Íslenskt slanguryrði yfir algert rugl er steypa. Þegar sagt er að eitthvað sé alger steypa þá er það sem sé tóm vitleysa eða tóm tjara svo notað sé annað orðatiltæki. Þegar leiðtogar Sjálfstæðisflokksins tala um að ESB sé að blanda sér í kosningabaráttuna á Íslandi og sendiherra ESB á Íslandi með búsetu í Noregi sýni Íslendingum dólgslega framkomu þá er rétt að athuga hvað sá ágæti sendiherra gerðist sekur um.
Afbrot hans var, að hann sagði, að sú tillaga Sjálfstæðisflokksins,að við fengjum Alþjóða gjaldeyrissjóðinn til að aðstoða okkur við einhliða upptöku Evru væri hrein vitleysa, tóm tjara eða alger steypa svo notað sé slangur. Í viðtölum sagði hann um þessa vitleysistillögu, að hún væri „sheer nonsense“ eða „rent nonsense“ eins og mér heyrðist hann líka segja.
Er það „dólgsleg framkoma“ að benda kurteislega á að tillaga um tilteknar aðgerðir ríkjabandalagsins sem hann er fulltrúi fyrir sé óframkvæmanleg og fjarri þeim raunveruleika sem við öllum blasir.? Mér finnst það ekki. Með því að benda á þessa staðreynd er hann einungis að sinna eðlilegum starfsskyldum. Sagt er að sannleikanum verði hver sárreiðastur og svo er líklega hér. En steypustöð flokksins er nú á fullu í aðdraganda kosninganna og þótt mikið sé framleitt af steypu er ég ekki viss um að hún seljist mjög vel.
2 athugasemdir
Ekkert ping ennþá
Eiður Svanberg Guðnason skrifar:
21/04/2009 at 23:06 (UTC 1)
Hefði átt að bæta því við að athyglisvert er að sjá hvernig AMX fjallar um ummæli ESB sendiherrans. AMX segist vera „Fremsti fréttaskýringavefur landsins“ Þegar betur er að gáð ætti AMX frekar að heita „Fréttaskýringavefur Sjálfstæðisflokksins“ Það væri miklu heiðarlegra.
Þetta er nefnilega bara útibú frá Steypustöð Sjálfstæðisflokksins og þaðan rennur nú steypan í stríðum straumum.
Heimir Tómasson skrifar:
21/04/2009 at 23:00 (UTC 1)
Svona í framhjáhlaupi þá má einnig benda á að Windows stýrikerfið er alger steypa. Af hverju?
Jú, við höfum Windows CE, ME, NT.
Hm?