Í DV (20.01.2010) segir: Á innanhússpóstvef Háskóla Íslands lýsa kennarar ósætti vegna ráðningar…. Molaskrifari hefur alltaf talið að orðið ósætti þýddi ósamkomulag,ágreiningur, en hér virðist orðið notað í merkingunni óánægja. Nema átt sé við ósætti innan kennaraliðsins. Hinsvegar hefði mátt segja að kennarar væru ósáttir við ráðningu.. Í huga skrifara er ósætti ekki rétta orðið í þessu tilviki. Ef til vill eru þó ekki allir sammála því, -enda mörg álitamálin varðandi málfar og málnotkun.
Í auglýsingu í RÚV sjónvarpi var þýddur texti á skjánum þar sem stóð: Ekki kaffæra mér. Sá þetta að vísu í sjónhendingu, en ekki samhengi. Molaskrifari er vanur því að sögnin að kaffæra , færa í kaf taki með sér þolfall. Ekki kaffæra mig. Sögnin að drekkja tekur hinsvegar með sér þágufall: Ekki drekkja honum.
Ríkisútvarpið hefur ítrekað verið misnotað til að kynna skottulækningar af ýmsu tagi eins og þær sem stundaðar eru á flugvallarsvæðinu á Reykjanesi. Síðast var það umfjöllun um „kraftaverkalyfið“ MMS (miracle Mineral Solution), sem á að geta læknað bæði alnæmi og berkla og ýmislegt fleira. Ríkisútvarpið tók að sér að segja fólki að þetta efni sem Eitrunarmiðstöð Landspítalans og Landlæknisembættið hafa lýst sem stórhættulegu, væri í góðu lagi og ekkert að því að neyta þess. Það er ekki hlutverk Ríkisútvarpsins að auglýsa skottulækningar og það er alvarleg misnotkun á fjölmiðli í eigu þjóðarinnar að gera það. Landlæknisembættið hlýtur að grípa í taumana og sjá til þess að óprúttnir aðilar blekki ekki almenning.
Það hlýtur að vera slúður sem sagt er frá í DV (20.01.2010) að forstöðukona Fjölskylduhjálpar Íslands hafi farið beint úr nokkurra vikna lúxussiglingu um Karíbahaf í afeitrunarmeðferð (detox,sem kallað er á slettumáli ) á Keflavíkurflugvelli. Molaskrifari hélt að svona lúxusferðir væru til hvíldar og til að byggja upp andlegt og líkamlegt heilsufar. Svo virðist ekki vera og því er fólki líklega best að forðast slíkar reisur. Engar vísindarannsóknir hafa sannað að þessi meðferð geri nokkuð nema létta pyngju viðkomandi, enda ekki vitað til þess að nokkur íslenskur læknir leggi nafn sitt við þetta peningaplokk.
Molaskrifari benti í síðasta pistli á að Morgunblaðið ætti að bjóða upp á vefáskrift að dánarfregnum og minningagreinum. Ágætur Molalesandi benti á vefinn andlat.is. Hann er vissulega til,en sá er galli á gjöf Njarðar að hann er ákaflega lítið notaður og kemur því ekki að miklu gagni.
Skildu eftir svar