Það var svartur fréttatími í Ríkissjónvarpinu í kvöld. Þar rak hver fréttin aðra um atferli bankabófanna, sem forðuðu fjármunum sínum í skattaskjól víðsvegar um veröldina, þegar þeir sáu afleiðingar afreka sinna kristallast í yfirvofandi hruni bankanna. Svo situr þjóðin í skuldasúpunni sem þessir 20-30 menn hafa soðið okkur. Og allir ganga þeir lausir, — ennþá. Mennirnir sem settu íslenska samfélagið á hliðina. Sumir þeirra hafa nú atvinnu af ráðgjöf. Aðrir kenna ungu fólki fjármálafræði. Svei attan !
Sömu ambögurnar aftur og aftur ! Auglýsingabæklingi frá ELKO var stungið inn um bréfalúguna hjá mér (27.07.2009) í morgun. Þar stendur á forsíðu: Verslaðu GSM símann þinn í ELKO. Þar með fór sá bæklingur í endurvinnslubunkann. Það verslar enginn síma. Sumir kaupa síma.
Í Molum hefur stundum verið rætt um ofnotkun þolmyndar. Í grein í Morgunblaðinu (26.07.2009) segir um hlut í fyrirtæki: Sá hlutur hefur nú verið keyptur af okkur aftur.. Hér er notkun þolmyndar ógóð því merkingin verður óskýr. Þetta getur bæði þýtt: Við höfum selt hlutinn, þ.e. einhver hefur keypt hann af okkur eða við höfum keypt hlutinn aftur. Af lestri greinarinnar er ljóst þau sem þarna tala hafa keypt hlutinn í fyrirtækinu að nýju. Enn segir Molaskrifari: Germynd er alltaf betri Við höfum nú keypt hlutinn aftur. Skýrt og skilmerkilegt.
Í leiðara Morgunblaðsins (27.07.2009) stendur: Rétt eins mætti færa rök að því að að erfiðara yrði að tudda á ríki,sem stæði í aðildarviðræðum við Evrópusambandið. Tudda á. Í orðabók má finna orðið tuddast, óformlegt íþróttamál. leika gróft,sýna tuddaskap í leik. Að tudda á er barnamál rétt eins og að klessa á . Nú er leikskólamálið komið í leiðara Moggans.
Í sjöfréttum RÚV (27.07.2009) var sagt frá skemmtiferðaskipi sem sigldi á hval á og drap hann. Hékk hvalurinn svo á perustefni skisins uns það kom í höfn í Vancouver. Tvísagt var að skipið hefði lagt að höfn í Vancouver. Skip koma í höfn. Skip leggjast að bryggju. Skip liggja við bryggju. Skip leggjast ekki að höfn. Á vef RÚV sama dag er einnig fjallað um þennan atburð: Þar segir: ..en 22 metra dauður langreiður sat fastur á stafnkúlu skipsins. Við þetta er tvennt að athuga. Langreyður er ritað með y ekki i og langreyður er kvenkynsorð. Þessvegna hefði átt að skrifa: .. 22 metra langreyður sat föst.. Hinsvegar finnst mér stafnkúla vera mun falllegra orð en perustefni,sem ég notaði.
Það var skemmtilegt að hlusta á gengna þingskörunga í Andrarímum, Guðmundar Andra Thorssonar, á rás eitt í RÚv á sunnudagskvöld (26.07.2009). Flutt var efni úr þætti Indriða G. Þorsteinssonar, ritstjóra og rithöfundar , Sitt sýnist hverjum, frá árinu 1965. Þar töluðu þeir Bjarni Benediktsson, Lúðvík Jósefsson og Eysteinn Jónsson um þá kosti sem þingmaður þyrfti að vera prýddur, eða hverskyns nám eða störf væru bestur undirbúningur fyrir þingmennsku. Allir voru þeir góðir, en að hinum ólöstuðum fannst mér Bjarni bestur. Vona að þingmenn Sjálfstæðisflokksins hafi verið að hlusta.
