Í áttafréttum Ríkisútvarps (28.05.2011) var ítrekað talað um konungsdæmi. Molaskrifari hyggur að málvenja sé að tala um konungdæmi og konungsríki.
Þar var líka sagt: … Þegar leigubíll,sem hann ætlaði með var ekið af stað … . Leigubíl var ekið af stað, ekki leigubíll.
Stundum kemst einhver villa á kreik í fréttum. Villuna étur svo hver fjölmiðillinn á fætur öðrum upp að óathuguðu máli. Þetta gerðist hjá Morgunblaðinu og Ríkisútvarpinu þar sem talað var um Hrafnistu í Kópavogi. Nema þá að villan eigi rætur að rekja til lögreglunnar. Þetta var hinsvegar rétt í hádegisfréttum Ríkisútvarpsins (28.05.2011), en þá var réttilega talað um Hrafnistu í Hafnarfirði.
Viðtal Sigmars Guðmundssonar við landlækni í Kastljósi í síðustu viku hefur orðið Molaskrifara umhugsunarefni. Landlæknir fór allur undan í flæmingi þegar Sigmar spurði um kjarna þess alvarlega máls sem læknadópið er. Læknar senda lyfseðla rafrænt um svokallaða lyfseðlagátt. Meðaltölvubjáni veit að það er sára einfalt að fylgjast með því rafrænt hve mikið af tilteknum lyfjum tiltekinn einstaklingur fær með lyfseðlum og frá hvaða læknum. Ekki getur verið að Persónuvernd setji sig á móti því að reynt sé að stemma þessa lyfjaá að ósi. Svör embættislæknisins voru þannig að maður var engu nær. Þetta er í eðli sínu ekki flókið mál.
Gera verður nokkrar kröfur um formlegt málfar í fréttum Ríkisútvarpsins. Þar eiga fréttamenn að forðast barnamál og slangur. Í hádegisfréttum (28.05.2011) var talað um að hneppa menn í fangelsi , en notað orðalagið, að stinga mönnum inn. Ekki við hæfi, jafnvel þótt verið sé að tala um þá sem eitthvað hafa til saka unnið.
Upphæðirnar skipta hundruðum milljónum króna, var sagt í fréttum Ríkissjónvarps (28.05.2011). Hér hefði átt að segja: Upphæðirnar skipta hundruðum milljóna króna. Þegar fólk mismælir sig, sem alltaf getur komið fyrir, þá er að leiðrétta mismælið. Hér var ekkert leiðrétt. Kannski vissi sá sem las ekki betur, eða var ekki að hlusta það sem hann las.
Meira úr fréttum Ríkissjónvarps þetta sama kvöld: .. hann segir það velta á hverjum og einum flokksmanni hvort umbótatillögur flokksins ná fram að ganga. Molaskrifari hallast að því að hér hefði frekar átt að segja: … hvort umbótatillögur flokksins nái fram að ganga. Eitthvað var landafræðikunnáttunni áfátt hjá fréttamanni, sem sagði okkur frá gervinhnattamyndum af brennisteinsdíoxíði í Grímsvatnagosi. Fréttamaður talaði um gervihnött háskólans í Wisconsins Madison. Líklega hefur verið átt við gervihnött á vegum Wisconsin háskóla, sem er í Madison, höfuðborg Wisconsinríkis í Bandaríkjunum..
Frétt á visir.is (28.05.2011): … en þar gengu lögreglumenn og stöðumælaverðir á milli bíla sem voru lagðir ólöglega og sektuðu þá. Bílunum var lagt ólöglega. þeir voru ekki lagðir ólöglega. Þetta hefur sést áður. Svo voru það eigendur bílanna, sem voru sektaðir. Ekki bílarnir.
6 athugasemdir
Ekkert ping ennþá
Eiður skrifar:
29/05/2011 at 22:23 (UTC 0)
Þetta er réttmæt ábending.
Lilja skrifar:
29/05/2011 at 20:39 (UTC 0)
Ekkert að þakka Eiður.
Mér sýnist reyndar að þú hafir núna tekið gagnrýni þína á fréttaflutning Morgunblaðsins og Ríkisútvarpsins um Hrafnistumálið út úr Molunum. Hefði ekki verið eðlilegra að leyfa þessu að standa í Molunum og viðurkenna að þér hefði sjálfum orðið á í messunni hvað þetta varðar?
Eiður skrifar:
29/05/2011 at 18:04 (UTC 0)
Takk fyrir ábendinguna.
Lilja skrifar:
29/05/2011 at 17:32 (UTC 0)
„Stundum kemst einhver villa á kreik í fréttum. Villuna étur svo hver fjölmiðillinn á fætur öðrum upp að óathuguðu máli. Þetta gerðist hjá Morgunblaðinu og Ríkisútvarpinu þar sem talað var um Hrafnistu í Kópavogi. Nema þá að villan eigi rætur að rekja til lögreglunnar. Þetta var hinsvegar rétt í hádegisfréttum Ríkisútvarpsins (28.05.2011), en þá var réttilega talað um Hrafnistu í Hafnarfirði.“
Lestu þetta Eiður – http://www.hrafnista.is/?ew_news_onlyarea=content1&ew_news_onlyposition=5&cat_id=8010&ew_5_a_id=378402
Lilja skrifar:
29/05/2011 at 17:17 (UTC 0)
Hrafnista í Kópavogi – sjá http://www.hrafnista.is/heimilin/hrafnista_kopavogi/
Guðfinnur P. Sigurfinnsson skrifar:
29/05/2011 at 16:12 (UTC 0)
Sæll og blessaður.
Það er með hundruð og amböguna ,,hundruðir“ – ,,upphæð“ og fjárhæð.
Þykir rétt að minna á að sagt er að til sé Guð í upphæðum en þegar talað er um peninga þykir mér fara betur á að tala um – fjárhæðir – , sem geta þess vegna verið hundruð (ekki hundruðum) miljónir eða miljarðar, hvort heldur er líklegra.