Íþróttahús þjóðarinnar , Ríkisútvarpið í Efstaleiti, breytir sjónvarpsdagskránni fyrirvaralaust, þegar íþróttir, einkum boltaleikir, eiga í hlut. Dagskráin í gærkveldi (18.04.2011) var lítið nema boltaleikir. Það er alltaf verið að misbjóða þeim sem ekki elska boltaleiki. Það er eins og íþróttadeildin sé einráð í Efstaleiti.
Gaman var að sjá snotra frétt frá Færeyjum í fréttatíma Ríkissjónvarpsins (18.04.2011). Það er sárasjaldan að við fáum fréttir af grönnum okkar í Færeyjum og á Grænlandi. Heyrir eiginlega til undantekninga. Mættum við fá meira að heyra, – og sjá.
Algengt er að ruglað sé saman orðtökunum að eitthvað fari út um þúfur og eitthvað renni út í sandinn. Hvorttveggja þýðir að eitthvað misheppnist eða gangi ekki eftir. Í fréttatíma Stöðvar tvö (17.04.2011) var talað um að samningaviðræður hefðu runnið út um þúfur. Það er rangt eins og að ofan segir.
Seint verður sagt að fréttaflutningur Morgunblaðsins af fjárdrætti í Valhöll sé ítarlegur.
Fréttamaður Ríkissjónvarps (17.04.2011) talaði um mann, sem hefði verið með rollur á bænum. Minn gamli yfirmaður á fréttastofunni, Emil Björnsson, hefði krotað hressilega í svona orðalag. Það er víst enginn lengur sem krotar í eitt eða neitt á fréttastofu Ríkisútvarpsins.
Í vaxandi mæli ávarpa fyrirtæki og framleiðendur okkur á ensku í íslenskum fjölmiðlum. Íþróttavöruframleiðandinn Adidas er með heilsíðuauglýsingu í DV (18.04.2011) . Textinn í auglýsingunni er ein setning. Adidas is all in. Hversvegna gera fyrirtæki þetta?
Það var áreiðanlega óviljandi brandari hjá fréttastofu Ríkisútvarpsins (17.04.2011) að iðandi hringirnir og bogarnir í bakgrunninum komu stundum út eins og geislabaugur um höfuð útvarpsstjórans, þegar hann las fréttir í mynd.
Molaskrifari sá og heyrði brot úr síendurteknu Hrafnaþingi (17.04.2011) þar sem í forsæti var Hallur Hallsson. Hann djöflaðist á Steingrími J. fyrir að hafa ekki farið til Strassborgar að halda ræðu fyrir Íslands hönd í miðju kraðakinu ,sem Sjálfstæðisflokkurinn skapaði hér. Samfylkingarþingmaður við borðið kunni ekki að svara, sagðist ekki þekkja málið. Undarlegt. Hvað hefðu þeir ÍNN menn sagt ef Steingrímur hefði farið til Strassborgar. Til dæmis þetta: Steingrímur hleypur úr landi til að tala við Evrópuráðið ! Ekki ólíklegt. Málflutningurinn á ÍNN er oft ótrúlega líkur Útvarpi Sögu, enda var sérlegur fulltrúi útvarpsstöðvarinnar á þessu Hrafnaþingi.
Molalesandi sendi eftirfarandi: Í kvöldfréttum sjónvarps var sagt: ,,Mikið MAGN af gömlum húsum“ og svo komu myndir af húsunum.
Þetta orðalag er hreinlega bull og ég man að Jón Múli og Pétur P. andmæltu þessum talsmáta í auglýsingum”. Molaskrifari er sammála.
5 athugasemdir
Ekkert ping ennþá
Gunnar Guðmundsson skrifar:
19/04/2011 at 22:20 (UTC 1)
Molar Eiðs Guðnasonar um málfar eru afar kærkomnir og þarft að glöggur reynslubolti veiti málfarslega slökum fréttaskrifurum aðhald. Setji ofan í við þá. Þeir ættu að taka því fagnandi.
Engin önnur stofnun samfélagsins er í víðlíka stöðu og RÚV til að ástunda rétt og gott málfar, skýran stíl og framsögn og hafa þannig jákvæð og mótandi áhrif á þróun tungumálsins. Má ég þá frekar biðja um raddir Jóns Múla, Magnúsar Bjarnfreðssonar eða Helga Hjörvars, – fremur en ,,ofaníbringu“ muldrið sem og oft brennur við hjá sumum.
Haukur Kristinsson skrifar:
19/04/2011 at 15:18 (UTC 1)
Hef tekið eftir því að margir eiga erfitt með að skrifa “en” rétt, skrifa það með tveimur n-um. Þetta finnst mér skrítið, því framburðurinn er svo ólíkur og segir skýrt til um réttritun. Nú minnist ég þess að í einum ummælum hér á síðu Eiðs fyrir all löngu, hafi verið vakin athygli á því að margir séu hættir að bera fram “langt” e, eins og gera skal í orðinu en. Þetta gæti verið skýringin.
Gunnar M. skrifar:
19/04/2011 at 14:11 (UTC 1)
Molaskrifari ritar: „Dagskráin í gærkveldi (18.04.2011) var lítið nema boltaleikir. Það er alltaf verið að misbjóða þeim sem ekki elska boltaleiki.“
Ritháttinn ‘kveld’ er sjálfsagt að nota ef á sama hátt er ritað ‘smér’ og ‘ket’. Að öðrum kosti er það undarleg sérviska.
Sögnin að elska hefur tekið stökkbreytingu á undanförnum misserum, nú um stundir ‘elska’ allir hitt og þetta, einn elskar að hlaupa, annar elskar að borða, þriðji elskar ekki rúsínur og fær sér döðlur í staðinn. Hvað varð um að þykja gott, hafa gaman að, líka eða þykja skemmtilegt?
Kristján skrifar:
19/04/2011 at 12:54 (UTC 1)
RÚV elskar handbolta. Þessa boltaíþrótt sem er örsmá í hinum stóra heimi íþrótta. Hvað þarf eiginlega að gerast til að RÚV fái sérrás fyrir þetta ?
Karl P. skrifar:
19/04/2011 at 10:26 (UTC 1)
RÚV ber alveg jafnmikil skylda til að sýna íþróttir og aðra dagskrá. Sérstaklega oddaleik í undanúrslitum Íslandsmótsins í handbolta, ég tala nú ekki um þar sem RÚV er með sjónvarpsréttinn á handboltanum.
Hvernig heldurðu að fólki sem hefur mestan áhuga á íþróttum líði þegar RÚV er að sýna nokkurra ára gamla þætti um sæotraveiði í barentshafi sem fylgdi frítt með í einhverjum innkaupapakka frá DR1 eða NRK?
Þá er þú auðvitað í essinu þínu en aðrir standa upp frá sjónvarpinu og fara gera eitthvað annað. Þú þarft ekki að væla í hvert einasta skipti sem sýndur er íþróttakappleikur í sjónvarpinu.
Og reyndu einu sinni að hugsa í hlutföllum. Hversu stór hluti dagskrár RÚV heldurðu að séu íþróttir? Það er alveg sáralítið hlutfall. Málið er bara að þú getur ekki gleymt því þegar þú sérð íþróttir.
Íþróttadeild RÚV hefur barist hatrammlega við yfirboðara sína um að reyna fjölga efni því á tímapunkti var þetta orðið nánast ekki neitt sem var sýnt. Til allrar lukku hefur það tekist.