Glöggur lesandi benti á eftirfarandi í dv.is (22.07.2011): Þess að auki tjáði hann sig mikið í færslum hlekkjaðar við sænskar fréttasíður, og segir: Undanfarið hef ég aðeins verið að rekast á þetta: „Þess að auki….“ í stað „þar að auki“.Sjá dæmi neðarlega í þessari frétt: http://www.dv.is/frettir/2011/7/22/grunadur-um-hrydjuverkaaras-i-noregi/
Þetta er líklega í þriðja skiptið sem ég sé svona tekið til orða og stingur jafn mikið í augun og þegar fyrrverandi þjónustufulltrúinn minn í bankanum skrifaði „greiðslubyrgði“ í tölvupósti til mín. Molaskrifari þakkar sendinguna. Fleira er athugavert í þessari frétt. Tyrifjorden er sagt fjörður en er stöðuvatn eins og hefur komið rækilega fram í fréttum.
Egill benti á eftirfarandi: ,,Óvíst er með tvær fyrstu ferðir Herjólfs á morgun sunnudaginn 24. júlí vegna spár um ölduhæða í Landeyjahöfn.
Þetta stendur á mbl.is núna 24. júlí 2011.
Hvað er ölduhæði eiginlega? Veit það einhver?” Molaskrifari telur ólíklegt að nokkur viti þetta, – utan Hádegismóa.
Af fréttavef Ríkisútvarpsins (24.07.2011): Nafnlausir heimildamenn í bandaríska stjórnkerfinu … Ekki þykir Molaskrifara líklegt að mennirnir hafi verið nafnlausir. Betra hefði verið að segja: Ónafngreindir heimildarmenn, – ekki heimildamenn …
Undarleg ambaga er í undirfyrirsögn á dv.is (25.07.2011): … enda tölum við sannleikann. Þetta ætti auðvitað að vera: … enda segjum við sannleikann. Ótrúlegt.
Ekki virðist það (23.07.2011) hafa hvarflað, að Ríkisútvarpinu eða umsjónarmanni þáttanna ,,Risarnir falla” að leiðrétta eða biðjast afsökunar á alvarlegri rangfærslu í fyrri þættinum. Þar var sagt að Noregur hefði hafnað aðild að EES á áttunda áratug fyrri aldar!
Það var í sjálfu sér góðra gjalda vert hjá Ríkissjónvarpinu, að sýna Jackie Chan mynd (22.07.2011) sem Molaskrifari sá reyndar ekki . En hvernig væri að Ríkissjónvarpið sýndi okkur eins og eina og eina ,,alvöru” kínverska kvikmynd. Þar er af nógu að taka. Ensku heitin á nokkrum kínverskum úrvalsmyndum eru : To Live, Farewell My Concubine, Shower, Beijing Bicycle, Together, The Road Home, The Little Seamstress, Raise the Red Lantern, In the Mood for Love og Blind Shaft. Hægt væri að nefna margar fleiri fyrsta flokks myndir frá Kína.
Það var fínt að endurnýja gömul kynni við Karlakórinn Heklu , myndina hennar Guðnýjar Halldórsdóttur á laugardagskvöld. Hún stendur svo sannarlega enn fyrir sínu og svo var ekki verra að hún var sýnd á kristilegum tíma. Molaskrifari sá myndina í Osló 1996 eða þar um bil og uppgötvaði að Norðmenn hlógu alveg á sömu stöðum og Íslendingar. Molaskrifari fær ekki betur heyrt og sé en íslenska kvikmyndin á sunnudaginn kemur verði einnig sýnd á skikkanlegum tíma.
Oft er gaman að hlusta á þætti útvarpsmannsins langreynda Jónasar Jónassonar á sunnudagsmorgnum í Ríkisútvarpinu. Einkennilegt þótti Molaskrifara þó að heyra Jónas (24.07.2011) í ágætum pistli þar sem kýr komu við sögu alltaf kalla þær beljur. Molaskrifari var ekki mörg sumur í sveit, en nógu mörg til þess að honum var kennt að kalla kýr ekki beljur, nema þá helst, ef þær voru að gera einhvern óskunda.
Í frétt um þyrluslys á fréttavefnum mbl. is.sagði: Orsök slyssins eru enn óljós. Orsakirnar eru óljósar . Og: … þyrla af gerðinni Black Hawk flaug í björgunaraðgerðir að þyrluslysi sem varð 16. júlí. …flaug í björgunaraðgerðir ? Undarlegt orðaleg Af hverju ekki, – var við björgunaraðgerðir vegna þyrluslyss?
Sá grunur læðist að Molaskrifara, að alls óreyndir nýliðar í sumarafleysingum séu settir á næturvaktir fréttastofu Ríkisútvarpsins. Þeim sagt að skrifa og lesa fréttir, en yfirmennirnir sem bera ábyrgð fari heim að sofa. Málfarsráðunautur gengur ekki næturvaktir og virðist raunar ekki hafa sig mikið í frammi á daginn heldur. Sé þetta rétt, eru það óafsakanleg vinnubrögð.
Til að fá inni með grein á leiðaraopnu Moggans þurfa menn að vera á móti ESB. Í dag (23.07.2011) eru þar tvær greinar gegn ESB. Önnur er eftir ungan (gamlan þó í hugsun) Framsóknarþingmann, sem einu sinni var þingmaður VG. Hin er eftir fyrrverandi ráðherra Sjálfstæðisflokksins, sem birt hefur langa greinaröð gegn ESB. Molaskrifari þekkir tvo menn,sem lesið hafa allar greinar ráðherrans fyrrverandi.
Skildu eftir svar