Nú hefur verið greint frá því, að forsíðumyndin á nýju símaskránni er fölsuð. Einu sinni var sagt að mynd segði meira en þúsund orð. Nú vitum við að hjá fyrirtækinu, sem gefur út símaskrána lýgur mynd meira en milljón orð. Útgefandi á að biðja símnotendur afsökunar á þessari fölsun.
Dæmi um óþarf og óskýra þolmyndarnotkun var í fréttum Ríkissjónvarps (006.06.2011). Þá sagði fréttamaður: .. það hús var keypt af sömu eigendum. Þýddi þetta að sömu eigendur hefðu selt einhverjum húsið? Eða, að sömu eigendur hefðu keypt húsið af einhverjum? Af fréttinni mátti ráða að það síðarnefnda átti við í þessu tilviki. Það er alltaf betra að nota germynd. Þessi þolmynd var til óþurftar.
Ekki þarf að hafa mörg orð um það, að eftirfarandi orðalag á mbl.þis (06.06.2011) er ótækt: Allar stöðvar Slökkviliðs höfuðborgarsvæðisins hafa verið sendar að húsi við gatnamót Miklubrautar og Stakkahlíðar í Reykjavík vegna reyks frá húsinu.
…og bar þar einn hæst landsleikur…, sagði íþróttafréttamaður Ríkissjónvarps (05.06.2011). Þetta er býsna algengt að heyra. Fréttamaður hefði átt að segja: … og bar þar einna hæst landsleik…
Við höfum fengist við útgerð, eldi, veiðar, vinnslu, sölu, matreiðslu og í raun flest allt sem viðkemur fisk og sjávarútvegi. Þannig komst þingmaður að orði í ræðu á sjómannadaginn (05.06.2011). Gott hefði verið að fara rétt með beygingu orðsins fiskur, – ekki síst á þessum degi. … allt sem viðkemur fiski og sjávarútvegi, hefði þetta átt að vera.
Landið liggur nú undir köldu lofti… svona kemst veðurfræðingur DV að orði (06.06.2011). Eðlilegra væri að segja að kalt loft sé nú yfir landinu.
Breytingar á veðurfréttum Ríkissjónvarpsins, sem gerðar voru fyrir nokkru tókust ágætlega og voru til bóta. Einhver bestu veðurkort, sem Molaskrifari sér á skjánum eru hjá japönsku sjónvarpsstöðinni NHK World. Breytingarnar á útliti fréttatímans tókust hinsvegar miður vel. Ríkisjónvarpið er enn með iðandi boga og hringi í bakgrunni og stundum er engu líkara en verið sé að búa til geislabaug yfir þeim sem les fréttirnar.
Molaskrifari hafði lúmskt gaman af því að heyra rætt við Seðlabankastjóra um hvort gefa ætti út tíu þúsund króna seðil. Efnislega sagði Seðlabankastjóri: Það verður tilkynnt um það, þegar verður tilkynnt um það. Ég ætla ekki að tilkynna um það núna. Alveg skýrt.
4 athugasemdir
Ekkert ping ennþá
Eiður skrifar:
07/06/2011 at 21:29 (UTC 1)
Jú, þetta er frábært orðalag. Fleiri hafa bent á þetta.
Eiður skrifar:
07/06/2011 at 21:29 (UTC 1)
Eftir öðru, – eins og málfarið stundum er þar á bæ.
Alli skrifar:
07/06/2011 at 13:49 (UTC 1)
Karl er nú LAUS FERÐA SINNA og kominn aftur til landsins.+
Vel orðað, ekki satt?
Björn S. Lárusson skrifar:
07/06/2011 at 11:07 (UTC 1)
Í fréttum Rúv-sjónvarps 6.6 var sagt a þeir ætli að „reisa“ höfn á Langanesi og „byggja“ fótboltavöll á Ísafirði.