Bjarni Benediktsson formaður Sjálfstæðisflokksins talaði eins og Útvarp Saga í morgunútvarpi Rásar tvö í morgun (14.04.2011). Hann sagði, að 98% landsmanna hefðu greitt atkvæði gegn Icesave II. Þetta eru gróf ósannindi. Það voru ekki 98% landsmanna heldur 98% þeirra sem kusu. Það er allt annar handleggur. Svona getur formaður flokks ekki talað,- vilji hann vera trúverðugur. Það er rétt, sem segir í leiðara Fréttablaðsins í dag, að formaður Sjálfstæðisflokksins er kominn í mótsögn við sjálfan sig varðandi afstöðuna til aðildarviðræðna við ESB. Hann var líka í mótsögn við sjálfan sig, þegar hann flutti vantraust á ríkisstjórn vegna laga , sem hann hafði sjálfur samþykkt áamt 70% þingmanna. Formaður í þessari stöðu á ekki sjö dagana sæla. Svo bætist það við að á viðskiptahimni Bjarna Benediktssonar hrannast nú óveðursskýin upp Á þessari stundu lítur ekki út fyrir að hann eigi pólitískt langlífi fyrir höndum. Enn eykur það á óvissuna um pólitískt framhaldslíf formanns Sjálfstæðisflokksins, að hann hefur að undanförnu verið í einu af efstu sætunum á pólitískum aftökulista Morgunblaðsins. Það hefur ekki farið leynt.
Það var óneitanlega dálítið skondið að fylgjast með útsendingu frá Alþingi, þegar þingmenn fluttu atkvæðaskýringar við atkvæðagreiðslu um vantraust á ríkisstjórnina að kveldi miðvikudags. Nokkrir þingmenn rökstuddu afstöðu sína í löngu máli, en greiddu svo atkvæði þvert á eigin rökstuðning !
Ýmis gullkorn var að finna í atkvæðaskýringum þingmanna:
Þjóðin sagði nei ásamt Framsóknarflokknum.
Þingmenn stjórnarflokkanna hafa týnt tölunni hver af öðrum.
Þjóðaratkvæðagreiðsla, sem einkenndist af taktleysi forystunnar.
Þessi ríkisstjórn treystir ekki nokkrum manni til að lifa eigin lífi.
Við eigum að gæta þess að fara ekki rangt með orðtök, sem eru fastmótuð í daglegu máli. Í morgunþætti í Ríkisútvarpi (13.04.2011) sagði opinber embættismaður sem við var rætt: Allir sem hendi geta valdið. Rétt er þetta orðtak: Allir sem vettlingi geta valdið, – allir sem geta sett upp vettlinga , allir verkfærir menn. Ef til vill kemur að því, að allir tala um hanska og enginn veit hvað orðið vettlingur merkir.
2 athugasemdir
Ekkert ping ennþá
Eiður skrifar:
15/04/2011 at 12:00 (UTC 0)
Takk fyrir þessa góðu greiningu, Halldór.
Halldór Björnsson skrifar:
14/04/2011 at 09:25 (UTC 0)
Mikilvægt að fara rétt með. Stjórnmálamenn og fjölmiðlamenn vilja oftast hafa það sem skemmtilegra reynist þegar fjallað er um niðurstöður kannanna og kosninga. Ég er ekki viss um að þetta sé alltaf vísvitandi lygi, heldur bara ónægur skilningur á tölulegum sannindum.
Í Icesave II vildu kusu 63% og þar af voru 93% atkvæða NEI. sem gera rúm 58% kjósenda. Það er ágætur meirihluti.
Á laugardaginn var niðurstaðan allt önnur, og í raun er ekki meirihluti kjósenda á bak við NEI:
25% kjósenda sátu heima
30% kjósenda kusu JÁ
45% kjósenda kusu NEI
Það ruglar bæði stjórnmálamenn og fréttamenn (heyrði þessa villu á RÁS2 rétt áðan) að atkvæði féllu 60% NEI og 40% JÁ. En þegar 25% mæta ekki á kjörstað dugir það ekki til að ná meirihluta kjósenda. Hvað þá yfirgnæfandi.