Allir töluðu þessir stjórnmálaforingjar einstaklega vandað mál. Í flestum meginatriðum voru þeir reyndar sammála. Eysteinn sagði að þingmenn þyrftu að vera vel máli farnir. Besta leiðin til að tileinka sér gott málfar væri að lesa og lesa vandaða texta og leggja sig eftir að ræða við þá sem hefðu gott tungutak, þá væri víða að finna ef vel væri leitað. Með þessu átti Eysteinn örugglega við að slíkt fólk væri ekki einungis að finna meðal langskólamanna heldur og ekki síður meðal alþýðu þessa lands til sjávar og sveita. Orð að sönnu. Öllum þessum mönnum var ég persónulega kunnugur. Bjarna þó minnst,
6 athugasemdir
Ekkert ping ennþá
Eiður Svanberg Guðnason skrifar:
28/07/2009 at 16:32 (UTC 1)
Jú, það er rétt athugað, Birgir Örn. Þetta fór framhjá mér.
Birgir Örn Birgisson skrifar:
28/07/2009 at 16:14 (UTC 1)
Færir maður ekki rök fyrir einhverju?
Predikarinn - Cacoethes scribendi skrifar:
28/07/2009 at 13:15 (UTC 1)
Afsakið þetta.
Það voru nú greinaskil í pistlinum mínum þegar ég setti hann hér inn á síðuna. Þess sjást engin merki eins og glöggir lesendur geta séð.
Bjarni Kjartansson skrifar:
28/07/2009 at 11:59 (UTC 1)
Afskaplega ljúft að hlusta á mál þeirra genginna stjórnmálamannanna um hvað ætti að vera kennimark góðra þingmanna. Betur að margur nútímamaðurinn hlustaði aftur og aftur á þessi vitorð.
Um hitt sem þú skrifar um úr nútímanum, aðferðir bankamanna okkar og digurbarka um eigin ágæti í fjármálakúnstum, setti ég inn á þráð eins bloggarans þetta:
Svo er mér sár sú mismunun sem virðist ganga yfir, nánast hljóðlaust.
Ungir menn, sem líklega höfðu verið verkfæri í höndum kunnáttumanna í fjármálagerningum, eru settir í járn vegna gruns um, að hafa ,,svikið út“um það bil fjóra miljónatugi en stórlaxarnir sem eru berir að svikum og blekkingum upp á milljarðatugi, fá auglýstar ráðgjafaskrifstofur sínar erlendis og fjölmiðlungar birta bullið úr þeim nánast spurningalaust.
Svo eru þeir sem voru formenn greiningadeilda nú að skrifa um hrunið til brúks í útlöndum. Hvítþvo sig og segja nú, að það hafi ekkil verið nokkur von til að bjarga bönkunum, hvorki ríkið eða aðrir hafi haft til þess getu. SAMT vældu sömu menn um stærsta bankarán sögunnar og hvað eina báru út ráðamenn sem þó voru búnir að lána langt um fram getu bankana til að standa við,–allt í krafti upplýsinga ÞESSARA SÖMU MANNA sem nú tala flátt til þeirra.
Miðbæjaríhaldið
Vildi undirstrika, að svona hefði trauðla verið liðið fyrir Vestan hjá áum mínum, einhver hefði þurft að snýta rauðu ef ekki vinna mat sínum við bág kjör til yfirbótar.
Bjarni Kjartansson
Íhald, af fornri gerð
Eiður Svanberg Guðnason skrifar:
27/07/2009 at 22:25 (UTC 1)
Leiðrétti hér með númerið á þessum pistli. Á auðvitað að vera CXIII.
Eygló skrifar:
27/07/2009 at 22:11 (UTC 1)
Viðtal við fólk sem er að opna safn. Goðafræðin þar fyrst og fremst, a.m.k. „aðalsöguhetjurnar“.
Viðmælendurnir tveir svöruðu til skiptis. Hann vildi lofa hennar hlut og sagði að þetta væri nú hennar „baby“.
Um Loka var sagt að hann væri flókinn persóna, ekki bara það sem hann gerði, heldur væri svo margt sem hann „triggeraði“.
Man ekki hver það var, en eitthvert goðanna var í vanda vegna þess sem það þurfti á „díla“ við.
Mér fannst þetta sérstaklega átakanlegt vegna umræðuefnisins. Ég mun allavega ekki borga stórfé þarna inn; svo hrædd um að merkingar verði í sömu ætt 🙂