Skrifað og skrafað

Jórunn Sigurðardóttir dagskrárgerðarmaður  við Ríkisútvarpið hlaut  verðlaun Jónasar Hallgrímssonar á degi íslenskrar tungu á laugardaginn (16.11.2013). Það var verðskulduð  viðurkenning. Til hamingju, Jórunn.

Verðlaunahafinn mælti nokkur orð er hún veitti verðlaunum viðtöku og var  ómyrk í mál um stofnunina sem  hún  starfar fyrir, Ríkisútvarpið. Hún sagði meðal annars (tilvitnun af vef Ríkisútvarpsins): ,, ….   þrátt fyrir þetta eru tilfinningar mínar á þessari stundu tvíbentari en ég hefði óskað, vegna þess að stofnunin, sem ég á þessari viðurkenningu að þakka, er í uppnámi, stjórnlaus, og hefur verið nokkuð lengi. Nú skorti fé, það verður að draga úr útgjöldum og forgangsraða. Samfélagið er flókið fyrirbæri og peningar eru hreyfiafl, en peningar búa ekki yfir neinu gildismati. Ákvarðanir um hvernig þeim er varið felur hins vegar í sér gildismat og það gildismat verður til út frá sýn okkar um það sem við notum þá til. Útvarpið stendur á tímamótum, tæknilega og samfélagslega. Það þarfnast sárlega skýrrar sýnar frá umboðsmönnum eigenda sinna, yfirstjórn mennta- og menningarmála og ráðamönnum útvarpsins sjálfs. Ég óska eftir slíkri sýn og lýsi mig reiðubúna til að taka þátt í opinni samræðu um hana. Rás 1 má ekki hverfa“.  (Feitletrunin  er frá  Molaskrifara komin.) Molaskrifari  hefur  svo sem nefnt það  að Ríkisútvarpið er stjórnlaus stofnun í ölduróti hins íslenska fjölmiðlahafs, enda þótt þar starfi mjög  margt hæft fólk,  sennilega fleira en á flestum öðrum miðlum.   –

Á degi íslenskrar tungu birtist í Fréttablaðinu heilsíðuauglýsing  um jólatónleika  Mótettukórs Hallgrímskirkju. Áreiðanlega er þetta merkur listviðburður. Auglýsingin  er bæði á íslensku og ensku.  Molaskrifari veltir því fyrir sér  hvort  lesendur Fréttablaðsins sem aðeins skilji ensku séu mjög  fjölmennur hópur. Sennilega ekki. Varla  er verið  að höfða til ferðamanna, sem  fæstir lesa  sennilega Fréttablaðið  með því að auglýsa á ensku tónleika sem fara fram eftir  þrjár vikur. Kannski er þetta bara tímanna tákn um vaxandi  veldi  enskunnar hér á landi. En auglýsingadagurinn var illa valinn.

Af mbl.is (16.11.2013 )úr frétt um færð á vegum: ,,Vakin er athygli á að ekki eru allir vegir í þjónustu alla daga vikunnar.”  Dálítið sérkennilegt orðalag. Með orðunum í þjónustu er sennilega átt við að ekki sé rutt eða mokað á öllum vegum alla daga.

Af mbl.is /17.11.2013) úr  frétt um farþegarþotu sem snúið var til baka  til Glasgow vegna  gruns um bilun:  ,,Á leiðinni drapst á einum hreyfla vélarinnar, að sögn …”  Þoturnar sem Icelandair notar  til farþegaflugs  eru með tveimur hreyflum. Hér hefði því átt að segja

að drepist hefði á öðrum hreyfli vélarinnar.  Sama vitleysan er endurtekin seinna í fréttinni.  http://www.mbl.is/frettir/innlent/2013/11/17/flugvel_snuid_vid_vegna_bilunar/

Heldur  skánar  þátturinn Sunnudagsmorgunn GMB í Ríkissjónvarpinu , sem enn er  eiginlega bara  Reykjavíkurþáttur. Ekki örgrannt um að Eyjólfur sé aðeins að hressast. Alltaf jafn gaman að   heyra  Vigdísi  Hauksdóttir  halda  því fram að gríðarleg  fjölgun aðstoðarmanna  ráðherra í  ríkisstjórn   Framsóknarflokks og  Sjálfstæðisflokks  sé alfarið fyrri  ríkisstjórn  VG og  Samfylkingar að kenna! Þeir sem helst trúa því eru líklega mannvitsbrekkurnar , sem kusu konuna á þing.

Gísli Marteinn á ekki að segja  að einhver hafi  sigrað prófkjör Sjálfstæðisflokksins., eins og hann gerði  í  gær. Það  er hálfgert bull.

Fyrirvari: Athugasemdir frá öðrum á þessari síðu eru á þeirra ábyrgð. Síðuskrifari áskilur sér rétt til að fjarlægja dónaleg eða meiðandi ummæli, nafnlausar athugasemdir eða athugasemdir undir dulnefni. Lesendabréf eru vel þegin. Bréfritarar eru beðnir að taka fram hvort birta megi bréf, eða ábendingar þeirra, undir nafni, – ESG