Molaskrifar játar það á sig, að hann áttar sig ekki því hvað andstæðingar Icesave-samningsins eiga við, þegar þeir segja að nú þurfi að kynna málstað Íslendinga erlendis. Hverjum á að kynna hvað ? Það skilja allir sem fylgjast með fréttum að 60% kjósenda sögðust ekki vilja borga Bretum og Hollendinga það fé sem stjórnvöld þar hafa greitt þeim sem Landsbankamenn rændu. Íslensk stjórnvöld Seðlabanki og Fjármálaeftirlitið létu ræningjana komast upp með þetta. Málið er komið í farveg. Í því verður dæmt. Við þurfum fyrst og fremst hæfa lögfræðinga til að flytja okkar mál. Það er regin misskilningur að hefja þurfi einhverja kynningarherferð erlendis.
Umfjöllun fréttastofu Ríkisútvarpsins um niðurstöður kosninganna í sunnudagshádegi var skýr og greinargóð. Á laugardaginn margendurtók fréttastofan ánægjuyfirlýsingar Ólafs Ragnars Grímssonar um mikla kjörsókn. En þar á bæ fór söguleg yfirlýsing Vigdísar Finnbogadóttur beint í ruslakörfuna. Það eru þessi faglegu vinnubrögð sem fréttastofan er alltaf að hæla sér af.
Fyrir nokkru var hér vitnað til ummæla Egils Ólafssonar leikara og söngvara og talið að í þeim væri málvilla. Molaskrifaði afritaði ummæli Egils af vefnum og þar var rangt haft eftir Agli. Málfræðilega var auglýsing hans rétt og er hann beðinn velvirðingar á ummælum um málfar í auglýsingunni. Auglýsingin var hinsvegar skelfilega vond. Ekki má á milli sjá hvor auglýsingin var verri, þessi barnaauglýsing Egils eða hákarlsauglýsing já- sinna.
3 athugasemdir
Ekkert ping ennþá
Eiður skrifar:
15/04/2011 at 12:03 (UTC 1)
Það er mörg snilldin ! Veit ekki betur en tekin hafi verið ákvörðun um það á fréttastofu Ríkisútvapsins að birta ekki yfirlýsingu Vigdísar.
Valur Kristinsson skrifar:
12/04/2011 at 01:25 (UTC 1)
Ég heyrði ekki betur en að yfirlýsing Vigdísar Finnbogadóttur hafi verið í hádegisfréttum RUV á laugardaginn.
Dellukarl skrifar:
11/04/2011 at 11:26 (UTC 1)
„Ég var fyrir utan pósthúsið í Garðabænum þegar ég ætlaði að taka grínmyndband til þess að setja á Facebook og óska öllum gleðilegt sumar,“ segir Sævar Már Kjartansson, sem fyrir hreina tilviljun náði myndbandi af eldingu sem sló niður sunnan við Hafnarfjörð. (Af visir.is)
Lögreglunni á Selfossi barst tilkynning um bifreið sem hafði farið utan vegar laust fyrir miðnætti í gær. Ölvaður ökumaður sat við stýri, en hann hafði ekið bílnum út af Hamarsvegi í Villingaholtshreppi. Maðurinn gisti í fangageymslu lögreglu í nótt.
(Af mbl.is)
Tvö dæmi um snilld íslenskra blaðamanna tekin af handahófi.