Óskandi væri að einhver gæti fengið stjórnendur Ríkissjónvarpsins til að hætta að sýna okkur dellumyndir, sem eru sérhannaðar fyrir ameríska táninga, á besta áhorfstíma á föstudagskvöldum. Myndin sem sýnd var í kvöld (05.08.2011, College Road Trip) fær einkunnina 3,7 af 10,0 á Inernet Movie Database!
Kolaportið auglýsir í fylgiriti Morgunblaðsins (04.08.2011): Komdu og verslaðu allskyns vörur, … Molaskrifari verslar stundum í Kolaportinu. Kaupir fiskmeti og fleira. Hann verslar aldrei vörur. Hann kaupir vörur.
Heldur fer harðnandi slettu- og amböguhríðin í slúðurþáttum Ríkisútvarpsins af leikaraslóðum í Hollywood sem þessi menningarstofnun telur nauðsynlegt andlegt fóður fyrir þjóðina á föstudagsmorgnum. Í morgun (05.08.2011) var þar talað um að kaupa outfit á eiginmanninn (fatnað, – hann á svo einfaldan fatasmekk!), bridal showers, baby showers (e.k. gjafaboð eða veislur), skvísan hafi bara rakkað upp kreditkortareikning upp á .. , gerði gott um betur. Upptalningin gæti verið langtum lengri. Umsjónarmaður talaði um ladies´man kvenhollan mann eða kvennagull og sagði við okkur: Ég , bara blöskraði !
Í slúðurpistlinum sem vikið er að hér að ofan talaði höfundur um að rugla saman reytum í merkingunni að ganga í hjónaband, giftast. Molaskrifari hugsaði með sér: Jæja, blessaðri konunni er þá ekki alls varnað. Gamanið kárnaði hinsvegar þegar konan fór að tala um að reitirnir hjá þeim hefðu eitthvað farið að ruglast ! Reytur eru litlar eða óverulegar eigur,en reitur, flt. reitir, er hinsvegar afmarkað svæði, kirkjugarður er helgur reitur, reitur er líka einn sextíu og fjögurra ferninga á skákborði.
Allt er þetta auðvitað afar mikilvægur og ómissandi þáttur í svokallaðri málstefnu Ríkisútvarpsins og hinn mesti menningarauki.
Arndís Vilhjálmsdóttir sendi eftirfarandi: ,,Síðastliðið þriðjudagskvöld sátum við hjónin og horfðum á sjónvarpið eins og svo oft áður.
Þar auglýsti dagskrárkynnirinn breskan sjónvarpsþátt um E-efni. Í kynningunni kom eftirfarandi fram:,,Í þáttunum athugar Gates hvort sú sé raunin og eins ætlar hann sér að bragða á sem flestum af E-efnunum 319 og hann mögulega getur“
Þetta má einnig sjá á vef RÚV: http://dagskra.ruv.is/nanar/11802/ auk nokkurra stafsetningavillna.
Manni finnst hart að borga 17 þúsund á ári fyrir ríkismiðil, sem hefur ekki meiri metnað en þetta!” Molaskrifari þakkar sendinguna.
Alli sendi Molum eftirfarandi: ,,Í hádegisfréttum Bylgjunnar í dag var talað um hlaup í Skaftá og sagt eitthvað á þá leið að hlaup í síðustu viku hafi komið úr VESTARI katlinum, en það hlaup sem nú vofir yfir komi úr EYSTRI katlinum.
Væri ekki réttara að tala annað hvort um VESTRI og EYSTRI eða VESTARI og AUSTARI?
Ég man nú reyndar ekki eftir að hafa heyrt VESTRI notað um áttir, en það er til íþróttafélag með því nafni “. Máltilfinning Molaskrifara er sú , að tala megi bæði um vestari og vestri og eystri og austari. Líklega ræður staðbundinn málvenja mestu um það hvernig þessi orð eru notuð.
Þýskum börnum fækkar ört, er dálítið undarleg fyrirsögn á fréttavef Ríkisútvarpsins (05.08.2011). Ekki er þetta rangt. Verið er að segja frá því að hlutfall barna undir 18 ára aldri af heildarfjölda íbúa í Þýskalandisé nú um stundir lægra í Þýskalandi en nokkru öðru Evrópulandi.
Skildu eftir svar