsson skrifar:
15/05/2011 at 00:12 (UTC 1)
Svo spáir enginn í arðinn?
Ólafur Sveinsson skrifar:
14/05/2011 at 19:55 (UTC 1)
Lúðvík.
Þessar 27 milljarðar ver’ða greiddir upp upp með 900 milljóna framlagi Ríkis og Borgar næstu 35 árin. Eins of vonir standa til og ábendingar vísa á, þá á rekstur að standa undir sér. Fullbókað til 2015? Eftir að hafa greint hyskið á myndum, sem mætti í gær, þá setur í mann hroll. Ég byrjaði að safna á opinberan söfnunarreikning fyrir 20 árum, þeirri von að tónlistarhús mundi rísa í framtíðinni. þessi sjóður varð aldrei stór, en hún varð þó til staðar þegar hafist var handa.
Lúðvík Júlíusson skrifar:
14/05/2011 at 19:22 (UTC 1)
varðandi kostnað vegna Hörpu þá eru þær tölur sem ég hef heyrt 27 milljarðar fyrir húsið og 6 milljarðar fyrir frágang lóðar og gatnagerð. Svo má ekki gleyma hinum árlega milljarði sem Harpa fær á hverju ári frá Reykjavíkurborg og ríkinu.
Eiður skrifar:
14/05/2011 at 18:35 (UTC 1)
Sá hana svona útundan mér og dró þá ályktun, – í fljótfærni að þetta væri sama ameríska ruslið og Ríkissjónvarpið sífellt hellir yfir okkur á besta sýningartíma um helgar. Aðalgagnrýnin var á sýningartímann,sem var fáránlegur.
Varðandi útsendinguna úr Hörpu þá dettur mér alltaf sparisjóðurinn Byr og bullið um fjárhagslega heilsu í hug, þegar ég sé Pál Óskar á skjánum. Hann eyðilagði sig á því að selja sig í auglýsingar.
Axel skrifar:
14/05/2011 at 18:23 (UTC 1)
Enn og aftur dæmir Eiður kvikmyndir án þess að horfa á þær. Myndin var augljóslega bresk og hefur fengið ágætis dóma. En vissulega var hún full seint á dagskrá. Varðandi tónlistarflutningin stóðu flestir sig vel að mínum dómi – fyrir utan Dikta þar sem söngurinn var hreinlega slakur.
Ólafur Sveinsson skrifar:
14/05/2011 at 18:20 (UTC 1)
Íþróttir m.m.
Það sýnir metnaðarleysi RÚV, að árið 2011, er aðeins ein rás til ráðstöfunar.
Er til skammar. Meðferð og metnaðarleysi útvarpssjóra á fréttastofunni, er einnig til skammar.
Eiður skrifar:
14/05/2011 at 18:13 (UTC 1)
Hugarheimur barnsins er á sínum stað. Tíminn fyrir barnaefni er ekki klukkan ellefu á föstudagskvöldum. Þá eiga börn að vera farin að sofa.
Ólafur Sveinsson skrifar:
14/05/2011 at 17:46 (UTC 1)
„Í kjölfar þessarar góðu dagskrár kom svo þessi venjulega ameríska þriðja flokks dellumynd,sem Ríkissjónvarpið hellir yfir þjóðina á hverju einasta laugardagskvöldi.“ Í fyrsta lagi. Myndin var ensk. Öðru lagi. Hvar er hugarheimur barnsins, hjá þér Skeggjagötu strákur?