Skrifað og skrafað

Einu sinni þótti fínt að sletta dönsku á Íslandi. Nú er þykir fínt að sletta ensku.

Stöð tvö   reynir að laða til sín áskrifendur með enskuslettum í auglýsingu í Fréttablaðinu (03.08.2011). Þar segir:  Vild is  ðe  hól pojnt. Molaskrifara finnst þetta hvorki fyndið né smekklegt. Ef til vill skortir hann bæði kímnigáfu og tilfinningu  fyrir því hvað sé  smekklegt og hvað ósmekklegt. Molaskrifara  finnast þessar enskuslettur umfram allt vera hallærislegar.  Hann hvetur   ráðamenn Stöðvar tvö til að nota móðurmálið til að laða til sín viðskiptavini, – ekki erlendar slettur.

Stundum fær Molaskrifari orð í eyra fyrir að  vera of neikvæður í garð  Ríkisútvarpsins. Víst er, að þar má að mörgu finna. Síðasta skemmdarverkið er að breyta nafni stofnunarinnar í skammstöfunina RÚV og kasta heitinu  Ríkisútvarp fyrir róða. Þarna er auðvitað ekki við starfsfólk að sakast. Þetta er   ákvörðun æðstu stjórnenda sem trúað hefur verið fyrir þessu fjöreggi íslenskrar menningar. Valdalaus stjórn stofnunarinnar hefur sennilega ekkert  með málið að gera. Þrátt fyrir gagnrýni, sem stundum er sjálfsagt nokkuð hörð, má ekki  gleyma því að Ríkisútvarpið, sér í lagi Rás eitt,  flytur mikið af vönduðu úrvalsefni og hefur á að skipa  hæfum dagskrárgerðarmönnum. Talsvert af þessu efni er endurflutt á nóttinni. Það var mikil breyting til  batnaðar er sá háttur var upp tekinn í stað þess að flytja ókynnta tónlist í síbylju. Molaskrifari hlustar  ekki mikið á útvarp yfir daginn en  hlustar oft á Rás eitt á nóttinni. Heyrði þar  til dæmis aðfararnótt miðvikudags (03.08.2011) prýðisgott viðtal við Guðmund  Stefánsson, píanóstilli. Takk fyrir það. – Það gleður svo gamalt nöldurhjarta að fá  tölvubréf  frá  ungu fjölmiðlafólki, sem  þakkar það aðhald sem það segir Molana veita. Það er þá ekki talað fyrir alveg daufum eyrum.

Úr mbl.is (02.08.2011): Borgarstjóri Vilníusar, höfuðborgar Litháen, hefur gripið til þess ráðs að aka yfir bíla sem eru lagðir ólöglega á skriðdreka. Hér er talað um bíla ,sem lagðir séu ólöglega á skriðdreka. Eðlilega  væri að tala um að aka skriðdreka yfir bíla sem lagt hefur verið ólöglega. Þar að auki er myndin sem birt er með fréttinni ekki af skriðdreka. Í dv.is er einnig talað um skriðdreka. Nær væri að tala um bryndreka.

Þáttur þeirra Egils Helgasonar og Örlygs Kristfinnssonar þar sem þeir gengu um  götur á  Siglufirði (02.07.2011) var fyrsta flokks sjónvarpsefni í alla staði. Þess var getið í prentaðri dagskrá í dagblöðunum að  þátturinn væri endursýndur kafli úr Kiljunni. Þess var hinsvegar ekki getið þegar þátturinn var kynntur í  sjónvarpinu, bæði fyrir fréttir og áður en sýning hans hófst.  Það er ekkert að því að endursýna gott efni. Það er hinsvegar vafamál hvort endursýna á efni á besta  tíma í kvölddagskrá og fráleitt að segja áhorfendum ekki að um endursýnt  efni sé að ræða.

Dæmi um klaufalega þolmyndarnotkun var í fréttum Ríkissjónvarps (01.08.2011):  Svo virðist sem fólkið hafi verið skilið eftir af þeim sem áttu  að  flytja  þau (svo!) til  Evrópu.  Betra   og skýrara hefði  verð að segja: Svo virðist að þeir sem áttu að  flytja  fólkið  til Evrópu hafi  skilið það eftir. Germynd er alltaf betri.

Þessi frétt á  visir.s er ekki vel skrifuð né heldur ber hún um vott um mjög skýra hugsun þess sem skrifar: http://www.visir.is/ruv-matti-afhenda-lista-um-umsaekjendur/article/2011110809861  Ristjórar visir.is athugi það.