Skrifað og skrafað

Úr mbl.is (15.06.2011): Starfsfólki var sagt að rekstur verksmiðjunnar yrði haldið áfram óbreyttum og starf framkvæmdastjóra auglýst eins fljótt og kostur er. Það var og.  Rekstur verksmiðjunnar verður ekki haldið áfram. Rekstri verksmiðjunnar verður haldið áfram.

Síbrotamaður dæmdur í 2,5 árs  fangelsi, segir í fyrirsögn á mbl. is (16.06.2011).  Um var að ræða tveggja og  hálfs árs fangelsi. Samkvæmt þessari sérkennilegu reiknilist Mogga   þá eru 9 mánuðir líklega 0,75 ár. Endemis rugl!

Í íþróttafréttum  Ríkisútvarpsins (14.06.2011) var talað um  íþróttaviðburð í Árósaborg. Málvenja er að tala um Árósa, ekki Árósaborg.

Í  sexfréttum  Ríkisútvarpsins  (15.06.2011) var  talað um að niðurfella skuldir. Af hverju ekki að fella niður skuldir? Í sama fréttatíma var talað um könnun  um hagi (nemenda). Betra hefði verið að tala um könnun á högum (nemenda).

Stöð tvö  sagði frá því  að sláttur hefði hafist undir í Eyfafjöllum í dag, 15. júní. Ekki alveg rétt. Molaskrifari var á ferð undir  Eyjafjöllum daginn áður. Þá var  sláttur hafinn  hjá Ólafi  bónda á Þorvaldseyri. Allir sem þar eiga leið um ættu að skoða  safnið sem Ólafur  hefur komið upp  við þjóðveginn. Þar er mikill  fróðleikur um  eldgosið í Eyjafjallajökli. Vel að verki staðið.  

Í fréttum  Ríkisútvarpsins klukkan  sex að morgni (16.06.2011) var sagt  nokkuð ítarlega frá frétt úr Viðskiptablaðinu um  fyrirbærið Gift.   Gift var  hópur  sjálfkjörinni forystumanna  Framsóknarflokksins ,sem  tók að sér að annast tuttugu milljarða  úr  búi Samvinnutrygginga, – milljarða  sem átti að greiða  fyrrum viðskiptavinum þessa gagnkvæma  tryggingarfélags.  Framsóknarhópnum sjálfkjörna  tókst að koma öllu þessu fé í lóg, sólunda því öllu og  stofna til mikilla skulda.  Ekki  varð Molaskrifari var  við að þessi frétt  væri  flutt í   næstu fréttatímum Ríkisútvarpsins, klukkan sjö, átta og níu þennan morgun. Hún var heldur ekki í hádegisfréttum. Henni var greinilega kippt út. Skortir þó ekki að sömu fréttirnar  séu marglesnar þar á  bæ í hverjum fréttatímanum á fætur öðrum.  Undarlegt fréttamat. Hefur  Framsóknarflokkurinn  enn svona mikil ítök á fréttastofu Ríkisútvarpsins?

Molaskrifari hafði lúmskt gaman af því að  sjá  forstjóra íslenska Lottósins gorta af því að Lottóinu hefði verið hrósað í útlöndum  fyrir gegnsæi og góðan rekstur. Þá minntist Molaskrifari þess, er hann spurði Lottóforstjórann um kostnað  við gerð  tiltekinnar sjónvarpsauglýsingar , þar sem Lottóið lét sækja konu til Búlgaríu til að leika í auglýsingunni. Svar forstjórans var, að hann þyrfti ekki að svara slíkum spurningum frá  ,,fólki úti í bæ”, eins og hann  orðaði það svo snyrtilega. Það var nú meira gegnsæið!

Molaskrifari vonar, að honum hafi misheyrst, er honum heyrðist  sagt í upphafi dags (16.06.2011) á Rás   eitt,  að hlustendur hefðu heyrt Brandenborgarkonsertinn eftir  Johann Sebastian Bach.  Brandenborgarkonsertarnir eru  nefnilega sex, muni Molaskrifari rétt. Ekki er langt síðan að í  Ríkisútvarpinu var talað um   frægasta píanókonsert Griegs, sem  Víkingur  Heiðar  lék með Sinfóníunni í Hörpu. Edvard Grieg   samdi bara einn píanókonsert.

Í kynningu á efni  morgunútvarps  Rásar tvö (16.06.2011)   var sagt, að  við fengjum að kynnast hefðum og helgileika þjóðhátíðardagsins.  Molaskrifari þekkir ekki orðið helgileiki, í merkingunni helgi, eins og  hér var  greinilega átt við. Helgileikur  er hinsvegar trúarlegur sjónleikur.

Gleðilega þjóðhátíð !