Skrifað og skrafað

Í fréttatíma Stöðvar 2 ( 13.01.2013) var sagt um Mubarak fyrrum Egyptalandsforseta …. svara til saka fyrir þau voðaverk sem hann framdi í valdastóli. Hér hefði farið betur á að segja til dæmis: .. sem hann framdi meðan hann sat á valdastóli. Í íþróttafréttum á Stöð tvö var sagt að Ísland hefði svarað með þremur mörkum og ekki litið til baka eftir það ! Að venju var talað um knattspyrnumann sem hefði verið sjóðheitur í allan vetur.

Molalesandi vitnar í frétt á mbl.is (14.01.2013): ,,Mjólkurbúið KÚ telur skýringar Mjólkursamsölunnar á gríðarlegri mismunun við verðlagningu á mjólk annars vegar til Mjólku ehf. sem er í eigu Kaupfélags Skagfirðingar/Mjólkursamsölunnar og til mjólkurbúsins KÚ ehf. vera ótrúverðugar og ósannar.” Hann segir: ,,Nafnið á fyrirtækinu er út úr kú. Það er ekkert erfitt að beygja belju. En kýr beygist kýr-kú-kú-kýr. Jafnvitlaust væri að nefna fyrirtæki í hestamennsku: Ferðaþjónustan hest.“ Reyndar er fleira athugavert við þessa frétt mbl.is en nafnið á fyrirtækinu !

Í kvöldfréttum Ríkisútvarps (13.01.2013) var fjallað um mótmæli í Frakklandi vegna hjónabanda samkynhneigðra. Þar var sagt: …væru mótfallnir því að samkynhneigðir gætu gengið í hjónabönd. Hér hefði verið eðlilegra að nota eintöluna, … gætu gengið í hjónaband.

Gunnar skrifaði (13.01.2013): „… vann einnig til tveggja gullverðlauna …“ sagði Edda Sif Pálsdóttir í sjónvarpsfréttunum í dag, laugardag. Auðvitað var unnið til tvennra verðlauna.
Ég horfði einnig á sjónvarpsþáttinn HA? í ólæstri dagskrá á Skjá einum í gær. Þar var maður að nafni Gunnar Sigurðarson sem gat varla látið út úr sér óbrenglaða setningu og gjöreyðilagði þáttinn þar með. T.d.: „… svo lengi sem …“ (e. as long as, sem er svo framarlega eða svo fremi, á íslensku), sofnaði í Álftavatni á bát, hann er ekki að vera vondur, spreyta sig í þessu … o.fl.
Páll Óskar, í sama þætti: „Ég gruna …“ Mig grunar hefði hann betur sagt. Já, fólki gengur misvel að koma frá sér óbrengluðum texta.

Á vef Ríkisútvarpsins segir (14.01.2013): Jón Bjarnason í engum nefndum. Hefði ekki verið eðlilegra að segja. Jón Bjarnason ekki í nefndum ?

Þannig er tekið til orða í frétt á visir.is (14.01.2013): … hvernig tveir íslenskir íþróttamenn úr kraftagreinum hefðu verið bráðkvaddir árið 1993. Þetta er ekki í samræmi við málvenju. Menn eru ekki bráðkvaddir, heldur verða bráðkvaddir þegar þeir deyja skyndilega og án sýnilegs aðdraganda.

Fyrirvari: Athugasemdir frá öðrum á þessari síðu eru á þeirra ábyrgð. Síðuskrifari áskilur sér rétt til að fjarlægja dónaleg eða meiðandi ummæli, nafnlausar athugasemdir eða athugasemdir undir dulnefni. – ESG