Nágrannavarsla , segja vinir mínir í Garðinum (RÚV 24.08.2009) um það fyrirkomulag er menn huga að óvenjulegum mannaferðum við hús fjarverandi nágranna. Gott og skynsamlegt, en orðið nágrannavarsla er klúður. Af hverju ekki Grannagát ?
Vonandi útskýrir málsfarsráðunautur RÚV fljótlega fyrir fréttamönnum muninn á orðunum eftirmáli og eftirmál. Það liggur við að fréttamenn flaski á þessu í hverri einustu viku. Í hádegisfréttum RÚV (23.08.2009) var talað um tvær minniháttar líkamsárásir sem kunna að hafa eftirmála. Eftirmáli er niðurlagsorð eða texti aftan við meginmál. Eftirmál eru afleiðingar eftirköst eða rekistefna vegna einhvers verknaðar. Þetta eru dæmi úr Íslenskri orðabók. Fréttamaður hefði átt að segja að líkamsárásirnar kynnu að hafa í för með sér eftirmál. Þessi sama ambaga var endurtekin í sjónvarpsfréttum RÚV kl 1900. Annaðhvort hlustar enginn í Efstaleitinu eða þar heyrir enginn. Nema hvort tveggja sé.
Í þessum sama fréttaíma sagði fréttamaður :…. og vísar til frelsi fjölmiðla. Vísað er til einhvers. Þess vegna hefði átt að segja .. og vísar til frelsis fjölmiðla. Vísa ætti þeim sem þetta sagði til vegar um vegi tungunnar.
Í Morgunblaðinu bls. 25 (23.08.2009) er auglýsing um ágæti heyrnartækja. Sagt er að tækin séu Nánast því ósýnileg. Ekki kann Molahöfundar að meta þetta orðalag. Betur færi á því að þarna væri sagt að heyrnartækin væru nánast ósýnileg eða næstum því ósýnileg. Mér finnst þetta enn eitt dæmi um klaufalegt orðalag auglýsenda. Hef aldrei heyrt að eittthvað sé nánast því ósýnilegt eða sýnilegt. Kannski sérviska mín. Mér finnst þetta ótækt orðalag. En það gæti verið að markaður væri fyrir þessi ágætu heyrnartæki í Útvarpshúsinu í Efstaleiti.
5 athugasemdir
Ekkert ping ennþá
Eiður skrifar:
25/08/2009 at 19:47 (UTC 1)
Grenndargát er betra.
Eiður skrifar:
25/08/2009 at 18:16 (UTC 1)
Þeir á Vefdv eru þungavigtarmenn. Um ástand þeirra fullyrði ég ekkert.
Jóhanna Geirsdóttir skrifar:
25/08/2009 at 18:07 (UTC 1)
Og hér er önnur perla af dv.is:
Greinilega ekki ásláttarvilla!
Piltur um tvítugt sem handtekinn var í gær í Hafnarfirði í tengslum við sprengjuhótun í Borgarholtsskóla játaði við yfirheyrslur í dag að hafa hringt inn hótunina. Um gabb var að ræða en pilturinn var í annarlegu ástandi. –
… Maðurinn var handtekinn í heimahúsi í Hafnarfirði í gær, eins og áður segir í annarlegu ástandi, og var hann látinn sofa úr sér.
Sverrir Friðþjófsson skrifar:
25/08/2009 at 17:34 (UTC 1)
Hér er ein perlan frá DV.is :
Abdelbaset al Megrahi. Líbíumenn tóku honum sem hetju og tóku á móti honum með vigtum eftir að skosk stjórnvöld ákváðu að sleppa honum lausum af mannúðarástæðum.
Aðalsteinn Geirsson skrifar:
25/08/2009 at 08:27 (UTC 1)
Þetta hefur ekki plagað mig en ábendingin er góð. En ef grannarnir eru ekki heima passaði grenndargát kannski betur. Annars hittirðu naglann einatt á höfuðið.