Í DV (22.07.2009) eru nokkrar síður helgaðar Vestfjörðum. Þar er greinarkorn um það er sjóræningjar rændu sýslumanninum á Rauðasandi. Fyrirsögnin er reyndar í óþarfri þolmynd. Germynd er alltaf betri. En undirfyrirsögnin er undarleg: Í Sjóræningjahúsinu á Patreksfirði eru rifjaðar upp viðkomur sjóræningja fyrir uppátæki þeirra. Þessi setning er mér gjörsamlega óskiljanleg. Í henni er ekki heil hugsun. Í greininni segir, er fjallað er um fjölgun ferðafólks á Vestfjörðum: Við stefnum að árvissum stíganda í efni og því að stækka sýninguna… Þessi setning er lítið betri en undirfyrirsögnin.
Of algengt er að sjá orðið verð notað í fleirtölu í auglýsingum. Verð er eintöluorð. Gott verð. Ekki góð verð. Nú hefur nýtt orð bæst í þetta fleirtölufár í auglýsingum. Húsgagnahöllin auglýsir: Alvöru afslættir. Molaskrifara finnst að rétt eins og verð , sé afsláttur eintöluorð.
Í tíufréttum RÚV sjónvarps (22.07.2009) var fjallað um ábyrgð Íslands á margnefndum Icesave bankareikningum í Bretlandi. Þrisvar sinnum, já, þrisvar sinnum , var sagt að ábyrgð Íslands væri óafturkræfanleg ! Það er óafturkræft „sem ekki er unnt að krefjast (taka) aftur“, eins og segir í Íslenskri orðabók. Molaskrifari gerðist svo djarfur að senda Fréttastofu RÚV (þessari sem við eigum öll samkvæmt auglýsingaherferðinni) svohljóðandi vinsamlega ábendingu skömmu eftir fréttir: Í tíu fréttum var þrísagt að ábyrgð Íslands á Icesave reikningunum væri óafturkræfanleg. Þetta er ástæðulaust nýyrði. Óafturkræf hefði nægt. Ekki getur þettatalist ókurteisi. Ekkert svar, ekki frekar en fyrri daginn. Enda kemur okkur eigendum þetta ekkert við og við eigum ekki að vera með nöldur eða afskiptasemi. Við eigum bara að þegja og hlusta með lotningu á það sem við okkur er sagt.
Sá orðhagi Stefán Jónsson fréttamaður, rithöfundur og þingmaður bjó til nýyrði um þá sem fyllast hofmóði við það eitt að setjast við hljóðnema. Hann sagði að þeir væru með míkrófónbólginn haus. Það er ástæða til að halda því til haga. Hofmóður er dramb.
2 athugasemdir
Ekkert ping ennþá
Steini Briem skrifar:
25/07/2009 at 01:16 (UTC 0)
Lög um Ríkisútvarpið ohf. nr. 6/2007:
II. kafli. Hlutverk og skyldur.
3. grein. Útvarpsþjónusta í almannaþágu.
Hlutverk Ríkisútvarpsins ohf. er rekstur hvers konar útvarpsþjónustu í almannaþágu, svo sem hljóðvarps og sjónvarps, eftir því sem nánar er ákveðið í lögum þessum.
Útvarpsþjónusta í almannaþágu felur í sér eftirfarandi:
1. Að leggja rækt við íslenska tungu, sögu þjóðarinnar og menningararfleifð. …“
„Málstefna Ríkisútvarpsins
Ríkisútvarpið skal samkvæmt lögum efla íslenska tungu og menningu. Útvarpsráð telur að stofnunin hafi mikilvægu fræðslu- og uppeldishlutverki að gegna á þessu sviði.
Allt málfar í Ríkisútvarpinu á að vera til fyrirmyndar, og allt sem frá stofnuninni kemur, á vandaðri íslensku, flutt með góðum framburði.
Erlend orð sem ekki verður komist hjá að nota, ber að samræma lögum íslenskrar tungu, eftir því sem fært þykir og góð venja býður.“
Þingsályktunartillaga um íslenska málstefnu samþykkt 12.3.2009:
Hlusta – Horfa
„Virðulegi forseti. Ég vil leyfa mér að koma hér og fagna afgreiðslu þessa máls og þeirri góðu umræðu sem orðið hefur í þinginu um málstefnuna, bæði í 1. umræðu og 2. umræðu. Ég óska okkur til hamingju með afgreiðslu þessa máls og ég treysti því að við sem hér sitjum vinnum áfram að því að málstefnan muni komast til framkvæmda. Það er mér mikill heiður að fá að vera menntamálaráðherra þegar þessi stefna er samþykkt en um leið óska ég forvera mínum í starfi til hamingju með afgreiðslu þessa máls.“
Steini Briem skrifar:
25/07/2009 at 00:24 (UTC 0)
Katrín Jakobsdóttir menntamálaráðherra, katrin.jakobsdottir@mrn.stjr.is
Ásgrímur Angantýsson, nýr málfarsráðunautur Ríkisútvarpsins, asgrimur@ruv.is
Nýr málfarsráðunautur RÚV