Það er ekki hátt risið á forsíðu DV (06.05.2011) Hvað kemur fólki það við hvort dóttir Gunnars í Krossinum var hrein mey eða ekki, þegar hún gekk í hjónaband? Molaskrifari var að vona, að DV væri vaxið upp úr svona Séð og heyrt rugli.
Rétt er það sem Morgunblaðið segir í leiðara (06.05.2011), að Landsdómsaðferðin sé úrelt. Það er ekki bara að aðferðin sé úrelt, heldur er málsmeðferðin og niðurstaðan þeim alþingismönnum,sem að henni stóðu til skammar. Allt er þetta mál svartur blettur í dómsmálasögu landsins. Þetta hefur raunar verið sagt hér áður.
Jón Bjarnason landbúnaðar- og sjávarútvegsráðherra er enginn kjáni. Þessvegna á hann ekki að láta eins og kjáni, þegar hann talar við fréttamenn.
Í þróttafréttum Ríkissjónvarpsins (06.05.2011) var löng frétt um þjálfaradeilu hjá handknattleiksdeild Fram. Molaskrifari spyr: Er þetta eitthvað ,sem öll þjóðin verður að fá að vita? Málið er svo mikilvægt í Efstaleiti, að íþróttadeild Ríkisjónvarpsins stendur á öndinni. Rangt fréttamat.
Svavar Halldórsson fréttamaður Ríkissjónvarps á heiður skilinn fyrir að upplýsa okkur um svikamyllu og svindl stjórnenda Kaupþings og Glitnis, sem er hreint með ólíkindum að heyra um (06.05.2011).
Það er of algengt að fréttamenn noti þolmynd að óþörfu. Germynd er betri. Í morgunfréttum Ríkisútvarps (05.05.2011) var sagt: Sex drukknir bílstjórar voru stöðvaðir af lögreglu … Betra hefði verið: Lögreglan stöðvaði sex drukkna bílstjóra ….
Úr mbl.is (05.05.2011): Opnuðu kjörstaðir klukkan sex að breskum tíma, fimm að íslenskum, og loka þeir klukkan níu að staðartíma í kvöld, átta á Íslandi. Hvað opnuðu kjörstaðir og hverju lokuðu kjörstaðir. Það er óljóst hjá mbl. is. Þetta var einnig rangt orðað í fyrirsögn en rétt orðað á öðrum stað í fréttinni þar sem sagt var réttilega, að kjörstaðir hefðu verið opnaðir.
Úr mbl.is (05.05.2011): Kjaraviðræður hófust á ný í morgun og eru fundarmenn enn að týnast inn í hús ríkissáttasemjara. Vonandi eru blessaðir mennirnir fundnir. – Þeir fundust sem betur fer og samningar tókust. Meira úr mbl.is (06.05.2011): ….að kjarnorkuveri suðvestur af Tókýó skildi lokað þar sem það er staðsett nærri flekaskilum... Það vefst fyrir þeim ypsilonið eða ufsílónið hjá mbl.is
Í pistli í Kastljósi (06.05.2011) talaði sagnfræðingur um geyma ,,Olíufélagsins” á Klöpp við Skúlagötu. Geymana átti Olíuverslun Íslands. Þess er Molaskrifari næsta viss. Á þá voru málaðir gluggar á stríðsárunum svo þeir líktust húsum. Í sagnfræðinni skipta smáatriðin líka máli.
Í fréttum Stöðvar tvö (07.05.2011) sagði fréttamaður: …. sem sigraði Íslandsmeistaramótið í vaxtarrækt. Menn sigra ekki mót. Menn geta sigrað á móti. Raunar finnst Molaskrifara rangt að tala um vaxtarrækt. Það ætti að tala um afskræmingu mannslíkamans. En Molaskrifari er náttúrulega sérvitringur og nöldrari.
Skildu eftir svar