Í daglegu máli í morgunþætti Rásar eitt (18.04.2011) var um það rætt, að ekki væri í íslensku til eitt orð yfir þeyttan rjóma. Á dönsku væri talað um flødeskum. Á ensku er hinsvegar talað um whipped cream. Það rifjaði upp fyrir Molaskrifara að hann hefði rekist á orð sem notað er yfir þeyttar ísblöndur, en það er nafnorðið þeyta. Sér raunar í íslenskri orðabók að orðið þeyta er þar til, (eðlisfræði/efnafræði) og þýðir þá upplausn. Þeyta væri annars prýðilegt orð yfir þeyttan rjóma, en þeirri orðanotkun sem nú tíðkast, verður varla breytt.
Bjarki M. Karlsson fréttamaður hjá Ríkisútvarpinu sendi Molum andmæli við eftirfarandi klausu úr pistli nr. 588:
„Um tvö hundruð þúsund manns voru hrakin frá heimilum sínum, var sagt í fréttum Ríkissjónvarps (15.04.2011). Molaskrifari er á því að hér hefði átt að segja: Um tvö hundruð þúsund manns voru hraktir frá heimilum sínum.“
Hér var vandað til málfars í fréttinni en ráðleggingin þeim mun lakari. Þegar eignarfallseinkunn stendur með fallorði stjórnar fallorðið (orðið sem er ekki í eignarfalli) tölu og kyni sagnar og sagnfyllingar, ekki eignarfallseinkunnin eða merking hennar.
Helmingur kvennanna var beittur misrétti. Ekki voru beittar. Helmingurinn var beittur.
21 prósent bæjarbúa kaus flokkinn. Ekki kusu. 21 prósent kaus.
Um tvö hundruð þúsund manns voru hrakin. Ekki hraktir. Þúsundin voru hrakin.
Hitt er svo annað mál að líklega er tungumálið að þróast á þann veg sem ábending þín gefur til kynna. Nú má vel vera að slík þróun sé meinalaus og verði að lokum ofan á. Mér finnst nú samt óþarfi að málvöndunarmenn og fréttastofur dragi þann vagn. “
Molaskrifari þakkar Bjarna og viðurkennir fúslega að sér hafi hér skjöplast.
Orðbragðið í Útvarpi Sögu er á stundum svo sóðalegt að með ólíkindum er. Á dögunum heyrði Molaskrifari þar talað um að hreinsa þyrfti út úr Alþingishúsinu. Það er svo sem ekki nýtt. Það var hinsvegar nýtt að heyra talað um að brenna ætti allt innan úr húsinu eins og gert var í þessu tilviki. Í kringum þessa stöð hefur myndast einskonar söfnuður,sem er alveg sérstaklega orðljótur. Vonandi taka ný fjölmiðlalög á svona subbuskap. Það er óþolandi þegar átölulaust dreift er rógi og ósannindum um nafngreinda einstaklinga.
4 athugasemdir
Ekkert ping ennþá
Bensi skrifar:
20/04/2011 at 21:34 (UTC 1)
Anna María; það er mikið rétt. Arnþrúður var ein af „vonarstjörnum“ þess skrítna fyrirbrigðis sem kallað er framsóknarflokkur.
Eiður skrifar:
20/04/2011 at 19:54 (UTC 1)
Arnþrúður Karlsdóttir hefur margsagt að ég sé með ,,milljón á mánuði í eftirlaun.“ Haugalygi,sem hefur bakað mér ýmis óþægindi. Hún hefur líka sagt:,,Hver tekur mark á Eiði Guðnasyni. Hann er alltaf fullur.“ Fyrir nú utan það að hóta konu minni. Líklega ætti ég að stefna kerlingunni. Það er kannski að gera henni of hátt undir höfði.
stefan benediktsson skrifar:
20/04/2011 at 19:23 (UTC 1)
Bind nokkra von við þetta frumvarp. Bendi á FOX og SKY. Tvær sjónvarpsstöðvar í eigu sama manns en í gjörólíku lagaumhverfi. Frumvarpið tekur m.a. mið af Breskri löggjöf.
Anna María Sverrisdóttir skrifar:
20/04/2011 at 18:56 (UTC 1)
Ekki heyrði ég þessi ummæli á Sögunni enda eru margir mánuðir síðan ég hlustaði á stöðina og hef varla heyrt í henni nema óvart í fáeinar mínútur í senn. Þetta rímar samt ágætlega við það sem ég heyrði svo oft þaðan. Ég sé að þessi ummæli þín Eiður eru nú komin á dv.is svo einhver virðist hafa brugðist við. Arnþrúður gagnrýnir þig Eiður sem fulltrúa gamallar pólitískrar stéttar. Misminnir mig eða var hún ekki einu sinni á þingi sjálf og mistúlka ég hlutina þegar ég segi að hún sé rammpólitísk?