AÐ KVÆNAST
Sigurður Oddgeirsson, gamall vinur og skólabróðir, skrifaði frá Danmörku:,, Af mbl.is í dag (20.01.2016)
Enskur maður hefur leitað á náðir bresku ríkisstjórnarinnar eftir að honum væri tjáð að í dánarvottorði eiginmanns hans myndi vera skráð að hann hefði aldrei kvænst.
Hér kemur fram vanþekking á móðurmálinu.
Hvernig í ósköpunum eiga hommar að geta kvænst.
Orðið að kvænast þýðir að leita sér kvonfangs eða með öðrum orðum að leita sér að eiginkonu.
Væri í setningunni sýnir vankunnáttu í notkun viðtengingarháttar. Þarna á að vera var tjáð.
Eða hvað?” Auðvitað. Réttar ábendingar. Væri – var reyndar leiðrétt síða á mbl.is. Þakka bréfið, Sigurður.
SMARTLAND BREGST EKKI
Af Smartlandi Mörtu Maríu á mbl.is (1901.2016):,, Helsta skýringin á leynd sambandsins var vegna þess að Ólafi föður Haraldur leist ekki á ráðahaginn og fannst Sonja ekki samboðin syni sínum. “. Föður Haraldar leist ekki á ráðahaginn. Skýringin á leynd sambandsins var … , – skýringin var ekki vegna þess að … skýringin var sú, að …
ÞJÓÐ Í SÁRUM
,,Íslenska þjóðin er í sárum”, sagði fréttamaður Ríkisútvarpsinsí níu fréttum að morgni miðvikudags (20.01.2016). Hann átti við að margir væru ósáttir eftir tap í boltaleik gegn Króötum kvöldið áður. Þetta er kannski ágætt dæmi um það hvernig tekist hefur með allgóðum árangri að boltaæra talsverðan hluta þjóðarinnar. Sú spurning vaknar hinsvegar hvað fréttamaðurinn hefði sagt, ef alvarlegir atburðir hefðu gerst. Verðbólga orðanna er vond eins og önnur verðbólga.
Í HEIMSÓKNARSKYNI
Úr frétt í Morgunblaðinu (20.01.2016):,, En ef ég byggi upp nýtt líf hér,, aðlagast samfélaginu og börnin hafa næg tækifæri, sé ég ekki ástæðu til þess að flytja aftur heim til Sýrlands að loknu stríðinu, nema í heimsóknarskyni”. Að flytja heim í heimsóknarskyni! – Ögn skárra hefði til dæmis verið: … fara aftur heim til Sýrlands, nema þá í heimsókn.
VINSAMLEG TILMÆLI
Það eru vinsamleg tilmæli til Ríkisútvarpsins, að látið verði af þeim leiða sið að garga á okkur í svokölluðum leiknum auglýsingum, sem jafnan eru fluttar rétt á undan aðalfréttatímum Ríkisútvarpsins. Hljóðstyrkur í útsendingu er greinilega aukinn, þegar kemur að garginu. Maður hrekkur í kút. Á sér einskis ills von. Ljótur siður og leiður. En hér sennilega til of mikils mælst.
TIL LESENDA
Þeir lesendur, sem vilja senda mér tölvupóst eru beðnir að nota póstfangið eidurgudnason@gmail.com .Eða einkaskilaboð á fésbók.
Fyrirvari: Athugasemdir frá öðrum á þessari síðu eru á þeirra ábyrgð.
Síðuskrifari áskilur sér rétt til að fjarlægja dónaleg eða meiðandi ummæli, nafnlausar athugasemdir eða athugasemdir undir dulnefni. Lesendabréf eru vel þegin. Bréfritarar eru beðnir að taka fram hvort birta megi bréf, eða ábendingar þeirra, undir nafni, – ESG
Skildu eftir svar