Í hádegisfréttum Bylgjunnar (09.07.2011) tvísagði fréttamaður, að hlaupið í Múlakvísl væri í rénum. Það er rangt. Rénun er rétta orðið og þýðir minnkun. Þegar flóð eða hlaup er í rénun fer það minnkandi.
Í morgunútvarpi Rásar tvö (11.07.2011) talaði umsjónarmaður um ferjusiglingar á Múlakvísl. Það var og. Þar var líka talað um Fjallabaksleið nyrðri, sem gegnir hlutverki hjáleið, eins og umsjónarmaður komst að orði. Fjallabaksleið nyrðri er hjáleið, eða gegnir hlutverki hjáleiðar, meðan Múlakvísl er óbrúuð.
Vakin er athygli á grein Valgeirs Sigurðssonar varaformanns Hollvinasamtaka Ríkisútvarpsins á bls. 15 í Morgunblaðinu í dag (11.07.2011). Grein sína nefnir Valgeir: heitir Ríkisútvarpið RÚV? Því miður er greinin ekki aðgengileg á vefnum. Ríkisútvarpsins. Allir þeir sem láta sér annt um Ríkisútvarpið ættu að lesa þessa grein.
Auglýsingastofur spara sér greinilega prófarkalestur. Það er vondur sparnaður. Þessvegna sjá lesendur augljósar villur eins og þegar talað er um bólgueiðandi töflur í heilsíðu auglýsingu í Fréttablaðinu (09.07.2011). Það á að vera bólgueyðandi.
Úr dv.is (089.2011). Til að undirstrika það veltu hermennirnir stórum grjótum á aðra götuna á þessum krossgötum. Þessi orð eru eignuð Össuri Skarphéðinssyni, utanríkisráðherra. Molaskrifari veit, að svona orðar Össur ekki hugsun sína. Hann er enginn bögubósi.
Myndatexti í sunnudagsmogga (10.07.2011): Ef marka má þessa mynd tókust tilraunir hertogaynjunnar af Cambridge vel upp. Betra hefði verið: Ef marka má þessa mynd tókust tilraunir hertogaynjunnar af Cambridge vel. Hertogaynjunni tókst vel upp.
Úr mbl.is (10.07.2011): Betur fór en á horfðist þegar bíll velti við Kúagerði á Vatnsleysuströnd nú undir hádegi. Þetta er undarlega þrálát meinloka hjá ýmsum fréttaskrifurum. Hverju velti bíllinn ? Bíllinn valt við Kúagerði. Hann velti hvorki einu né neinu. Í sömu frétt segir: Að sögn sjúkraflutningamanna hljómuðu aðstæður illa þegar útkall barst. Aðstæður hljóma hvorki vel eða illa. Hér hefði til dæmis mátt segja: Að sögn sjúkraflutningamanna virtist slysið alvarlegt, virtust aðstæður slæmar, virtist ástandið slæmt. Aðstæður hljóða aldrei.
Talsmaður ferðaþjónustu talaði um háönnina í merkingunni um háannatímann í fréttum Ríkisútvarpsins (10.07.2011). Ekki hefur Molaskrifari áður heyrt þannig tekið til orða.
Lokun hringvegarins eftir að brúna tók af Múlakvísl er mikið áfall fyrir ferðaþjónustuna. Ekki bara í nágrenni hamfaranna, heldur um allt land. Vegagerðin hefur sagt að það taki 2-3 vikur á gera bráðabirgðabrú yfir kvíslina. Það er eins og sumir talsmenn ferðaþjónustu geri sér enga grein fyrir því að það er ekki áhlaupaverk að gera bráðabirgðabrú yfir jökulfljót. Einn ferðaþjónustumaður eystra, sagði réttilega að nú töluðu allir eins og verkfræðingar og þættust allt geta og vita. Töluðu eins og þetta væri eins eða tveggja daga verk. Það er eins og menn efist um að vegagerðarmenn muni gera sitt besta til að flýta verkinu. Þar er þeim gert rangt til. Íslenskir vegagerðarmenn standa fyrir sínu. Það hafa þeir margsýnt. Það er líka einkennileg pólitík hlaupin í spilið, þegar ráðamenn í ferðamálum tala um seinagang stjórnvalda. Hvað áttu stjórnvöld að gera meira? Það hefur komið fram að unnið er og unnið verður dag og nótt við brúarsmíði og menn verið kvaddir til starfa,sem komnir voru í sumarleyfi með fjölskyldum sínum. Það er eiginlega talað eins og þetta sé allt ríkisstjórninni að kenna.
1 athugasemd
Ekkert ping ennþá
manni skrifar:
11/07/2011 at 18:45 (UTC 0)
Enmitt það sem ég hef oft velt fyrir mér….hvernig getur Vegagerðin sagt eitthvað?Hefði þessi ferðaþjónustumaður kannski átt að sleppa því að tjá sig,og vísa bara á Ferðaþjónustuna?
„Vegagerðin hefur sagt að það taki 2-3 vikur á gera bráðabirgðabrú yfir kvíslina. Það er eins og sumir talsmenn ferðaþjónustu geri sér enga grein fyrir því að það er ekki áhlaupaverk að gera bráðabirgðabrú yfir jökulfljót. Einn ferðaþjónustumaður eystra, sagði réttilega að nú töluðu allir eins og verkfræðingar og þættust allt geta og vita.“