Skrifað og skrafað

Í fréttatímum  beggja  sjónvarpsstöðvanna var rætt við  formann Bændasamtakanna, sem fjölyrti að vanda um fæðuöryggi. Staðreynd er að íslenskur  landbúnaður   er svo háður   erlendum aðföngum að hann tryggir  þjóðinni ekki fæðuöryggi  fyrir  fimm aura , ef  tekur fyrir aðdrætti erlendis  frá.  Það á að hlífa okkur við svona  bulli. Bændur óttast  að fá ekki lengur tollvernd og helming tekna sinna frá  skattþegnum landsins.  Fréttamaður Stöðvar tvö reyndi að  spyrja formanninn um tollvernd og   óhagkvæm  bú, en fékk eengin svör. Fréttamaður Ríkissjónvarpsins reyndi ekki einu sinni að spyrja. Kranablaðamennskan ,sem Jónas Kristjánsson réttilega nefnir svo, var að  venju á fullu.

Íþróttafréttamaður Ríkisútvarpsins  sagði  í sexfréttum (06.07.2011)  um  vetrarólympíuleikana 2019, – í dag var ákveðið að vetraólympíuleikarnir fara fram  í ….  Hér  hefði farið betur á  að segja , að  leikarnir fari fram,  ekki fara fram.

Í sexfréttum Ríkisútvarpsins (06.07.2011) var tekið  svo til orða að eitthvað skaraðist á  við e-ð. Þarna  var á-inu ofaukið.  Nóg hefði verið að segja að eitthvað skaraðist við e-ð.

 Í   fréttum Ríkissjónvarps (06.07.2011) var talað um að stinga út  moði.  Moð er er heyrusl eða salli og er því  venjulega mokað út eða  sópað. Skán er hinsvegar stungin út. Í  sama fréttatíma var  talað um þrjá í verkefnastjórninni af tólf  meðlimum. Þarna var meðlimunum ofaukið, eins og þeim er nær alltaf.

Einn af íþróttafréttamönnum Ríkissjónvarpsins hefur þann hvimleiða sið að  enda oft setningar á  einhverri undarlega uppskrúfaðri hækkandi nótu. Þetta er í algjörri andstöðu  við eðlilegan talanda og  eðlilega hrynjandi málsins.  Heyra þetta ekki fleiri en Molaskrifari ? Raunar er  nýjasti og yngsti liðsmaður íþróttadeildar  Edda Sif  Pálsdóttir betur máli farin en flestir karlarnir. Hún hefur  líka þægilega rödd og talanda.

Æ algengara  er að í  auglýsingum sé talað til íslenskra neytenda á ensku. Hagkaup fetar í fótspor  Húsasmiðjunnar og  tönnlast á ensku orðunum Tax Free  um leið og því er logið að lesendum að fyrirtækið  sé í aðstöðu til að afnema virðisaukaskatt. Hversvegna banna skattayfirvöld ekki fyrirtækjum að ljúga  um skattamál í auglýsingum ?   Nýjasta  enskuauglýsingin sem skellt er á íslenska  neytendur er frá  íþróttavöruframleiðandanum Adidas í  Fréttablaðinu (07.07.2011) Adidas is all in. Ekki tekur betra við í Mogga   þar er  heilsíðu  aulýsing um Diesel  ilmvatn. Auglýsingin er öll á ensku. Kannski er  hún  ekki ætluð Íslendingum.  Í  Ríkisútvarpinu auglýsti veitingastaður  nítjánda  bröns, – þaulvanur  þulur  hikstaði á þessu. Molaskrifari láir honum það ekki.  Bylgjan auglýsir   golfmót  (held ég)  sem kallað er  Bylgjan open . Þessi fyrirtæki eiga að skammast sín.  Finnst þeim fínna að kynna vörur sínar á ensku fyrir okkur?  Þetta minnir á dönskusnobbið fyrir svona  hundrað árum.

 Moalskrifari sér ekki betur en að  Morgunblaðið sé komið inn á  nýjar brautir við að selja sig. Í  Viðskiptablaði Morgunblaðsins (07.07.2011) er grein  sem kölluð er Pistill  um markaðsmál. Undir greininni  stendur:  ,,Greinaröð Morgunblaðsins  um markaðsmál er styrkt af  Íslensku auglýsingastofunni (www.islenska.is) og  Nordic eMarketing (www.nem.is)”  Nú geta menn  keypt  greinar inn í Mogga   Það er nýlunda í íslenskri blaðamennsku. Þetta er líklega eitthvað tengt því sem sumir  hafa kallað auglýsingahórerí í Útvarpi Sögu.