Úr mbl.is (11.04.2011). Enn um nefnifallssýki: Sex ára drengur í Flórída hefur verið lýst sem hetju þegar hann varði litla bróður sinn fyrir árás hunds. Hérr hefði átt að tala um sex ára dreng, sem hefði verið lýst sem hetju. Ótrúlega algengt. Meiri nefnifallsýki úr sama netmogga: Flugvélin sem átti að fara fyrr af stað seinkaði. Er mbl.is vísvitandi að spilla tungunni? Það er engu líkara. Hverju seinkaði flugvélin ? Flugvélinni seinkaði. Flugvélin seinkaði ekki neinu. Það gengur einhver laus í grennd við tölvuborð á mbl.is sem ætti að vera í öðrum verkum.
Visir.is (12.04.2011): Suður-kóreska lögreglan er dul á málið en hún vill ekki gefa upp fyrir hvað hvítlauksbóndinn er grunaður um né bróðir hans. Að vera dul á málið er ekki gott orðalag. betra væri : Segir fátt um málið. Svo og er ekki hægt að segja: Fyrir hvað hann er grunaður um. Það nægði að segja: Hað hann er grunaður um.
Í sömu frétt var sagt frá milljónum sem fundust grafnar í hvítlauksakri: Peningurinn fannst grafinn á hvítlauksakri. Hér hefði verið eðlilegra að tala um peninga eða fé.
Í fréttum Ríkisútvarpsins (11.04.2011) kom fram að íslenskum bændum hefði fækkað um 26% á undanförnum tíu árum. Ef skoðaðar eru tölur frá finnsku hagstofunni á vef hennar kemur í ljós að frá árinu 2000 til 2009 fækkaði bændum í Finnlandi um 19,5%. Samt hafa Finnar verið í Evrópusambandinu allan þann tíma ! Voðalegur félagsskapur sem það er þetta Evrópusamband ! Hvað skyldi íslenskum bændum lengi halda áfram að fækka svona hratt, ef við stöndum áfram utan ESB
Molaskrifari lagði það á sig að hlusta svolítið á þrjá Alþingismenn í Útvarpi sögu, en þangað eru reglulega kallaðir fáeinir þingmenn sem eru stjórnendum þóknanlegir, ýmist til að bulla yfir hlustendur eða láta stjórnendur bulla yfir sig. Stjórnendur bulluðu endalaust yfir Jón Gunnarsson (11.04.2011) sem reyndi af veikum mætti að verjast. Svo bulluðu þeir Ásmundur Einar Daðason og Guðlaugur Þór Þórðarson yfir hlustendur í morgunútvarpi (12.04.2011) aðallega um Evrópusambandið. Bóndinn, Ásmundur Einar, hélt því fram að hér á landi muni nýmjólkurframleiðsla að mestu leggjast af, færum við í ESB ! Þessa fáránlegu fullyrðingu hefur Molaskrifari aldrei heyrt áður.
Ekki hefur álitið á Íslendingum hækkað hjá áhorfendum Bloomberg fréttaveitunnar (11.04.2011) við að hlusta á gífuryrði Ólafs Ragnars og dónaskap við fréttamann. Heimamenn eru ekki hissa. Forstöðumaður greiningardeildar Den Danske Bank hefur veitt Ólafi Ragnari ádrepu fyrir framgöngu hans á Bloomberg fréttaveitunni.
Skildu eftir svar