Í ferðamálariti las Molaskrifari um sveitaveg ,sem sagður var kræklóttur. Fannst þetta einkennilega til orða tekið , hafði ekki heyrt orðið kræklóttur notað, nema um tré. En orðabókin segir: Kræklóttur, – margboginn ,hlykkjóttur. Svo lengi lærir sem lifir.
Oft er ruglað saman forsetningunum af og að . Það henti Jónas Kristjánsson í bloggi hans (16.01.2010) er hann sagði: .. en megn skítalykt er að Hermanni Sæmundssyni ,sem segist hafa unnið skítverkið fyrir ráðherrann. Líklegast er þetta innsláttarvilla hjá JK svo Molaskrifari sýni velvild. Það er lykt af einhverju eða eitthvað lyktar vel eða illa eftir atvikum. Það getur aldrei verið lykt að einu eða neinu.
Molaskrifari las auglýsingu um mann sem væri „viðurkenndur ristilskolari”. Er þetta orðin viðurkennd atvinnugrein á Íslandi ? Hve lengi ætla heilbrigðisyfirvöld að láta það viðgangast að almenningur sé féflettur með þessum skottulækningum ? Það léttist ekkert nema budda þolendanna í þessu svo kallaða „detox” eða afeitrunarrugli.
Molavinur sendi eftirfarandi:
„Páll Benediktsson, upplýsingafulltrúi skilanefndar Landsbankans, skrifar frétt í DV í dag þar sem hann gagnrýnir fréttaskrif DV um útibússtjóra Landsbankans í London, Baldvin Valtýsson. Páll skrifar: „Að stía Baldvin saman við Icesave og uppnefna hann „Icesave-stjóra“ er þannig kolrangt og í hæsta máta ósanngjarnt.“
Ég kannast við orðatiltækið að stía einhverjum í sundur í merkingunni að aðskilja. Að stía einhverju saman kannast ég þó ekki við og finn engin dæmi í uppflettiritum. Líklega er Páll að rugla saman sögninni að stía og spyrða eitthvað saman, sem merkir að tengja.
Páll hefði að vísu getað sagt, að það væri ósanngjarnt að setja Baldvin í sömu stíu og Icesave; það hefði verið snjöll líking, enda Icesave-málið afleiðing af svínaríi fjárglæframanna”.
Kærar þakkir fyrir þetta. Að stía í sundur er myndræn og gegnsæ lýsing á því að aðskilja eitthvað eða einhverja. Sama gildir um að spyrða saman , þótt sjálfsagt fari þeim fækkandi sem vita hvað fiskspyrða er.
Takk fyrir , Ingólfur Bjarni Sigfússon, að tala um Stjórnarráðshúsið ( ekki stjórnarráðið) í sjónvarpsfréttum RÚV (18.01.2010).
Skildu eftir svar