Ég er hér við Elliðaánna, sagði fréttamaður Ríkisútvarpsins skýrt og greinilega í morgunfréttum klukkan átta (20.06.2011). Molaskrifari segir nú bara: Ja, hérna. Í þessari stuttu setningu eru tvær villur. Árnar heita Elliðaár. Ég er hérna við Elliðaárnar, hefði átt að segja. Ef áin héti Elliðaá, sem hún ekki gerir , þá hefði þetta átt að vera: Ég er hérna við Elliðaána. Ekki ánna ! Fréttamenn eiga kunna skil á algengustu örnefnum, þó ekki væri nema í höfuðborginni ?
Það er auðvitað ekki rangt að tala um mataræði þorska, eins og gert var í sexfréttum Ríkisútvarpsins (20.06.2011), en ekki kemur það almennilega heim og saman við málkennd Molaskrifara. Honum hefði þótt eðliegra að tala um æti þorsks á Íslandsmiðum.
Í fréttum Stöðvar tvö á þjóðhátíðardaginn sagði fréttamaður, að forsætisráðherra hefði hvatt Íslendinga til bjartsýnis og er rætt var um klæðaburð, sagði sami fréttamaður, að sumir hefðu borið höfuð yfir herðar í þeim málum. Áður en fréttamenn eru ráðnir, er ágætt að ganga úr skugga um að þeir séu talandi og kunni að beita algengustu orðatiltækjum tungunnar.
Úr dv.is (20.06.2011): Hannelore Kohl eiginkona fyrrum kanslara Þýskalands, Helmut Kohl var nauðgað þegar hún var 12 ára gömul af rússneskum hermönnum. Molaskrifari gerir tvær athugasemdir við þessa setningu. Í fyrsta lagi stýrir sögnin að nauðga þágufalli og í öðru lagi er þarna óþörf þolmyndarnotkun. Betri væri setningin svona: Rússneskir hermenn nauðguðu Hannelore Kohl, eiginkonu fyrrum kanslara Þýskalands, þegar hún var tólf ára gömul.
Í hádegisfréttum Ríkisútvarpsins (20.06.2011) sagði fréttamaður : … sem erfði forsetaembættið af föður sínum. Molaskrifari hallast að því, að hér sé ekki notuð rétt forsetning. Til dæmis hefði mátt segja: .. sem tók forsetaembættið að erfðum eftir föður sinn. Eða: … sem erfði forsetaembættið eftir föður sinn. Eða: … sem tók við forsetaembættinu af föður sínum.
Gagnrýni á æðstu stjórnendur Ríkisútvarpsins fer vaxandi. Margir verða til þess að taka undir það sem Molaskrifari hefur sagt um óstjórnina í Efstaleiti. Margrét Örnólfsdóttir kvikmyndagerðarkona skrifaði grein í Fréttablaðið (20.06.2011) þar sem hún gagnrýnir, að íslenskum kvikmyndum skuli ýtt út í horn, meðan besti tími kvölds ,, er lagður undir eitthvert þriðja flokks mót ófullburða fótboltaliða”. Hún gagnrýnir einnig harkalega efnisröðun í dagskrá. Til dæmis það að hefja sýningu íslenskrar kvikmyndar eftir miðnætti. Sem er auðvitað með endemum. Það er löngu komið í ljós að þeir sem stjórna í Efstaleiti telja störf sín hafin yfir alla gagnrýni.
,,Fann þetta á ráfi mínu hér í netheimi”, segir lesandi,sem þakkar þessi pistlaskrif:
„muslimar á vappi með hundinn og konuna í ól og grjóthnullung i hendinni ef eg fer úrskeiðis“
EF ÉG FER ÚRSKEIÐIS?” Já, það fer svo sannarlega ýmislegt úrskeiðis í skrifum í netheimum.
Skildu eftir svar