Í hádegisfréttum Ríkisútvarps (05.06.2011) var talað um snjólög, þegar tala hefði átt um snjóalög. Í fréttayfirliti í lok frétta talaði fréttamaður réttilega um snjóalög, en leiðrétti sig og talaði þá um snjólög. Snjóalög eru segir orðabókin: Verulegur snjór á jörð eftir að oft hefur snjóað.
Úr visir.is (05.06.2011): Um helmingur þessara lyfja var ávísað á fullorðna einstaklinga. Hér hefði átt að skrifa: Um helmingi þessara lyfja var ávísað á fullorðna einstaklinga.
Pressan.is (05.06.2011) segir lesendum frá því að rúllustigi hafi byrjað að starfa á ofsahraða. Seint verður sagt, að þarna sé vel að orði komist!
Í fréttum Ríkisútvarps af eldgosi í Síle hefur ítrekað bæði í töluðu máli og rituðu verið talað um fjallagarð. Af vef Ríkisútvarpsins (05.06.2011): Á fjórða þúsund manns þurftu að flýja heimili sín eftir að eldgos hófst í Puyehue fjallagarðinum í Chile í gærkvöld. Erlendir miðlar tala ýmist um Puyehue eldfjallið eða Puyehue fjallgarðinn. Molaskrifari hefur ekki áður heyrt orðið fjallagarður. Kannast lesendur við þetta orð ?
Svavar Halldórsson fréttamaður Ríkisútvarps fær þakkir fyrir að fletta ofan af hjúskapar- og fjölskyldutengslum í sambandi við fyrirhugaða sölu bréfa í Byr, sparisjóðnum sem alltaf var við svo góða fjárhagslega heilsu áður en allt hrundi. Maður var gjörsamlega dolfallinn við að hlusta á lýsingu Svavars, sem ekki hefur verið mótmælt. Höfum við ekkert lært? Heldur þetta fólk að það megi allt? Reglurnar sé bara fyrir ,,hina”. Hvernig ætla stjórnvöld, sem nú eru að reyna að moka flórinn eftir bankabófana, að bregðast við þessum fréttum?
Dæmi eru um að verslanir séu að opna klukkan átta á morgnana, sagði fréttamaður Ríkisútvarps í hádegisfréttum (05.06.2011). Nú spyr Molaskrifari: Hvað eru verslanir að opna klukkan átta á morgnana? Málfarsráðunautur þarf að leiða suma fréttamenn í allan sannleika um notkun sagnarinnar að opna.
Orð hafa mismunandi merkingu í hugum fólks. Í mínum huga þýðir orðið bræla, slæmt veður, slæmt sjóveður, en ekki ofviðri eða afspyrnuslæmt veður. Bræluskítur, eiga sjómenn það til að segja, um leiðinda veður. Í skrifum um sjómannalög í Morgunblaðinu (04.06.2011) segir blaðamaður: Starfið er hættulegt og starfsaðstæður geta verið hrikalegar í brælu. Molaskrifari efast um að margir sjómenn taki undir þetta orðalag. Í sömu grein er líka skrifað um að skera fisk á háls. Þannig hefur Molaskrifari ekki áður heyrt tekið til orða.
4 athugasemdir
Ekkert ping ennþá
Eiður skrifar:
06/06/2011 at 21:48 (UTC 1)
Fréttin um svarta svaninn á Snæfellsnesi er hreint óborganleg. Hvílík snilld !
Adam skrifar:
06/06/2011 at 18:53 (UTC 1)
þú getur líka skoðað http://timinn.is/forsida.aspx
Eiður skrifar:
06/06/2011 at 11:13 (UTC 1)
Dálítið einkennilegt.
MK skrifar:
06/06/2011 at 11:00 (UTC 1)
Hvað finnst þér um þetta: „Í Reykjavíkurhöfn í gær var hinn glæsilegi eikarbátur, Hildur frá Húsavík, smíðaður á Akureyri árið 1974.“
http://www.mbl.is/frettir/innlent/2011/06/06/kvotafrumvorpin_skyggdu_a_sjomannadaginn/