Molavin sendi eftirfarandi úr dv. is (25.05.2011): Milljarðaskuldir N1 breytt í hlutafé. Það er ekki aðeins svo komið að nýfréttafólki reynist nær útilokað að ráða við aukasetningar; beyging nafnorða virðist því líka um megn. Molaskrifari þakkar sendinguna.
Glöggur lesandi sendi Molum eftirfarandi (26.05.2011): ,,Ég rak augun í undarlega orðnotkun í morgun í Fréttablaðinu. Á bls.2 er texti undir mynd af koparventli úr póstskipinu Phönix, þar stendur að „rústirnar“ hafi legið á hafsbotni í 130 ár. Ég get ekki annað en brosað að hugmyndaflugi blaðamanns.” Molaskrifari þakkar sendinguna. Flak verður að rústum. Orðfátækt fjölmiðlamanna fer líklega vaxandi. Takk fyrir sendinguna.
Það er umhugsunarefni, eins og bent hefur verið á í Fréttablaðinu (26.05.2011) að nokkrir helstu andstæðingar ESB aðildar Íslands, þeir Ögmundur Jónasson og Styrmir Gunnarsson, eru nú farnir að sækja í orðaforða nasismans og Þýskalands Hitlers í umræðunni með því að nota orð eins og lífsrými og blitzkrieg. Annar harður ESB andstæðingur, Björn Bjarnason, hefur áður sagt að þegar umræðan sé komin á það stig að líkingar eru sóttar til þýskra nasista, þá sé umræðunni eiginlega lokið. Í Silfri Egils sagði Björn Bjarnason orðrétt 3.febrúar 2008: Björn Bjarnason: Heyrðu, Sigurður Líndal skrifaði þannig um þetta að hann skrifaði sig út úr umræðunni með því að fara að líkja gjörðum Árna Mathiesens við nasisma. Það var verið að víkja þingmanni á Evrópuþinginu, Daniel Hannan, úr EPP eða hægri flokknum, þingflokknum á Evrópuþinginu, af því að hann í þingræðu fór að vísa til þess að þingflokksforsetinn væri að beita einhverjum nasískum aðferðum. Af því að það er nefnilega staðreynd að þegar menn fara út í þann forarpytt að líkja andstæðingum sínum við nasista þá eru þeir komnir út af borðinu, þá er þeim vikið úr þingflokkum og þá er eiginlega ekki hægt að ræða sjónarmið þeirra lengur. Þetta gerði Sigurður Líndal í Fréttablaðinu. Það er ekki hægt annað en að taka undir með Birin. Hann verður að leiðrétta,,kúrsinn” hjá þeim skoðanabræðrum sínum Ögmundi Jónassyni og Styrmi Gunnarssyni.
Viljandi vinna íslensk fyrirtæki eins og Húsasmiðjan skemmdarverk á tungunni með því að tönnlast á orðinu tax-free í auglýsingum. Þarna er líka verið að ljúga að lesendum. Hvorki Húsasmiðjan né önnur fyrirtæki geta gefið kaupendum skattaafslátt. Þau geta hinsvegar veitt afslátt, sem er jafnhár virðisaukaskattinum, í prósentum talið. Þetta er ljótur leikur. Og þennan ljóta leik stunda reyndar fleiri fyrirtæki, en Húsasmiðjan.
Í framhaldi af þessu spyr Molaskrifari: Hversvegna þarf fyrirtækið Holtakjúklingur að auglýsa Royal bringur? Halda forráðamenn fyrirtækisins að Íslendingar kaupi frekar framleiðslu þess, ef hún er auglýst undir ensku nafni? Við neytendur erum kannski kjánar, en svo miklir kjánar held ég að við sé ekki.
Það er afar sjaldgæft að heyra ambögur í morgunþætti Rásar eitt. Í morgun (26.05.2011) varð umsjónarmanni það á að tala um að mælt hefði verið hundrað og þrjá sentimetra öskulag við gíginn. Átti að sjálfsögðu að vera hundrað og þriggja sentimetra öskulag. Einnig var sagt að þetta væri mesta öskudreifing í Grímsvatnagosi síðustu tíma. Betra hefði verið að tala um mestu öskudreifingu á seinni tímum. Eða mestu öskudreifingu,sem sögur færu af í Grímsvatnagosi.
Skildu eftir svar