Á Jónsmessumorgni (24.06.2011) bjó Molaskrifari sig undir að hlusta um stund á morgunútvarp Rásar tvö en var fljótur að flýja, þegar boðað var viðtal við sérstaka slúðurfréttakonu morgunútvarpsins, sem dreifir leikaraslúðri frá Bandaríkjunum yfir hlustendur á föstudagsmorgnum. Slúðurþættirnir eru ævinlega mikill ambögusjóður og makalaust að Ríkisútvarpið skuli reglubundið og markvisst dreifa efni af þessu tagi.
Molaskrifari flúði þá á náðir Bylgjunnar og heyrði þar viðtal við bæjarstjórann í Garðinum og blaðamann Víkurfrétta um Sólseturshátíðina sem var í Garðinum um helgina. Bæjarstjóri gat helstu viðburða en sleppti þó sólsetursgöngunni frá Stóra Hólmi í Leiru að Garðskagavita á fimmtudagskvöld. Það var skemmtileg. næstum þriggja tíma ganga og ógleymanlegt að sjá sólina ganga til viðar í vestrinu klukkan fjórar mínútur yfir tólf á miðnætti þegar Jónsmessunóttin fór í hönd og gönguhópurinn, líklega um 70 manns, var að koma að Garðskagavita. Óvíða er sólarlagið fegurra en í Garðinum. Eins og góðum Sjálfstæðismanni sæmdi notaði bæjarstjórinn tækifærið og skammaði ríkisstjórnina meðan hann sagði hlustendum Bylgjunnar frá Sólseturshátíðinni. Þó það nú væri.
Það kom fram í viðtalinu við Ásmund sveitarstjóra í Garðinum að svolítinn olíuflekk hefði rekið á fjöruna við gamla vitann. Leitað hefði verið til Umhverfisstofnunar um að hreinsa fjöruna. Stofnunin hefði ekki viljað koma nálægt málinu að sögn sveitarstjóra. Óneitanlega vakna spurningar um það hverskonar stofnun Umhverfisstofnun sé orðin. Henni koma umhverfismál greinilega ekki mikið við. Brunavarnir Suðurnesja aðstoðuðu við að hreinsa olíuna úr fjörunni.
Þeir sem framleiða svokallaðan Holtakjúkling halda líklega að Íslendingar éti fleiri kjúklingabringur ,ef þær heita ensku nafni, Royalbringur. Þeir sem selja hamborgara í sjoppum sem heita Metro eru haldnir svipaðri firru þeir bjóða upp á Big Royal hamborgara, DC Double Cheese. Varla verður sagt að hugmyndauðgin sé mikil eða sjóndeildarhringurinn víður hjá slagorðasmiðum þessara fyrirtækja. Enska er ágæt til síns brúks, en draga má í efa að hún hafi lystaukandi áhrif.
Þegar rætt er um auglýsingar á ensku, þá kemur í hugann að í Ríkisútvarpinu er í auglýsingum talað um bed and breakfast. Þar eiga allar auglýsingar að vera á lýtalausri íslensku. Kannski heldur auglýsingadeildin að þetta sé íslenska. Þar á bær hafa menn líklega aldrei heyrt um hina prýðilegu þýðingu, ból og biti, sem Molaskrifari man ekki betur en sé ættuð frá Færeyjum.
Í fréttatíma Ríkissjónvarpsins (24.06.2011) var fjallað um kynferðislegt ofbeldi,sem nemendur Landakotsskóla sættu af hálfu starfsmanna kaþólsku kirkjunnar. Sagt var: Meint kynferðisofbeldi starfsmanna kaþólsku kirkjunnar hér á landi hafa komist í hámæli eftir að Fréttatíminn …. Ofbeldi er eintöluorð, – ekki til í fleirtölu. Þessvegna hefði átt að segja, að ofbeldi hefði komist í hámæli….
Nú er það orðið svo í Ríkisútvarpinu að orðið Ríkisútvarp er bannorð. Ef þulir eða fréttamenn missa út úr sér orðið Ríkisútvarpið, leiðrétta þeir sig strax eins og þetta hafi verið mismæli og segja RÚV. Þetta hljóta að vera fyrirskipanir æðstu stjórnenda Ríkisútvarpsins. Þeim eru mislagðar hendur um margt.
4 athugasemdir
Ekkert ping ennþá
Eiður skrifar:
27/06/2011 at 19:25 (UTC 1)
Sæll Þorkell, ég tók reyndar eftir þessu líka. Má ég ekki nota þessar línur frá þér, undir nafni eða nafnlaust. Vinsamlega svaraðu mér á esg1@simnet.is
Þorkell Guðbrands skrifar:
27/06/2011 at 15:15 (UTC 1)
Tók eftir þessu áðan:
http://www.visir.is/starfsmadur-lyfja-og-heilsu-dro-ad-ser-fe/article/2011110629171
Þegar maður er kominn á áttræðisaldur verður maður sjálfsagt nöldrunargjarn og leiðinlegur. En fram eftir öllum aldri vandist ég því að það væri talað um að menn „drægju sér fé“ ef þeir tóku fé ófrjálsri hendi, sem þeir höfðu (oftast) umsjá með. Nú sér maður varla talað um annað en að „draga AÐ sér fé“ eins og í þessari frétt.
Manni virðist sem nú til dags ruglist fólk oft á „að“ og „af“. Fólk talar um að „leita af“ þessu eða hinu, þegar manni finnst að tala ætti um að leita að einhverju. Svo er þetta að hafa gaman af og þykja gaman að, sem virðist vefjast fyrir fólki. Í rituðu máli, einkum í bloggheimum, sýnist manni að þessu hafi verið snúið á hvolf.
Eiður skrifar:
27/06/2011 at 00:11 (UTC 1)
Jú,jú. Ekki nógu nákvæmt.
Lilja skrifar:
26/06/2011 at 22:56 (UTC 1)
Eiður – er það ekki einn og sami maðurinn sem þú ýmist nefnir bæjarstjóra eða sveitarstjóra í Garðinum?