Úr mbl.is (07.06.2011): Flugvellir í Buenos Aires, höfuðborg Argentínu, hafa nú opnað að nýju. Þeim var lokað fyrr í dag vegna öskufalls … Það er líklega að berja hausnum við steininn að gera enn eina athugasemd við ranga notkun sagnarinnar að opna. Flugvellirnir hafa verið opnaðir. Þeir opnuðu hvorki eitt né neitt. Ef sá sem þetta skrifaði hefði verið sjálfum sér samkvæmur hefði hann haldið áfram: Þeir lokuðu fyrr í dag. Sögnina að loka rambaði hann á að nota rétt.
Dálítið undarleg fyrirsögn er í Morgunblaðinu (08.06.2011): Japanir fíla hvalamorðin í ræmur. Í fréttinni er sagt frá því að kvikmyndin Reykjavík Whale Watching Massacre hafi fengið góðar viðtökur í Japan. Enga skýringu er hinsvegar að finna á því um hvaða ræmur sé verið að ræða.
Á vef Ríkisútvarps var frétt um gömul skjöl sem fundist hefðu í geymslu í Háskóla Íslands. Þar sagði í fyrirsögn: Gömul skjöl komast í leitirnar. Hefði átt að vera: Gömul skjöl koma í leitirnar. Í frétt Ríkissjónvarpsins um sama efni var óskiljanleg villa þegar góður fréttaþulur sagði og heyrði ekki villuna: Á þúsund ára afmæli Íslandsbyggð. Íslandsbyggðar hefði það átt að vera. Þetta var rétt í tíufréttum.
Af pressan.is (08.06.2011): Lítill munur er á því að versla vörur hér heima og að fara í verslunarferð til Bandaríkjanna, samkvæmt lauslegri könnun Pressunnar. Pressupenni skilur ekki muninn á sögnunum að versla og að kaupa. Léleg frammistaða..
Tvisvar sinnum í veðurlýsingu (07.06.2011) Veðurstofu Íslands var notað eitt orð um vindátt og vindstyrk. Sagt var: Breytileg. Ekki breytileg átt, eða áttleysa. Undarlegt og illskiljanlegt. Þetta var sagt í veðurlýsingu klukkan 06 40 og aftur klukkan 10 10.
Viðtöl við fólk á förnum vegi í morgunútvarpi Rásar tvö (09.06.2011) um Alþingi voru óvenjulega bitstæð af slíku efni að vera. Þegar sjónvarpsstöðvarnar fara á stjá með myndavél og hljóðnema og spyrja fólk á förnum vegi er það yfirleitt heldur ómerkilegt fréttaefni.
Það er eins og hver annar lélegur brandari, þegar talað er um málstefnu Ríkisútvarpsins meðan auglýsingadeild stofnunarinnar lætur allar reglur lönd og leið og brýtur þær þegar henni sýnist. Samkvæmt reglum Ríkisútvarpsins eiga auglýsingar að vera á lýtalausu máli. Næstum daglega slettir Ríkissjónvarpið á okkur auglýsingu um eitthvað sem kallað er meikóverdagur. Það er ekki lýtalaus íslenska heldur hrognamál, eða ljót sletta og þessvegna brot á reglum og gengur gegn málstefnu Ríkisútvarpsins. Þetta er til skammar.
Ríkisútvarpið fer einnig á svig við reglur um bann við áfengisauglýsingum og auglýsir bjór purkunarlaust. Það er líka til skammar.
Skildu eftir svar